13 شىلدە كۇنى «قازتسينك» كومپانياسىنا قاراستى وسكەمەن مەتاللۋرگيالىق كەشەنىنىڭ وندىرىستىك الاڭىندا داڭق اللەياسى سالتاناتتى تۇردە اشىلدى. وڭىردەگى ءىرى ءوندىرىس ورنىنىڭ اكىمشىلىك ماسەلەلەر جونىندەگى اتقارۋشى ديرەكتورى اندرەي لازارەۆ داڭق اللەياسىنىڭ اشىلۋى قاراپايىم جۇمىسشىلارعا كورسەتىلگەن قۇرمەت ەكەندىگىن, مۇندا وسىندا ەرەن ەڭبەگىمەن كوزگە تۇسكەن جۇزدەگەن قىزمەتكەرلەردىڭ سۋرەتتەرى ىلىنگەنىن ايتادى. «داڭق اللەياسىنا مەنىڭ دە سۋرەتىم قويىلعان ەكەن. ەندى مەنىڭ سۋرەتىمدى مەكەمەنىڭ بارلىق ەڭبەككەرلەرى مەن قوناقتارى كورەتىن بولادى. جۇمىسىمدى ماراپات الۋ ءۇشىن ەمەس, ءوز ءىسىمدى جاقسى كورگەندىكتەن ىستەيمىن. دەگەنمەن كومپانيا باسشىلىعىنا از-كەم ەڭبەگىمىزدى ەلەپ-ەسكەرگەندەرى ءۇشىن العىس ايتامىن», - دەيدى وسكەمەن مەتاللۋرگيالىق كەشەنىنىڭ ساراپتاۋ جانە جوسپارلاۋ قىزمەتىنىڭ باسشىسى امانگەلدى تىنىباەۆ.
سونىمەن قاتار وسى كۇنى «قازتسينك» كومپانياسى ۇيىمداستىرعان «ىزگى جۇرەك» سىيلىعى وسكەمەندەگى «ۆوستوك» ستاديونىندا سالتاناتتى تۇردە تابىس ەتىلدى. بۇل سىيلىق ءوز ءومىرىن قاتەرگە تىگىپ, قاراپايىم ادامداردى قۇتقارعان قاراپايىم شىعىسقازاقستاندىق قايسار ازاماتتاردى انىقتاۋ ماقساتىندا قولعا الىنعان-دى. سونىمەن, حالىقتىڭ داۋىس بەرۋى ناتيجەسىندە ەرتىستىڭ مۇزدى سۋىنان ەكى جاستاعى بالاسىن قۇتقارۋ ءۇشىن سۋعا سەكىرگەن اناسىنا جاردەمدەسكەن وسكەمەندەگى توتەنشە جاعداي ءبولىمىنىڭ ءورت ماشيناسىنىڭ جۇرگىزۋشىسى ۆيتالي باقتىباەۆ, ورتكە ورانعان ۇيگە بالكون ارقىلى كىرىپ زەينەتكەرگە كومەك قولىن سوزعان ەلەكترومونتەر پاۆەل كاچەسوۆ, قاقاعان قاڭتار ايىندا سۋ باسقان ۇيدەن ەكى بالا مەن زەينەتكەردى قاۋىپسىز جەرگە جەتكىزگەن گلۋبوكوە اۋدانىنىڭ پراپورششيكوۆا اۋىلىنىڭ ۋچاسكەلىك ينسپەكتورى رۋسلان ورازامەتوۆ, ءورت شالعان ۇيدەن كىشكەنە بالانى الىپ شىققان «قازتسينك» قىزمەتكەرى الەكساندر پوپوۆ 500 مىڭ تەڭگەنىڭ اقشالاي سىيلىعىنا يە بولدى. «ماعان «سىيلىققا ۇمىتكەرلەردىڭ قاتارىندا ءسىز دە بارسىز» دەپ حابارلاسقاندا سەنبەگەنىم راس. باسىنا قاۋىپ تونگەن تۇرعىندارعا كومەكتەسكەن ازاماتتاردىڭ بارلىعى قانداي ماراپاتقا دا لايىق دەپ ەسەپتەيمىن. وسىنداي تاعىلىمدى شارانى ۇيىمداستىرعان جاندارعا ريزاشىلىعىمدى بىلدىرەمىن», - دەيدى «ىزگى جۇرەك» سىيلىعىنىڭ جەڭىمپازدارىنىڭ ءبىرى ۆيتالي باقتىباەۆ.
وبلىس ورتالىعىندا كەڭ كولەمدە تويلانعان مەتتالۋرگتەر كۇنى مەرەكەسى «ۆوستوك» ستاديونىندا تانىمال تەلەجۇرگىزۋشى مايا بەكباەۆا مەن اكتەر ءمۇسىلىم تاۋەكەلدىڭ جۇرگىزۋشىلىگىمەن, ءانشى الىشەر كارىموۆ, رەسەيلىك «ۆيسوكوسنىي گود» توبى جانە شاريپ ۋمحانوۆتىڭ قاتىسۋىمەن وتكەن كونتسەرتپەن تۇيىندەلدى.
ازامات قاسىم,
«ەگەمەن قازاقستان»
وسكەمەن
