فەستيۆالعا كەلگەن قوناقتار ءداستۇرلى تۇردە قىزىل كىلەم توسەلگەن جول مەن ءجۇرىپ ءوتتى. ەلىمىزدىڭ كينەماتوگرافتار وداعىنىڭ توراعاسى, كينورەجيسسەر, ستسەناريست, «شال», «ابىلقايىر حان» كارتينالارىنىڭ اۆتورى ەرمەك تۇرسىنوۆ جول باستاپ بەردى.
«كونكۋرسقا كلاسسيكالىق كينودان باستاپ كاسىبي كامەرا مەن ۇيالى تەلەفونعا تۇسىرىلگەن اندەگراۋندقا دەيىن جىبەرىلگەن. ولاردىڭ اراسىندا تاريحي, بيبليوگرافيالىق, كومەديالىق فيلمدەر بار. قازىرگى قوعامنىڭ مادەنيەتى, زاماناۋي پروبلەمالارى سياقتى تاقىرىپتارعا بايلانىستى جۇمىستار كەزدەسەدى. اۆتورلاردىڭ كوبىنىڭ جاستار قاتارىنان بولۋى ۇيىمداستىرۋشىلاردى قۋانتتى. كونكۋرسقا ت.جۇرگەنوۆ اتىنداعى ۇلتتىق ونەر اكادەمياسى, ۇلتتىق ونەر ۋنيۆەرسيتەتى, مەملەكەتتىك ەمەس «تۇران» ۋنيۆەرسيتەتىنىڭ ستۋدەنتتەرى بەلسەندى قاتىستى. كينوفەستيۆالدىڭ قازىلار القاسى قۇرامىنا كينەماتوگرافتىڭ اتاقتى قايراتكەرلەرى بار, -دەيدى ۇيىمداستىرۋشىلاردىڭ ءبىرى سالاۋات تەمىربولات ۇلى.
بىرنەشە كۇن بويى وبلىس ورتالىعىنداعى كينوتەاترلاردا قىسقا مەتراجدى فيلمدەر كورسەتىلەدى. فەستيۆالگە الەمنىڭ 20 مەملەكەتىنەن 207 جۇمىس قابىلدانىپتى. ىرىكتەۋدەن وتكەن 64 جۇمىستىڭ 15-ءى دەرەكتى فيلم. تاپسىرىستار 2018 جىلدىڭ 1-ماۋسىمىنا دەيىن ertiscinema.kz سايتى ارقىلى قابىلدانعان.
كينوفەستيۆال «رۋحاني جاڭعىرۋ» باعدارلاماسىن جۇزەگە اسىرۋ شەڭبەرىندە قىسقامەتراجدى فيلمدەردى كوپشىلىككە تاراتۋ جانە تالانتتاردى ىزدەپ, تانىستىرۋ ماقساتىندا ۇيىمداستىرىلدى.
فەستيۆالعا قاتىسۋ ءۇشىن ۇزاقتىعى 30 مينۋتقا دەيىن, 2016 جىلدان كەيىن تۇسىرىلگەن قىسقامەتراجدى ويىن جانە دەرەكتى فيلمدەر قابىلداندى. ءبىر اۆتوردان نەمەسە شىعارماشىلىق بىرلەستىكتەن قابىلداناتىن جۇمىستاردىڭ سانى 4 اسپاۋى ءتيىس. فەستيۆالدىڭ باعدارلاماسىنا سايكەس الدىمەن ويىن كينوسىنىڭ ەكى ساعاتتىق توپتاماسى, ودان كەيىن «الەم كينوسىنىڭ ءىنجۋ-مارجانى» تاقىرىبىنداعى فيلمدەر كورسەتىلەدى.
ال, جەڭىمپازدار «ۇزدىك دەرەكتى فيلم», «ۇزدىك ويىن ءفيلمى», «استانا تۋرالى ۇزدىك ءفيلمى», «قازىلار القاسىنىڭ ارنايى جۇلدەسى», «كورەرمەندەر كوزايىمى جۇلدەسى» بويىنشا انىقتالادى.
- فەستيۆالدىڭ ءوتۋى باسقا وبلىستارعا ۇلگى. كورەرمەندەردىڭ بارلىعىن جاقسى كينوعا ۇيرەتۋ كەرەك. ەrtis Cinema فەستيۆالىن داستۇرگە اينالدىرعان ءجون,- دەيدى ەرمەك تۇرسىنوۆ.
كينوفەستيۆال وتكىزۋ يدەياسىن ءبىزدىڭ جەرلەسىمىز, رەسەي حالىق ءارتىسى, كينورەجيسسەر ۆلاديمير حوتينەنكو, پروديۋسەر ءارى رەجيسسەر, ەۋرازيالىق راديو جانە تەلەۆيزيا اكادەمياسىنىڭ ۆيتسە-پرەزيدەنتى ۋ تسزيان (Mr.WuJiang), رەجيسسەر, ستسەناريست, اكتەر ساتىبالدى نارىمبەتوۆ قولداپتى.
جەڭىمپازداردىڭ ەسىمدەرى 14 شىلدەدە Ertis رromenade ساحناسىندا اتالاتىن بولادى
فاريدا بىقاي
«ەگەمەن قازاقستان»
پاۆلودار
سۋرەتتى تۇسىرگەن: ۆالەري بۋگاەۆ
