ۇشەۋىنىڭ دە ارتىندا نارەستەلەرى, تۋعان-تۋىستارى زار ەڭىرەپ قالدى. قايعىلى وقيعادان كەيىن مەكەمەنىڭ بوساندىرۋ ءبولىمىنىڭ جۇمىسى ۋاقىتشا توقتاتىلىپ, 9 شىلدەدەن باستاپ قانا قايتا شتاتتىق رەجىمگە كوشتى. بۇگىندە ورتالىقتاعى جاعداي تۇراقتالعانىمەن, وسى ءۇش جاعدايعا بايلانىستى ورتالىقتا قىزمەتتىك تەكسەرىس ءجۇرىپ جاتىر. شەتىن وقيعانىڭ سەبەبى ءالى دە ناقتى انىقتالعان جوق.
وسى وقيعاعا وراي قالالىق دەنساۋلىق ساقتاۋ باسقارماسىنىڭ باسشىسى كامالجان كادىروۆ ءۇش جاعداي بويىنشا دا جەتەكشى مامانداردىڭ قاتىسۋىمەن تاۋەلسىز كوميسسيا جۇمىس جاسايتىندىعىن جەتكىزدى. سونداي-اق ول حالىقتىڭ دارىگەرلەر جايلى تەرىس پىكىر ايتپاۋلارىن وتىنەدى.
«ماعان سەنىڭىزدەر, ارىپتەستەرىمنىڭ ەشقايسىسى دا جۇمىسقا الدەكىمگە زيانىن تيگىزۋ ءۇشىن نەمەسە ەمدەلۋشىلەرىمىزدىڭ دەنساۋلىعىن ناشارلاتۋ ءۇشىن كەلمەيدى. ءبىز ءار ايەلدىڭ ءومىرى ءۇشىن كۇرەستىك, بىرنەشە حيرۋرگتەر بريگاداسى شاقىرتىلدى, ناۋقاستاردى امان الىپ قالۋ ءۇشىن قالامىزدىڭ بىلىكتى پروفەسسورلارىمەن قاتار, وزگە قالالاردىڭ ماماندارىنان دا كەڭەس الدىق. سوندىقتان دا دارىگەرلەر دۇرىس قارامادى دەۋگە بولمايدى», دەيدى ول.
پەريناتالدى ورتالىقتىڭ باس دارىگەرىنىڭ ورىنباسارى ەربول اۋباكىروۆتىڭ ايتۋىنشا, ءۇش بىردەي ايەلدىڭ ءولىمى ءبىر-بىرىمەن بايلانىستى ەمەس.
«العاشقى ناۋقاستىڭ (21 ماۋسىمدا قايتىس بولعان) قايتىس بولۋ سەبەبى قان تامىرىنىڭ شارانا سۇيىقتىعىمەن بىتەلىپ قالۋىنان (ەمبوليا) بولدى. بۇل جاعداي 20 مىڭ ادامدا ءبىر كەزدەسەدى. جۇكتىلىك كەزىندە, بوسانۋ ۇستىندە جانە بوسانعاننان كەيىن بولاتىن اتالمىش اسقىنۋدا ەمدەلۋشىلەردىڭ امان قالۋ مۇمكىندىگى 18-20%-ءتى قۇرايدى. ول ناۋقاستىڭ ەكىنشى دارەجەلى ەستەن تانۋ جاعدايىندا بولعان. ءسابيى قازىرگى تاڭدا وزدىگىنەن تىنىس الىپ جاتىر, بەتى بەرى قاراپ كەلەدى», دەپ ناقتىلادى ول.
قالا اكىمدىگى العاشقى قايتىس بولعان ەكى انانىڭ ءسابيى جان ساقتاۋ بولىمىندە جاتقاندىعىن حابارلادى. سوڭعى اقپاراتقا دەيىن, جاڭا تۋىلعان سابيلەردىڭ جاعدايى اۋىر دەلىنگەن. جالپى №1 پەريناتالدى ورتالىقتا جىل سايىن 12 مىڭ ايەل بوسانادى ەكەن. ورتالىقتا سوڭعى ەكى جىلدا انا ءولىمى تىركەلمەگەن. سونىمەن قاتار وسى ۋاقىتقا دەيىن 5 مىڭ كۇردەلى وتا جاسالعان ورتالىقتىڭ بۇل وقيعالارعا وزدەرى دە قاپالى.
«گيستولوگيالىق زەرتتەۋ جۇرگىزۋ ءۇشىن ساراپتاما الىندى. ونىڭ ناتيجەسى ون كۇننەن كەيىن دايىن بولادى. سول كەزدە عانا جۇكتى ايەلدىڭ نەدەن قايتىس بولعانىن بىلە الامىز. بۇگىندە تەرگەۋ ءجۇرىپ جاتىر. بالالار جاعدايى قالىپتى. قازىر جان ساقتاۋ بولىمىندە بىلىكتى مامانداردىڭ باقىلاۋىندا» دەيدى ورتالىق ماماندارى.
نەگىزىنەن پەريناتالدى ورتالىق مامىر ايىنداعى زەرتحانالىق تەكسەرۋلەر كەزىندە بارلىق ستاندارتتارعا ساي بولعان. باسشىلىعى قايتادان ەپيدەميولوگيالىق تەكسەرۋ جۇرگىزىلىپ جاتقانىن ايتادى.
ودان بولەك كەزەكتەن تىس جۋرناليستەرمەن وتكەن بريفينگتە سۇراقتارعا جاۋاپ بەرگەن №1 پەريناتالدىق ورتالىق ديرەكتورىنىڭ ورىنباسارى ەربول اۋباكىروۆ سوڭعى سالدارعا بايلانىستى «جۇكتىلىك كەزىندەگى مەديتسينالىق قۇجاتتارىنان انەميامەن اۋىراتىنىن بىلدىك. ەكىقابات بولىپ ءجۇرىپ, ءۇش ءتۇرلى پرەپاراتپەن ەمدەلگەن. ونىڭ ۇستىنە, 19 جاسىنان باستاپ كۇنىنە 20-30 رەتتەن تەمەكى شەگەتىن بولعان. قازانىڭ باستى سەبەبى وسىدان دەگەن ويىمىز بار», دەپ جاۋاپ بەردى.
دەي تۇرعانمەن, مەديتسينامىز قارىشتاپ دامىپ, شەتەل اسىپ ءبىلىمىن تولىقتىرىپ جاتقان بىلىكتى ماماندارىمىزعا بۇل قايعىلى وقيعالار ءبارىبىر سىن ەكەنى انىق. ايدىڭ امانىندا ءۇش ءۇيلى جاننىڭ اڭىراپ قالۋىنا كىم كىنالى؟ قايعىلى وتباسىلار دارىگەرلەردى, ال اق حالاتتى جاندار مارقۇمداردىڭ وزدەرىندەگى اقاۋدى نەگىزگى سەبەپ سانايدى. قايتكەن كۇندە دە بولعان ءىستىڭ ۇشىعىن ۋشىقتىرماي تابۋ كەرەك.
سونداي-اق ءباسپاسوز ءماسليحاتىندا ايەلىنەن ايىرىلعان ساپار ءامىرتاي ەسىمدى ازامات بۇقارالىق اقپارات قۇرالدارى ارقىلى دۇنيەگە كەلگەن نارەستەلەردىڭ ءتىرى قالۋى ءۇشىن شەتەلدەن ماماندار شاقىرۋدى ءوتىندى. ول ەلباسىدان, دەنساۋلىق ساقتاۋ ءمينيسترى ەلجان ءبىرتانوۆتان, بارلىق ازاماتتاردان كومەك سۇرادى.
«بالالاردى امان الىپ قالسىن دەپ كومەك سۇرايمىن قازاقستاندا وعان مۇمكىندىك كوپ. شەتەلدەن ماماندار شاقىرسا دەيمىن. سەبەبى, مۇنى وسىنداي جاعدايعا تاپ بولعان ادام عانا تۇسىنەدى. ءدال قازىر مەن سول جاعدايدا تۇرمىن. كىشكەنتاي ءۇمىتىم جان ساقتاۋ بولىمىندە جاتىر. ودان ايىرىلىپ قالماۋىم ءۇشىن دەنساۋلىق ساقتاۋ ءمينيسترى ەلجان ءبىرتانوۆتان وسى بالالاردى امان ساقتاپ قالسا ەكەن دەپ كومەك سۇرايمىن. سەبەبى, ەكىنشى رەت جاقىنىمنان ايىرىلۋ مەن ءۇشىن وتە اۋىر بولادى. بالالاردىڭ ەش جازىعى جوق قوي, ولار ءومىر ءسۇرۋى ءتيىس» دەيدى س.ءامىرتاي.
ميراس اسان,
«ەگەمەن قازاقستان»
