حالىقارالىق ساراپشىلاردىڭ قاتىسۋىمەن وتكەن «قازاقستاندا «ەلەكتروندى ۇكىمەت» پەن مەملەكەتتىك قىزمەتتەردىڭ دامۋى» اتتى دوڭگەلەك ۇستەل وتىرىسى بارىسىندا ا.وسپانوۆ تسيفرلاندىرۋ اياسىندا جۇزەگە اسىپ جاتقان پرواكتيۆتى قىزمەت كورسەتۋدىڭ ماڭىزدىلىعىن اتاپ ءوتتى. «تمد ەلدەرى بويىنشا قازاقستان پرواكتيۆتى قىزمەتتەردى العاشقى بولىپ ەنگىزدى. بىلتىر ءبىز بالا تۋ بويىنشا مەملەكەتتىك قىزمەتتەر كەشەنىن پرواكتيۆتى تاسىلمەن ۇسىنا باستادىق. ازاماتتاردىڭ قاجەتتىلىگىن الدىن الا بولجاپ, ۋاقىتتارىن ۇنەمدەيتىن اسا قولايلى قىزمەتكە دەگەن قىزىعۋشىلىق كۇن سايىن ارتىپ كەلەدى. بۇگىنگى تاڭدا جاڭا بوسانعان 157 مىڭعا جۋىق ايەلگە SMS-ۇسىنىس جىبەرىلدى. جۋىردا الەۋمەتتىك ماسەلەلەر بويىنشا تاعى دا بىرقاتار قىزمەتتەردى پرواكتيۆتى نۇسقادا, ياعني SMS-حابارلاما ارقىلى كورسەتەتىن بولامىز», دەدى ول.
اتاپ ايتساق, جۇكتىلىككە, بالا اسىراپ الۋعا, مۇگەدەكتىكتى بەلگىلەۋگە, كوپبالالى انالارعا جاردەماقى تاعايىنداۋعا, قايتىس بولعانداردى تىركەۋگە بايلانىس-
تى مەملەكەتتىك قىزمەتتەر پرواكتيۆتى تاسىلمەن, ياعني تەلەفوننىڭ SMS-حابارلاماسى ارقىلى راسىمدەلەتىن بولادى. سونداي-اق مەملەكەتتىك كەپىلدىكتەردى تولەۋ, جىلجىمايتىن م ۇلىكتىڭ سيپاتتاماسىن وزگەرتۋ, اتقارۋشىلىق ءىس جۇرگىزۋدى قوزعاۋ جۇمىستارى جانە ءبىلىم بەرۋ سالاسىنداعى قىزمەتتەر كەشەنى دە پرواكتيۆتى نۇسقادا ۇسىنىلادى.
سونىمەن قاتار مەملەكەتتىك كورپوراتسيا باسشىسى مەملەكەتتىك قىزمەت كورسەتۋ سالاسىنداعى وزەكتى ماسەلەلەرگە دە توقتالدى. «ەلىمىزدە جاپپاي تسيفرلاندىرۋ ءۇردىسى ءجۇرىپ جاتقانىنا قاراماستان, مەمقىزمەتتەردىڭ 51 پايىزى ءالى كۇنگە دەيىن قاعاز جۇزىندە ۇسىنىلادى, ونىڭ ۇستىنە قازاقستاندىقتار قىزمەتتەردى ەلەكتروندى نۇسقادا الۋعا ايتارلىقتاي ىنتا بىلدىرمەي وتىر. سونداي-اق ءبىر قىزمەتتى الۋ ءۇشىن باسقا ءبىر قىزمەتكە جۇگىنۋ قاجەت جانە ازاماتتار 311 قىزمەت بويىنشا ءبىزدىڭ فرونت-وفيستەرگە بىرنەشە رەت كەلۋگە ءماجبۇر. بۇل ورايدا قاشىقتان قىزمەت كورسەتۋ پروتسەسى بويىنشا ءالى دە قاراپايىم جانە قاۋىپسىز مەحانيزمنىڭ جوق ەكەندىگىن ايتۋ كەرەك», دەپ وي ءتۇيدى ابىلايحان وسپانوۆ.
