بۇقارالىق شارا قاراعاندى قالاسىنىڭ «شاحتەر» ستاديونىندا ءوتتى. 2,5 شاقىرىمعا سوزىلعان پرەزيدەنتتىك جۇگىرۋگە «شاحتەر» كلۋبىنىڭ اتقارۋشى ديرەكتورى الىبەك ورازعاليەۆ, ديرەكتوردىڭ ورىنباسارى نۇرعازى جارىلعاپوۆ, سپورت ديرەكتورى مۇرات تىلەشەۆ, باس باپكەردىڭ مىندەتىن اتقارۋشى اندرەي فينونچەنكو, قاقپاشىلاردىڭ جاتتىقتىرۋشىسى ۆالەري سيتالو, «شاحتەر-بولات», «شاحتەر-م», «شاحتەر-قارگۋ» كوماندالارىنىڭ ويىنشىلارى, «شاحتەر» فۋتبول ورتالىعىنىڭ جاتتىقتىرۋشىلارى مەن تاربيەلەنۋشىلەرى, قاراعاندى وبلىستىق فۋتبول قاۋىمداستىعىنىڭ تورەشىلەرى قاتىستى.
- قازاقستان فۋتبول فەدەراتسياسى باستاعان اكتسيانى قاراعاندى ءوڭىرى قولداپ وتىر. ءدال وسىنداي شارالار ەل فۋتبولىنىڭ جاناشىرلارىنىڭ باسىن بىرىكتىرەدى. وتاندىق كلۋبتار ەۋروكۋبوك ماۋسىمىن ءساتتى باستادى. «استانا», «قايرات», «توبىل» كوماندالارى جەڭىسكە جەتىپ, «ەرتىس» تەڭ وينادى. وسى جۇرىستەن جاڭىلماي, جەڭىس جولىن جالعاستىرادى دەپ سەنەمىز. حالىقارالىق ارەنادا ەل نامىسىن قورعايتىن كوماندالارعا بارشامىز قولداۋ كورسەتۋىمىز كەرەك. سول سەبەپتى وسى شارانى ءارى قاراي جالعاستىرۋ ءۇشىن سىر وڭىرىنەن «قايسار» فۋتبول كلۋبىنىڭ ۇجىمىن شاقىرامىن! ۇلت دەنساۋلىعى – ەل بايلىعى! العا, قازاقستان! العا, فۋتبول, - دەدى «شاحتەر» كلۋبىنىڭ اتقارۋشى ديرەكتورى الىبەك ورازعاليەۆ.
