تۇركيا رەسپۋبليكاسىنىڭ پرەزيدەنتى رەجەپ ەردوعان جەكە ءوزىنىڭ جانە تۇرىك حالقىنىڭ اتىنان نۇرسۇلتان نازارباەۆتى قۇتتىقتاپ, قازاقستاننىڭ ءوسىپ-وركەندەۋ جانە دامۋ جولىنداعى جەتىستىكتەرىن اتاپ ءوتتى.
«استانا قىسقا ۋاقىت ىشىندە زاماناۋي مەگاپوليسكە اينالىپ, قازاقستان تاۋەلسىزدىگىنىڭ جانە ونىڭ دامۋ كورسەتكىشىنىڭ سيمۆولى بولعانىنا قۋانىشتىمىن. سونداي-اق ءبىز وڭىردەگى ەكونوميكالىق دامۋدىڭ ورتالىعى سانالاتىن تۇركى الەمىنىڭ ەڭ جاس ەلورداسى – استانانى كوركەيتۋگە تۇرىك كومپانيالارى, ساۋلەتشىلەرى, ينجەنەرلەرى مەن قۇرىلىسشىلارى ۇلەس قوسقانىن ماقتان تۇتامىز», دەلىنگەن جەدەلحاتتا.
* * *
فرانتسيا رەسپۋبليكاسىنىڭ پرەزيدەنتى ەممانيۋەل ماكرون ەكى ەل اراسىنداعى ستراتەگيالىق سەرىكتەستىكتىڭ ناتيجەلەرىنە جانە ونى ءارى قاراي نىعايتۋ پەرسپەكتيۆالارىنا نازار اۋداردى.
«ستراتەگيالىق سەرىكتەستىگىمىزدىڭ ون جىلدىعى ورتاق جەتىستىكتەرىمىزدىڭ قورىتىندىسىن جاساۋعا جانە بولاشاقتى باعامداۋعا مۇمكىندىك بەرەدى. مەن سەرىكتەستىگىمىزدىڭ ۇزاق مەرزىمدى سيپاتقا يە بولعانىن قالايمىن.
فرانتسيا قازاقستاننىڭ ەكونوميكانى ارتاراپتاندىرۋعا, سونىڭ ىشىندە جاڭارتىلاتىن ەنەرگيا كوزدەرىن, قالا شارۋاشىلىعىن, تسيفرلاندىرۋ سالاسىن جانە اگروونەركاسىپ كەشەنىن دامىتۋعا باعىتتالعان ۇمتىلىسىن قولدايتىنىنا سەنىم بىلدىرەمىن», – دەپ اتاپ وتكەن فرانتسيا رەسپۋبليكاسىنىڭ پرەزيدەنتى.
* * *
يوردانيا كورولى II ابداللا نۇرسۇلتان نازارباەۆتى ەلوردانىڭ 20 جىلدىعىمەن جانە تۋعان كۇنىمەن قۇتتىقتاپ, مەملەكەت باسشىسى مەن بارشا قازاقستان حالقىنا تابىس, باق-بەرەكە جانە اماندىق تىلەدى.
«بۇكىل يوردانيا حاشيميتتىك كورولدىگىنىڭ اتىنان قازاقستان مەن ونىڭ ەلورداسىنىڭ ودان ءارى ءوسىپ-وركەندەي بەرۋىنە تىلەكتەستىك بىلدىرەمىن.
ءسىزدىڭ دانا باسشىلىعىڭىزبەن قازاقستان جاھاندىق قاۋىپسىزدىك پەن تۇراقتىلىقتى ورناتۋعا باعىتتالعان قىزمەتىن جالعاستىرىپ, ءوزىنىڭ دامۋ جولىندا ايتارلىقتاي جەتىستىكتەرگە جەتە بەرەدى دەپ سەنەمىن», دەلىنگەن جەدەلحاتتا.
* * *
ليۋكسەمبۋرگ پرەمەر-ءمينيسترى كساۆە بەتتەل ليۋكسەمبۋرگ ۇكىمەتى مەن جەكە ءوزىنىڭ اتىنان مەملەكەت باسشىسىن قازاقستاننىڭ جاڭا ەلورداسى – استانانىڭ 20 جىلدىق مەرەيتويىمەن قۇتتىقتادى.
«2015-2017 جىلدارى قازاقستانعا بارعان ساپارلارىم ءاردايىم جادىمدا ساقتالادى. ءبىزدىڭ استاناداعى كەزدەسۋلەرىمىز ليۋكسەمبۋرگ پەن قازاقستان ىنتىماقتاستىعىنىڭ ماڭىزدى كەزەڭى بولدى ءارى حالىقتارىمىزدىڭ ءوزارا دوستىعى مەن سەنىمىنە نەگىزدەلگەن ەكىجاقتى قارىم-قاتىناستارىمىزدى نىعايتۋعا سەپتىگىن تيگىزدى», دەلىنگەن جەدەلحاتتا.
* * *
وزدەرىنىڭ جىلى لەبىزگە تولى قۇتتىقتاۋلارى مەن قازاقستاننىڭ ءوسىپ-وركەندەۋ جولىندا تابىسقا جەتە بەرۋىنە تىلەكتەستىك بىلدىرگەن جەدەلحاتتارىن موناكو كنيازى II البەر جانە باحرەين كورولى حاماد يبن يسا ءال-حاليفا دا جولدادى.
