استانا قالاسىنىڭ 20 جىلدىعى, اقتاۋ قالاسىنىڭ 55 جىلدىعى جانە قازكسر-ءنىڭ حالىق ءارتىسى, ۇلتىمىزدىڭ ۇلى اكتەرى نۇرمۇحان ءجانتوريننىڭ 90 جىلدىعىنا وراي اكتەر ەسىمىن ەنشىلەگەن تەاتر اۋلاسىندا اكتەردىڭ الىپ ەسكەرتكىشى بوي كوتەردى.
ۇلتتىق كينو جانە ساحنا ونەرىنىڭ الەمدىك دەڭگەيدەگى جارىق جۇلدىزى نۇرمۇحان ءجانتوريننىڭ ەڭسەلى ەسكەرتكىشىنىڭ اشىلۋ سالتاناتىنا وبلىس اكىمى ەرالى توعجانوۆ, اكتەردىڭ نەمەرە ءىنىسى عاريپوللا بايزاقوۆ, اكتريسا ءارى حالىق ءارتىسى گۇلجان اسپەتوۆا جانە جەرگىلىكتى زيالى قاۋىم وكىلدەرى قاتىستى. كينوداعى بەيبارىس – نۇرمۇحان ءجانتورين ەسكەرتكىشىنىڭ اشىلۋىن ماڭعىستاۋ جۇرتى زور قۋانىشپەن قابىلداپ, وبلىس اكىمدىگىنە جانە ۇلكەن ءىستىڭ باسى-قاسىندا جۇرگەن ازاماتتارعا العىسىن ايتتى.
ءارتىستىڭ وي ۇستىندە وتىرعان ءساتى بەينەلەنگەن ءمۇسىننىڭ ۇزىندىعى 2 مەتر 7 سانتيمەتر. تۇعىرى گرانيت تاستان جاسالعان ەسكەرتكىش 3 اي مەرزىمىندە دايىندالعان. جالپى بيىكتىگى 4,5 مەتردى قۇرايتىن ەسكەرتكىشتىڭ اۆتورى – جەرگىلىكتى ءمۇسىنشى كوشەر بايعازيەۆ, ال قارجىلاي قولداۋ كورسەتۋشى – جەرگىلىكتى كاسىپكەرلەر.
اقتاۋدىڭ اجارىن, ازاماتتىڭ ايبارىن اسىرعان ەسكەرتكىش تەاتر ارتىستەرى دايىنداعان ساحنالىق قويىلىممەن سالتاناتتى جاعدايدا اشىلدى.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
