جيىن بارىسىندا تاراپتار سالادا ەنگىزىلگەن جاڭاشىلدىقتاردى تالقىلاپ, تاجىريبە الماسۋ بارىسىن تىلگە تيەك ەتتى. باسقوسۋ بارىسىندا الەمدىك مەديانىڭ دامۋ بارىسى دا ءسوز بولدى. «قازمەديا ورتالىعى» باس ديرەكتورىنىڭ ستراتەگيالىق دامۋ جانە حالىقارالىق ىنتىماقتاستىق جونىندەگى ورىنباسارى ەرلىك قاراجان جۇرگىزگەن جيىنعا «حابار» اگەنتتىگى» اق باسقارما توراعاسى الان اجىباەۆ, AIR India باس ديرەكتورى فاياز شەحريار, COPEAM باس حاتشىسى كلاۋديو كاپپون قاتىستى.
جيىن بارىسىندا رۋمىنيا راديوسىنىڭ سالەمدەسۋ ءسوزى مەن قازاقستان رەسپۋبليكاسى اقپارات جانە كوممۋنيكاتسيالار ءمينيسترى داۋرەن اباەۆتىڭ قۇتتىقتاۋ ءسوزى وقىلدى.
«مەن ەڭ الدىمەن وسىنداي ماڭىزدى شاراعا قاتىسۋشى رەتىندە كەلگەنىمە قۋانىشتىمىن. بۇل كونفەرەنتسيا مەديا سالاسىنىڭ كوپ ماسەلەلەرى بويىنشا ەۋروپا مەن ازيا اراسىندا ديالوگ ورناتادى. مۇنداي جيىن حالىقارالىق جانە ۇلتتىق تەلەراديو حابارىن تاراتۋشىلاردى, قاۋىمداستىقتاردى, جەكە مەديا كومپانيالاردى, سونىمەن قاتار ەۋروپا مەن ازيانىڭ جەتەكشى مەديا مەنەدجەرلەرىنىڭ باسىن قوسىپ, ءوزارا تاجىريبە الماسۋدىڭ تاپتىرماس الاڭى دەۋگە بولادى. ءبىزدىڭ ۇيىم اقپارات تاراتۋ سالاسىنان بولەك, جاس جۋرناليستەردى ماماندىققا باۋلۋ, ولارعا ترەنينگ تۇرىندە تاجىريبە بەرۋ جۇمىستارىمەن دە تۇراقتى تۇردە اينالىسىپ كەلەدى. جۇمىسىمىزدى نەگىزگى ەكى باعىتقا ءبولىپ قاراستىرۋعا بولادى. ولار, ەڭ ءبىرىنشى ۇيىمنىڭ بىلىكتى مۇشەلەرىنىڭ باسىن قوسىپ, اقپارات كەڭىستىگىندەگى جاڭاشىلدىقتاردى جيناقتاۋ. ەكىنشىسى, ءوزىمىزدىڭ بىلگەنىمىزدى ءارتۇرلى جوعارى وقۋ ورىندارىنان قۇرالعان ستۋدەنتتەرمەن ءبولىسۋ. وسى ورايدا ءتۇرلى شارالار مەن فەستيۆالدار ۇيىمداستىردىق. سونىمەن قاتار راديو مەن تەلەارنالاردان بولەك بىزدە 3 راديوجۋرنال جۇمىس جاسايدى. ارقايسىنىڭ الار ورنى ايرىقشا», دەدى COPEAM باس حاتشىسى كلاۋديو كاپپون.
بۇل جيىن «مەديا ديالوگ: ورتالىق ازياعا نازار اۋدارۋ» تاقىرىبىمەن ءوربىدى. سونداي-اق بەدەلدى سپيكەرلەر باس قوسقان اۋقىمدى شارادا جالعان اقپارات تاراتۋشىلارمەن كۇرەس ماسەلەسى دە كەڭىنەن تالقىلانىپ, ودان قورعانۋ جولدارى دا كوتەرىلدى. رەسمي راستالماعان اقپارات تاراتۋ زاڭمەن قۋدالاناتىنى بەلگىلى. مۇنداي جالعان جاڭالىقتار تەك قازاقستاننىڭ عانا ەمەس, بۇگىنگى تاڭدا الەم ەلدەرىنىڭ دە باسا نازار اۋداراتىن ماسەلەسى بولىپ وتىر. وسى ورايدا ءداستۇرلى ەمەس باق وكىلدەرىنە يلاناتىن اۋديتوريانىڭ اۋقىمى كەڭەيىپ كەلە جاتقانىن شاراعا قاتىسۋشىلار تىلگە تيەك ەتتى.
«شىعىس پەن باتىس ەلدەرى اراسىندا اقپارات تاراتۋ كەزىندە بولىنۋشىلىك بايقالادى. ياعني باتىستىڭ باستى اقپارات ارنالارى شىعىستا بولىپ جاتقان وقيعالاردى حالىققا وبەكتيۆتى تۇردە جەتكىزبەيدى. سوندىقتان قوس قۇرلىق اراسىندا وسىنداي ديالوگتىڭ بولعاندىعى دۇرىس», دەيدى AIR India باس ديرەكتورى فاياز شەحريار.
ال «فرانتس مەديامۋن» كومپانياسىنىڭ حالىقارالىق قاتىناستارى بويىنشا ديرەكتورى دجون ماكۋايەر ارىپتەسىنىڭ پىكىرىن قۇپتاپ, بۇل پروبلەمانىڭ تۋىنداۋىنا مەديا نارىقتىڭ جەكەشەلەندىرىلۋى دە اسەر ەتۋى مۇمكىن ەكەنىن تىلگە تيەك ەتىپ, وسى رەتتە بىرىگىپ جۇمىس ىستەپ, اقپارات قۇرالدارىنىڭ مارتەبەسىن ودان ءارى كوتەرۋ كەرەكتىگىن جەتكىزدى. شارا بارىسىندا ءسوز العان «حابار» اەنتتىگى» اق باسقارما توراعاسى الان اجىباەۆ اگەنتتىك قۇرامىنداعى ارنالاردىڭ جۇمىس جۇيەسىمەن تانىستىرىپ, اتقارىلىپ جاتقان شارۋالاردى تىلگە تيەك ەتتى. بۇدان بولەك كونفەرەنتسيانىڭ باسقا سەسسيالارىندا ءارتۇرلى ماڭىزدى ماسەلەلەر كوتەرىلدى.
راۋان قايدار,
«ەگەمەن قازاقستان»
