قوعامدىق بىرلەستىك توراعاسى داۋرەن بابامۇراتوۆتىڭ ايتۋىنشا, 2017 جىلى ۇيىم «باعدارشام» ورتالىعىنىڭ جۇمىسىن جەمىستى جۇزەگە اسىردى. مۇندا اعىلشىن ءتىلى مەن تىگىن كۋرسى, ديزاينەرلىك ونەر تەگىن وقىتىلدى. ءارى تانىمال تۇلعالارمەن كەزدەسۋلەر ءوتىپ, شەبەرلىك دارىستەرى ۇدايى ۇيىمداستىرىلدى. وسىلايشا جاستاردىڭ قولى بوساعان ساتتە الاتىن باعدارى «باعدارشام» بولدى.
بۇل ماسەلەمەن اينالىسپاساق, جاستار قوعامنان شەتتەي بەرەدى. بۇل ادامنىڭ پسيحيكاسىن وزگەرتىپ, باعىت-باعدارى مەن ۇستانىمدارىنا, ءوزىن-ءوزى ايقىنداۋى مەن ءومىر سالتىنا قاتتى ىقپال ەتەتىن قاتەرلى قۇبىلىس. ارقايسىسىمىز بولاشاعىمىزدى وسى قالامەن بايلانىستىرامىز. جاستار ءۇشىن ەڭ باستى قۇندىلىق – جۇمىس! ناقتى ءبىر كاسىپتە ىسىلماعان جاستارعا جۇمىس تابۋ وڭاي ەمەس. سوندىقتان «باعدارشام» ورتالىعىندا 150-دەن استام ادام اعىلشىن ءتىلىن ۇيرەنىپ شىقتى. كومپيۋتەرلىك ساۋاتتىلىق پەن تىگىن كۋرستارىندا 200-دەن استام جان تەگىن ءبىلىم الدى. مەملەكەتتىك قىزمەتكەرلەرمەن, قارجى جانە ەكونوميكا, ساياسات پەن الەۋمەت سالاسىنداعى ماماندارمەن كەزدەسۋ ۇيىمداستىرىلىپ, ءتۇرلى ساۋالعا جاۋاپ الىندى. زاڭگەرلىك كەڭەس اياسىندا 50 ادام تەگىن كەڭەس الدى. مۇنىڭ ءبارىن تەگىن, ەڭ باستىسى شىن كوڭىلمەن ىسكە اسىردىق. ورتالىق اياسىندا ىسكە اسقان شىعارماشىلىق سايىستار, ينتەللەكتۋالدى ويىندار مەن فەستيۆالداردىڭ ءوزى ءبىر توبە, – دەيدى د. بابامۇراتوۆ.
قازىر جاستاردىڭ ءومىرىن الەۋمەتتىك جەلىلەر مەن ينتەرنەتتەن ءبولىپ قاراۋعا بولمايدى. الەۋمەتتىك جەلىلەردىڭ ءوز جۇلدىزدارى مەن تانىمال تۇلعالارى بولادى. ولاردىڭ وزىندىك ءومىر ءسۇرۋ داعدىسى مەن ترەندتەرى بار. ينتەرنەتتە بلوگەرلەردىڭ تانىمالدىلىعى مەن ارتاراپتىعى جاستارعا ۇلگى بولۋدا. ءبىرى ءبىلىم, ءبىرى عىلىم, ءبىرى بيزنەس جايلى جازىپ, تاقىرىپتارىن العا سۇيرەيدى. سونداي جاستاردىڭ باسىن قوسۋ ماقساتىندا, Zhastar Online جوباسى ءوتتى. ۇيىمنىڭ وتكەن جىلى جۇزەگە اسىرعان جوبالارىنىڭ ىشىندەگى ەڭ نەگىزگىسىنىڭ ءبىرى وسى. جوبا ەلەكتروندى فورماتتا بولعاندىقتان, مىڭداعان ادامدى قامتيدى. Almatyzhastary.kz رەسمي سايتى تۇبەگەيلى جاڭارىپ, جاستارعا ارنالعان دەربەس ەلەكتروندى پورتالعا اينالدى. مۇندا جۇمىس ۇسىنىستارى, ءبىلىم جوبالارى, مادەني شارالار تۋرالى وزەكتى اقپارات تۇراقتى جاريالانادى. بۇل جاستارعا جۇمىسقا تۇرۋعا, ءبىلىم الۋعا, بوس ۋاقىتىن ۇيىمداستىرۋعا پايداسىن تيگىزدى. بۇدان بولەك جوبا اياسىندا جاڭا مەديا سالاسىندا مامانداردى دايىنداۋعا باعىتتالعان 15 سەمينار ءوتتى. سونىمەن قاتار بلوگەرلەر مەن جاستار اراسىندا كەزدەسۋلەر ۇيىمداستىرىلىپ, الماتىنىڭ تاريحىنا, مادەنيەتىنە, كورىكتى جەرلەرىنە بايلانىستى بەينەروليكتەر ءتۇسىرىلدى.
جاستار ۇيىمى ۇسىنعان دەرەكتەرگە قاراساق, الماتىدا رەسمي تۇردە جۇمىس ىستەيتىن 57 بازار بار. وندا مىڭداعان جاس ناپاقا ىزدەپ جۇرگەنى ايان. ارقايسىسىنىڭ ارمانى مەن اۋەس ىستەرى بار. بىرەۋىندە مۇمكىندىك بولسا دا, ۋاقىت جوق, ەندى بىرىندە كەرىسىنشە. سوندىقتان وسى ماسەلەنى رەتتەپ, بازار جاستارى اراسىندا فۋتبولدان, ۆولەيبولدان تۋرنيرلەر ۇيىمداستىرىلدى. ماقسات – بازار جاستارىنا سالاماتتى ءومىر سالتىن ناسيحاتتاۋ جانە مەملەكەت تاراپىنان جاستارعا ارنالعان قولداۋدى سەزدىرۋ. «دۇيسەنبىلىك فۋتبول» جانە «دۇيسەنبىلىك ۆولەيبول» اتتى سپورتتىق شارالارعا قالاداعى بارلىق بازار جاستارى قاتىستى.
«كوزقاراس» پىكىرتالاس كلۋبى ءبىلىم قۋعان ستۋدەنت-جاستاردىڭ ارمان-ماقساتىنا ءسال دە بولسا ىقپال ەتەدى. ءتۇرلى تاقىرىپتا اپتا سايىن كلۋب وتىرىسى مەن دوڭگەلەك ۇستەل ۇيىمداستىرىپ, جاستاردىڭ ءوز ورتاسىن قالىپتاستىردى. سونداي-اق ساراپشى رەتىندە مەملەكەتتىك قۇرىلىم مەن الماتى قالاسى قوعامدىق كەڭەس وكىلدەرى, ءماسليحات دەپۋتاتتارى جانە بەلگىلى ساياساتتانۋشىلار مەن قوعام بەلسەندىلەرى جاستارمەن وي ءبولىستى.
قوعامدىق بىرلەستىك باسشىسى قازاقستان اجىراسۋ جاعىنان تمد ەلدەرى اراسىندا ۇشتىككە ەنىپ وتىر دەگەندى العا تارتادى. شاڭىراق كوتەرگەن جاستاردىڭ ۇشتەن ءبىر بولىگى بەس جىلدىڭ ىشىندە ايىرىلىسادى. بۇل قاۋىپتى احۋال. سوندىقتان وتباسى قۇندىلىعىن ناسيحاتتاۋ اسا ماڭىزدى.
وسى ورايدا اجىراسۋ ماسەلەلەرىن, ءتۇرلى وتباسىلىق جانجالداردى شەشۋدى ۇيرەتىپ جۇرگەن ساراپشىلاردىڭ قاتىسۋىمەن سەمينار-ترەنينگتەر ۇيىمداستىرىلدى. الماتى قالاسىنىڭ بارلىق جوعارى وقۋ ورىندارىندا «وتباسى قۇندىلىعى» اكتسياسى ءوتتى.
جاس وتباسىلارعا 150 دانا اقپاراتتىق-ادىستەمەلىك جيناق تاراتىلدى.
جوبا اياسىندا «جاس وتباسى» بايقاۋى ۇيىمداستىرىلدى.
– قاي مەكەمەنىڭ ەسىگىن اشساڭىز دا ەڭ الدىمەن جۇمىس تاجىريبەسى مەن ءوتىلىن تالاپ ەتەدى. «ال ەگەر ەشكىم جۇمىسقا الماسا, وندا ءوتىل دە, تاجىريبە دە قايدان پايدا بولماق؟» دەگەن زاڭدى سۇراق تۋىندايدى. ءبىز جۇمىس ءوتىلى جوق, تاجىريبەسى از, بىراق جۇمىس ىستەۋگە قۇلشىنىپ تۇرعان جاستارعا مۇمكىندىك سىيلاۋ ماقساتىندا ەڭبەك ءوتىلىن قاجەت ەتپەيتىن جۇمىس جارمەڭكەلەرىن ۇيىمداستىردىق, – دەيدى قوعامدىق ۇيىم جەتەكشىسى.
جارمەڭكەگە 50-دەن استام كومپانيا قاتىستى. ونىڭ ىشىندە «قازاق ەير», «ەير استانا», «اقساي نان», «ماكدونالدس», «ياندەكس تاكسي», «ەكو تاكسي», «تسين-كاز», «سۋلپاك» سىندى ءىرى كومپانيالار دا بولدى.
– جارمەڭكەدە بايقاعانىمىزداي, جۇمىس بەرۋشىلەرگە ەڭ الدىمەن جۇمىس ىزدەۋشىنىڭ جوعارى ءبىلىمى ەمەس, ومىرلىك ۇستانىمى مەن كوشباسشىلىق قاسيەتتەرى ماڭىزدى. سوندىقتان جاستارعا, جوو مەن كوللەدج تۇلەكتەرىنە ارناپ ارنايى وقىتۋ ترەنينگتەرىن ۇيىمداستىردىق. ترەنينگتەردە ەڭ الدىمەن جوعارى وقۋ ورىندارىندا وقىتىلمايتىن, الايدا جۇمىس ىزدەۋ بارىسىندا ماڭىزدى بولىپ تابىلاتىن تۇيىندەمە تولتىرۋ, كوشباسشىلىق قاسيەتتەردى وياتۋ جانە دامىتۋ, جۇمىس بەرۋشىمەن ءتىل تابىسۋ, جەكە كاسىپ اشۋ سىندى اسا ماڭىزدى دارىستەر قامتىلادى, – دەيدى د.بابامۇراتوۆ.
ايناش ەسالي,
«ەگەمەن قازاقستان»
الماتى
