اسكەري-تەڭىز كۇشتەرىنىڭ بەلسەندى جاڭارۋ جانە قايتا جابدىقتاۋ ۇدەرىسىن ەسكەرە وتىرىپ, كۋرسانتتارعا «الاتاۋ» مينا-تارتقىش كورابلى مەن «جايىق» گيدروگرافيالىق كەمەسىندە تاڭداپ العان ماماندىقتارى بويىنشا تاجىريبەلىك داعدىلارىن مەڭگەرۋ مۇمكىندىگى بەرىلگەن. كۋرسانتتار ەكى اي بويى اسكەري كافەدرادا العان بىلىمدەرىن ءىس جۇزىندە قولدانۋعا داعدىلانىپ, كاسىبي تاجىريبە باعدارلاماسى تولىق كولەمدە ورىندالعان سوڭ عانا وزدەرىنىڭ وقۋ ورىندارىنا قايتا ورالدى.
قورعانىس مينيسترلىگىنىڭ رەسمي اقپاراتتارىنا سۇيەنسەك, اسكەري تەڭىز كۇشتەرى قولباسشىلىعى الداعى ۋاقىتتا دا تەحنيكا مەن قارۋ-جاراقتىڭ جاڭا ۇلگىلەرىن پايدالاناتىن ماماندارعا قويىلاتىن تالاپتارعا جاۋىنگەرلىك كورابلدەردە اسكەري-تەڭىز ءبىلىم بەرۋ مەكەمەلەرى وقۋشىلارىنىڭ تاجىريبەدەن ءوتۋىن ءارى قاراي جانداندىرۋدى جوسپارلاۋدا.
جالپى قارۋلى كۇشتەردە العاش رەت اسكەري-عىلىمي ۆزۆود قۇرامىندا مەرزىمدى اسكەري قىزمەت وتكەرۋ ءۇشىن جاستاردى شاقىرۋ تاجىريبەسى باستالعانىن دا ايتا كەتۋ كەرەك. قورعانىس مينيسترلىگىنىڭ شەشىمىمەن جاڭادان قۇرىلاتىن اسكەري-عىلىمي ۆزۆود قۇرامىندا بەلگىلى ءبىر بىلىكتىلىگى بار ديپلومدى شاقىرىلۋشىلاردى پايدالانۋ ءتارتىبى بەكىتىلىپ, ونى ىسكە اسىرۋ تەتىكتەرى پىسىقتالعان.
قازىرگى ۋاقىتتا شاقىرىلعان جاستار 68665 اسكەري ءبولىمىنىڭ بازاسىندا جيناقتالۋدا. ولاردى ىرىكتەۋدە روبوت تەحنيكاسى, اقپاراتتىق تەحنولوگيالار مەن كيبەرقاۋىپسىزدىك سالاسىنداعى بىلىكتىلىكتەرى ەسكەرىلگەن.
اسكەري-عىلىمي ۆزۆود قازاقتان رەسپۋبليكاسىنىڭ تۇڭعىش پرەزيدەنتى – ەلباسى اتىنداعى ۇلتتىق قورعانىس ۋنيۆەرسيتەتى اسكەري-عىلىمي زەرتتەۋ ورتالىعىنىڭ قۇرامىندا اسكەري باسقارۋ ورگاندارى مۇددەسىندە قولدانبالى جانە ىرگەلى زەرتتەۋلەر سالاسىنداعى پەرسپەكتيۆالىق عىلىمي-زەرتتەۋ, تاجىريبەلى-قۇراستىرۋ جانە سىناما جۇمىستارىن ورىنداۋ ماقساتىندا قۇرىلعان.
سەرىك ابدىبەك,
«ەگەمەن قازاقستان»
