زامزاگۇل ءشارىپوۆا 1931 جىلى الماتى وبلىسى جامبىل اۋدانى حح پارتسەزد اۋىلىندا دۇنيەگە كەلگەن. 1947 جىلى الماتىنىڭ جوعارعى كينواكتەرلەر مەكتەبىن ءبىتىرىپ, «قازاقفيلم» كينوستۋدياسىندا جانە قازاق راديوسىندا قىزمەت ەتكەن. 1953 جىلى م.اۋەزوۆ تەاترىنىڭ اكتەرلىك قۇرامىنا قابىلدانىپ, سول ۋاقىتتان بەرى ءۇزىلىسسىز وسى تەاتردا قىزمەت ەتىپ, اكتەرلىك دياپازونى كەڭ اكتريسا ۇلتتىق دراماتۋرگيا بەن دۇنيەجۇزىلىك كلاسسيكادان سان قىرلى 100-دەن اسا بەينە سومداعان.
زامزاگۇل نۇسىپبايقىزى ۇلتتىق كلاسسيكا مەن زاماناۋي دراماتۋرگيادا - م.اۋەزوۆتىڭ «ايمان-شولپانىندا» ايمان, «قاراگوزىندە» قاراگوز, ع.مۇسىرەپوۆتىڭ «اقىن تراگەدياسىندا» اقتوقتى, ق.مۇحامەدجانوۆتىڭ «جات ەلدە» دراماسىندا ەۆا براۋن, ءا. تاجىباەۆتىڭ «كوڭىلدەستەرىندە» دامەش, ق. بايسەيىتوۆ پەن ق. شاڭعىتباەۆتىڭ «بەۋ, قىزدار-اي!», «وي, جىگىتتەر-اي!» كومەديالارىندا نۇرسۇلۋ, س. ءجۇنىسوۆتىڭ «اجار مەن اجالىندا» اجار, د. يسابەكوۆتىڭ «اپكەسىندە» قاماجاي, ا.بەكبوسىننىڭ «سوڭعى سەزىمىندە» انا, ف. بۋلياكوۆتىڭ «وتىز ۇلىڭ بولعانشا...» كومەدياسىندا ءساليمانىڭ رولدەرىن ويناعان. الەمدىك كلاسسيكا مەن زاماناۋي دراماتۋرگيادا - شەكسپيردىڭ «وتەللوسىندا» دەزدەمونا, «ريچارد ش»-دە كورولەۆا, گوركيدىڭ «كۇننەن تۋعاندارىندا» ەلەنا, ۆ. دەلماردىڭ «وكىنىشتى ومىرىندە» انيتا, ل. ءزوريننىڭ «ۆارشاۆا اۋەندەرىندە» گەلەنا, م. مەتەرلينكتىڭ «سوقىرلارىندا» سوقىر ايەل, تاعى دا باسقا كوپتەگەن رولدەردى ورىنداعان. زامزاگۇل ءشارىپوۆا جاساعان سان قيلى ساحنالىق بەينەلەردىڭ ىشىندە ەرەكشە تۇلعالانعانى
م.اۋەزوۆتىڭ «قاراگوز» تراگەدياسىنداعى قاراگوز بەينەسى. بۇل بەينە اكتريسا شىعارماشىلىعىنىڭ ەڭ جارقىن كەزەڭى بولىپ, ونىڭ تالانتىنىڭ ليريكا-درامالىق قىرىن مەيلىنشە اشتى. تراگەديالىق اكتريسا رەتىندە دە مۇمكىندىگى مول ەكەنىن تانىتقان رولدەرىنىڭ ىشىندە ەرەكشەسى س.ءجۇنىسوۆتىڭ «اجار مەن اجالىنداعى» اجار بولدى. قازاق ونەرىنىڭ ۇلكەن تۇلعاسى زامزاگۇل نۇسىپبايقىزى - كوركەمسوز وقۋدىڭ ۇلكەن شەبەرى. ول ۇلتتىق كلاسسيكادان راديو مەن تەلەديداردا كوپتەگەن شىعارما جازدىردى. مىسالى, س.سەيفۋلليننىڭ «اققۋ ءانى», م.اۋەزوۆتىڭ «اباي جولى» رومانىنان ۇزىندىلەر قازاق راديوسىنىڭ التىن قورىنا ەندى. ال ونىڭ «اققۋدىڭ ايىرىلۋى» مونوسپەكتاكلىن وسى جانرداعى ەرەكشە تابىسى دەۋگە بولادى. اكتريسانىڭ بالالارعا بازارلىعى - كەشكى ەرتەگىلەرى قازاق راديوسىنىڭ التىن قورىندا جازۋلى. ز.ءشارىپوۆا كينواكتريسا رەتىندە دە تانىمال. ول رەجيسسەر ش.ايمانوۆتىڭ «دالا قىزىندا» نۇرجامال, ء«بىز وسىندا تۇرامىزىندا» دينا, رەجيسسەر ق.ابۋسەيىتوۆتىڭ ء«ومىر جولىندا» حاديشا, ب. ءشارىپتىڭ «زاماناي مەن امانايىندا» انا, تاعى دا باسقا ءبىرتالاي كينوفيلمگە, سونداي-اق رەجيسسەر ءا. مامبەتوۆتىڭ «اباي» تەلەفيلمىنە تۇسكەن.
ۇلتتىق ونەرگە سىڭىرگەن ەرەكشە ەڭبەگى ءۇشىن ز.شارىپوۆاعا قازاق كسر ەڭبەك سىڭىرگەن ءارتىسى (1959), قازاق كسر حالىق ءارتىسى (1966) قۇرمەتتى اتاقتارى بەرىلدى. «قۇرمەت بەلگىسى» (1959), «حالىقتار دوستىعى» (1981) جانە تاۋەلسىز قازاقستاننىڭ «وتان» (2005) وردەندەرىمەن, سونداي-اق بىرنەشە دۇركىن قازاق كسر جوعارعى كەڭەسىنىڭ قۇرمەت گراموتاسىمەن ماراپاتتالعان.
مارقۇممەن قوشتاسۋ ءراسىمى شىلدەنىڭ 16-سى كۇنى ساعات 10:00-دە مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا وتەدى.
