بيىل الماتى وبلىسىندا 500 مىڭ گەكتارعا جۋىق القاپقا ءداندى داقىلدار سەبىلگەن ەكەن. ونىڭ 84,8 مىڭ گەكتارى ەگىنگە وراق سالعان كەربۇلاقتىق ديقاندارعا تيەسلى. ەگىستىك القاپتارىنا نەگىزىنەن بيداي مەن قارابيداي ەگىلگەن. العاشقى ءتورت كۇنگى جيىن-تەرىننىڭ تۇسىمىنە قاراپ جاسالعان بولجام بويىنشا ناتيجە جامان ەمەس سياقتى. شارۋالار وتكەن 4 كۇن ىشىندە 1000 گەكتاردىڭ بيدايىن شاۋىپ, جيناپ ۇلگەردى.
قازىر كەربۇلاقتان باستالعان وراق ناۋقانىنا وبلىستىڭ جامبىل, ىلە, قاراتال اۋداندارى مەن قاپشاعاي قالاسى دا ءبىر دەممەن قوسىلدى. باستىسى, بيىلعى جيىن-تەرىن ناۋقانى مەرزىمىنەن كەشىكپەي باستالدى. ەندىگى مىندەت ورىلعان ءداندى قامباعا جيناپ, يگىلىككە جاراتۋ بولىپ تۇر.
ايتپاقشى, وتكەن جىلى وڭىردە 1 339,6 مىڭ توننا ءداندى داقىل جينالسا, بيىل جەتىسۋلىق شارۋالار بۇل كورسەتكىشتى ارتتىرىپ, 1345,6 مىڭ توننا ءدان باستىرۋدى جوسپارلاپ وتىر. بۇعان تولىق نەگىز بار. ويتكەنى, الماتى وبلىسىندا پايدالانىلماي جاتقان القاپتاردى اۋىل شارۋاشىلىعى ماقساتىنا قايتا قوسۋ باعدارلاماسى نەگىزىندە ايتارلىقتاي جۇمىس جۇرگىزىلۋدە.
وسىدان از ۋاقىت بۇرىن يرريگاتسيالىق جۇيەلەردىڭ ەسكىرۋىنە بايلانىستى 127 مىڭ گەكتار ەگىستىك القاپتىڭ جارامسىز بولىپ, ارامشوپكە تۇنىپ جاتقانى جايىل ءجيى سىن ايتىلاتىن. بيىلدان باستاپ وسى القاپتار رەتىمەن يگەرىلىپ جاتىر. سۋارمالى القاپتارداعى ارىقتار مەن باسقا دا يرريگاتسيالىق جۇيەلەر قالپىنا كەلتىرىلۋدە. ياعني, توپىراعى قۇنارلى وڭىردەگى 127 مىڭ گەكتار القاپ اينالىمعا قايتا قوسىلىپ, ءونىم بەرە باستايدى. بۇل ءوڭىر ديقاندارى ءۇشىن دە, اگرارلىق سالانىڭ ىلگەرلەۋى ءۇشىن جاعىمدى جاڭالىق بولدى. – ديقاندار ءۇشىن جاقسى جاڭالىق. يرريگاتسيالىق جۇيەلەردى جاڭارتۋعا ارنالعان اۋقىمدى جوبانى ءبىرىنشى بولىپ ەسكەلدى اۋدانى قولعا العان بولاتىن. جوبا تولىق اياقتالعاننا كەيىن اۋدانداعى 4262 گەكتار سۋارمالى جەردەن ءونىم الۋعا مۇمكىندىك تۋادى. اۋدانداعى يرريگاتسيالىق جۇيەلەردى جاڭارتۋعا 1,5 ميلليارد تەڭگە شاماسىندا قارجى بولىنگەن ەكەن.
جالپى, 2020 جىلعا دەيىن الماتى وبلىسىنىڭ اگرارلى ايماعى دەپ سانالاتىن كوكسۋ, ەسكەلدى, اقسۋ جانە الاكول اۋداندارىندا 35 مىڭ گەكتار سۋارمالى جەر پايدالاۋعا بەرىلمەكشى. بۇل جەتىسۋ ءوڭىرىنىڭ اۋىل شارۋاشىلىعى سالاسىنداعى ورىنىن نىقتاپ, ءونىم الۋداعى ۇلەسىن ارتتىرماق. قازىر الماتى وبلىسىنىڭ اۋىل شارۋاشىلىعى بويىنشا ۇلەسى 17 پايىزدى قۇرايدى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
