«قازاقستاننىڭ ۇزدىك تاۋارى» رەسپۋبليكالىق كورمە-بايقاۋىنىڭ وبلىستىق كەزەڭىنە اتىراۋدا 40 كاسىپكەرلىك قاتىستى. «جالپى ايماقتا 56 مىڭنان استام شاعىن جانە ورتا بيزنەس سۋبەكتىسى بار, بۇل سالادا 120 مىڭ ادام جۇمىسپەن قامتىلعان, دەيدى وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى باسشىسىنىڭ ورىنباسارى گۇلزادا قايىرعاليەۆا. – وتكەن جىلى 1,7 ملرد تەڭگەنىڭ ءونىمى ءوندىرىلدى. كورسەتكىش جىل ساناپ ارتىپ كەلەدى».
قازىر كاسىپكەرلەرگە مەملەكەت تاراپىنان قولداۋ جاقسى. جەرگىلىكتى اتقارۋشى بيلىك تە بيزنەس باستايمىن دەگەندەرگە كومەك كورسەتۋدەن ايانعان ەمەس. بيىلدىڭ وزىندە 500 ملن تەڭگە شاعىن نەسيەلەۋگە ءبولىنىپ وتىر. وڭىردە كاسىپكەرلىك سالاسى نەگىزىنەن قىزمەت كورسەتۋ مەن جەڭىل ونەركاسىپكە نەگىزدەلگەن.
كورمە-بايقاۋدىڭ قورىتىندىسى بويىنشا «وندىرىستىك ماقساتتاعى ۇزدىك تاۋارلار» اتالىمىندا اتىراۋ مۇناي وڭدەۋ زاۋىتى, «كاسحيم», «نوۆوسترويپروەكت» سەرىكتەستىكتەرىنىڭ ونىمدەرى جۇلدەگەر بولدى. «حالىق تۇتىناتىن ۇزدىك تاۋارلار» اتالىمىندا «Caspiy Lana Atyrau» جشس ونىمدەرى, «ەتالون» جارناما اگەنتتىگىنىڭ سۋۆەنير بۇيىمدارى, «ورازباەۆا جك» ۇلتتىق كيىمدەرى جەڭىمپاز دەپ تانىلدى. «ۇزدىك ازىق-تۇلىك تاۋارلارى» ساناتى بويىنشا «Trans Tech International» نان ونىمدەرى, «اسىلاگرو» شۇجىقتارى جانە «اتىراۋاگروفەليكستىڭ» كوكونىس سالاتتارى ۇزدىكتەر قاتارىندا اتالدى. اتىراۋ قالالىق اكىمدىگى تاعايىنداعان «ۇزدىك الەۋمەتتىك كاسىپكەر» اتاعىن «بۋم-2020» جك يەلەنسە, «سۇلتان» شق ەشكى ءسۇتىن وڭدەۋگە باعىتتالعان جۇمىسى «ۇزدىك يننوۆاتسيالىق جوبا» رەتىندە ماراپاتتالدى.
كورمە-بايقاۋدىڭ ءۇش اتالىمى بويىنشا وبلىستا وزىپ شىققان توعىز كاسىپكەرلىك ەندى رەسپۋبليكالىق كەزەڭدە سىنعا تۇسەدى.
باقىتگۇل باباش,
«ەگەمەن قازاقستان»
اتىراۋ
