«دەنساۋلىق كەپىلى – بۋد زدوروۆ! – Be healthy!» ۇرانىمەن وتكەن شارا بارىسىندا فلەشموب, شاتىر استىنداعى «دەنساۋلىق قالاشىعىنىڭ» جۇمىسى, شۇعىل جاردەم داعدىلارىنا ۇيرەتۋ سياقتى باعدارلامالار جۇزەگە استى. سونىمەن قاتار اكتسيا اياسىندا ونكولوگ, كارديولوگ, فتيزياتر, رەنتگەن-لابورانت, ەندوكرينولوگ, پەدياتر مامانداردان قۇرالعان ءموبيلدى مەديتسينالىق بريگادالار جۇمىس ىستەدى. بەيىندى ماماندار تۇرعىندارعا كونسۋلتاتيۆتىك-دياگنوستيكالىق كومەك كورسەتتى.
ءوز سوزىندە قوعامدىق دەنساۋلىق ساقتاۋ ۇلتتىق ورتالىعىنىڭ باس ديرەكتورى ءۋاليحان احمەتوۆ ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى جاڭا مۇمكىندىكتەر» اتتى جولداۋىندا سالاماتتى ءومىر سالتىن ناسيحاتتاي وتىرىپ, قوعامدىق دەنساۋلىقتى باسقارۋ ءىسىن كۇشەيتۋ قاجەتتىگىنە نازار اۋدارعانىن اتاپ ءوتتى. «جولداۋدى ىسكە اسىرۋ ماقساتىندا دەنساۋلىق ساقتاۋ مينيسترلىگى حالىقتى سالاماتتى ءومىر سالتى قاعيداتتارى تۋرالى اقپاراتتاندىرۋعا باعىتتالعان قوعامدىق دەنساۋلىقتى نىعايتۋ جونىندە جوسپار ازىرلەدى», دەدى ول. سونداي-اق مەملەكەت باسشىسى قازاقستاندىقتاردى سپورتپەن شۇعىلدانۋعا شاقىرعانىن جانە «Challenge, سەن باسقاسىڭ!» سپورتتىق باستاماسىن قولداعانىن ايتتى. «بۇگىن ءبىز «سالاماتتىلىق ادەتتەرى» مارافونىن باستاپ وتىرمىز. قاراپايىم ءىس-ارەكەتتەر ءار ادامعا اۋرۋدىڭ الدىن الۋعا جانە ءومىر ءسۇرۋ ساپاسىن ارتتىرۋعا مۇمكىندىك بەرەدى. باس قالامىزدىڭ 20 جىلدىعى اياسىنداعى ەستافەتانى ەلىمىزدىڭ باسقا دا وڭىرلەرى جالعاستىرماقشى», دەدى ورتالىق باسشىسى.
سونداي-اق «سالاماتتىلىق ادەتتەرى» مارافونىندا داستارقاننان تۇز سولونكاسىن الىپ تاستاۋ, تاۋلىگىنە 2 ليتر سۋ ءىشۋ, كۇندەلىكتى 10 مىڭ قادام ءجۇرۋ سياقتى ۇسىنىستار ايتىلدى. قوعامدىق دەنساۋلىق ساقتاۋ ۇلتتىق ورتالىعىنىڭ, باس قالانىڭ, الماتى اۋدانىنىڭ, دەنساۋلىق ساقتاۋ باسقارماسى باسشىلىعىنىڭ وزدەرى دە ۇلگى-ونەگە بولىپ, ساۋ ادەتتەردىڭ جولىن نۇسقاپ, مانەكەن ارقىلى جۇرەك-وكپەنى رەانيماتسيالاۋ كەزىندە شۇعىل كومەك كورسەتۋ داعدىلارىن كورسەتتى.
مارافونعا قاتىسۋشىلار دوستارىن, تۋعان-تۋىسقاندارىن, ارىپتەستەرىن, تانىستارىن ءوزىنىڭ تاڭداۋى بويىنشا فاستفۋدتان, گازدى سۋسىنداردان, ءتاتتى تاعامداردان باس تارتۋعا, جەمىس-جيدەكتەر تاڭداۋعا, سونداي-اق 100 رەت سەرگىتۋ جاتتىعۋلارىن جاساۋعا جانە ەستافەتانى ءارى قاراي «ال ءسىزدىڭ قولىڭىزدان كەلە مە؟» ۇرانىمەن جالعاستىرۋعا شاقىردى. مارافون بۇكىل ەلىمىزدە «دەنساۋلىق جولى» اياسىندا وتەدى.
ميراس اسان,
«ەگەمەن قازاقستان»
