– بۇل باعدارلاما ەلىمىزدە 4 شىلدەدەن باستاپ جۇزەگە اسىرىلا باستادى. العاشقى كۇننەن-اق استانا, الماتى, اقتاۋ, وسكەمەن جانە ورال قالالارىنداعى «تسەنتركرەديت» بانكى فيليالدارى ارقىلى بىرنەشە ادام تۇرعىن ۇيگە قول جەتكىزدى. ءبىزدىڭ بانككە العاشقى بولىپ كەلگەن تۇرعىن اتالعان باعدارلاما بويىنشا كولەمى 62 شارشى مەتردى قۇرايتىن, ەكى بولمەلى پاتەردى راسىمدەدى. ول «كاز-حول» جشس قۇرىلىس كومپانياسى سالعان تۇرعىن ءۇيدى تاڭدادى. ول 20 پايىزدى قۇرايتىن العاشقى جارنانى تولەپ, نەسيەنى 15 جىلعا راسىمدەدى. اي سايىنعى تولەم 70 مىڭ تەڭگە شاماسىن قۇرادى. جالپى, باعدارلاما ىسكە قوسىلعالى بەرى قىزىعۋشىلىق تانىتقان 25 ادامعا باعدارلاما تۋرالى كەڭەس بەرىلدى. ءۇش تۇرعىن نەسيە الۋعا تاپسىرىس بەرگەن بولسا, ولاردىڭ ەكەۋى بۇگىندە ماقۇلداندى, – دەدى «تسەنتركرەديت» بانكى فيليالىنىڭ وكىلى ايدا يپاتوۆا.
ورال قالاسىندا باتىس قازاقستان وبلىس اكىمىنىڭ ورىنباسارى باعدات ازباەۆتىڭ توراعالىعىمەن وتكەن جيىندا ەلىمىزدەگى «7-20-25» باعدارلاماسىن وڭىردە ىسكە اسىرۋدىڭ جاي-كۇيى تالقىلاندى.
باسقوسۋدا قر ۇلتتىق بانكىنىڭ باتىس قازاقستان وبلىستىق فيليالى ديرەكتورى قوزىباق قۇلباراقوۆ باعدارلاما تالاپتارىنا توقتالىپ, مەنشىگىندە باسپاناسى جانە باسقا دا يپوتەكالىق قارىزدارى جوق قازاقستاننىڭ ءاربىر ازاماتى قاتىسا بۇل باعدارلاماعا قاتىسا الاتىنىن ايتتى. باعدارلاما قاتىسۋشىسىنىڭ كاسىپكەرلىك نەمەسە ەڭبەك قىزمەتىنەن تۇراقتى راستالعان كىرىسى بولۋعا ءتيىس. قازىرگى تاڭدا ء«اربىر وتباسىنا باسپانا الۋدىڭ جاڭا مۇمكىندىكتەرىن بەرۋ» باستاماسىن ىسكە اسىرۋ شەڭبەرىندە «7-20-25» جاڭا يپوتەكالىق باعدارلاماسىنىڭ وپەراتورى بولىپ تابىلاتىن «باسپانا» ارنايى ۇيىمى «تسەنتر كرەديت» بانكىمەن, «حالىق», «ەۋرازيا», «تسەسنا», «اتف», «ربك» بانكتەرىمەن جانە «تۇرعىن ءۇي قۇرىلىس جيناق بانكىمەن» كەلىسىمگە قول قويعان. ەندى «سبەربانك» پەن «فورتە بانك» تە باعدارلاماعا قىزىعۋشىلىق تانىتىپ, تەحنيكالىق جۇمىستاردى اياقتالعان سوڭ «7-20-25» يپوتەكالىق باعدارلاماسى جونىندەگى كەلىسىمگە قول قويۋعا دايىن كورىنەدى.
«7-20-25» يپوتەكالىق باعدارلاماسى بويىنشا پاتەر الۋ ءۇشىن مىناداي قۇجاتتار كەرەك: ەڭبەك نەمەسە كاسىپكەرلىك قىزمەتتەن كىرىسى بار ەكەنىن راستايتىن قۇجات, يپوتەكالىق تۇرعىن ءۇي قارىزدارى بويىنشا وتەلمەگەن بەرەشەگى جوقتىعىن دالەلدەيتىن انىقتاما, تۇرعىن ءۇيى جوقتىعى تۋرالى انىقتاما, ساتىپ الاتىن تۇرعىن ءۇي قۇجاتتارى جانە تاۋەلسىز باعالاۋشىنىڭ باعاسى ۇسىنىلۋى ءتيىس.
– اتالعان باعدارلامانى ىسكە اسىرۋ ماقساتىندا قر ۇلتتىق بانكى بقو فيليالى شىلدە ايىنىڭ باسىنان بەرى ەكىنشى دەڭگەيدەگى بانك فيليالدارى وكىلدەرىمەن ءماجىلىس وتكىزدى. وبلىس تۇرعىندارىنا جاڭا باعدارلاما جونىندە اقپارات بەرۋ ماقساتىندا جەرگىلىكتى بۇقارالىق اقپارات قۇرالدارىنا اقپارات تاراتىلىپ, ءتۇرلى مەكەمەلەردە لەكتسيالار وقىلىپ, تۇسىندىرمە جۇمىستارىن جۇرگىزۋدە. حالىقتى اقپاراتپەن قامتۋ كولەمىن كەڭەيتۋ ءۇشىن ۇلتتىق بانك فيليالى تاراپىنان باعدارلاما تۋرالى مالىمەتتەردى وبلىستىق ىشكى ساياسات باسقارماسىنىڭ جەرگىلىكتى تەلەارنا, راديو جانە باسپا قۇرالدارىنا ورنالاستىرۋدى مەملەكەتتىك تاپسىرىس شەڭبەرىندە جۇزەگە اسىرۋ مۇمكىندىگىن قاراستىرۋىن سۇرايمىز, – دەيدى قوزىباق ءابۋ ۇلى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
سۋرەتتى تۇسىرگەن ايباتىر نۇراش
