پروفيلاكتيكالىق رەيد بۇگىن باستالدى. شوب سۋبەكتىلەرى تازالىق پەن ءتارتىپتى ساقتاۋ, سونداي-اق كوشەتتەردى كۇتىپ-باپتاۋ جانە قورعاۋ بويىنشا تەكسەرىلدى.
ولاردىڭ اراسىندا دۇكەندەر, سۋپەرماركەتتەر, ساۋدا ۇيلەرى مەن قوعامدىق تاماقتاندىرۋ ورىندارى بار.
تەكسەرۋشى توپتىڭ قۇرامىنا اتىراۋ قالالىق كاسىپكەرلىك ءبولىمىنىڭ, سونداي-اق قۇقىق قورعاۋ ورگاندارىنىڭ ماماندارى كىردى. رەيدتىڭ العاشقى كۇنى 5 بيزنەس نىسانى تەكسەرىلدى. ولاردىڭ كوپشىلىگىندە بۇزۋشىلىقتار انىقتالدى.
- قالا اكىمىنىڭ قالانى ارالاۋى بارىسىندا كاسىپكەرلەردىڭ ىرگەلەس اۋماقتى اباتتاندىرۋ جانە كۇتىپ-ۇستاۋ ەرەجەلەرىن ساقتاماۋى بويىنشا وتە كوپ بۇزۋشىلىقتار انىقتالدى. زاڭدى تۇلعالارعا بۇزۋشىلىقتاردى جويۋ جونىندە 100-دەي ۇيعارىم بەرىلدى. بىرنەشە كاسىپكەرگە اۋماعىندا تۇرمىستىق جانە قۇرىلىس قالدىقتارىنىڭ بولعانى, ىرگەلەس جەر ۋچاسكەسىن ءوز بەتىمەن يەلەنىپ العانى, اۋماعىنىڭ سىرتقى ءتۇرىنىڭ تالاپقا ساي بولماعانى ءۇشىن ايىپپۇل سالىندى. كەيبىر زاڭدى تۇلعالارعا كەمشىلىكتەردى جويۋ تۋرالى ەسكەرتۋلەر جاسالدى, - دەيدى اتىراۋ قالالىق كاسىپكەرلىك جانە تۋريزم ءبولىمىنىڭ باسشىسى رۋسلان داۋلەتوۆ.
وسىعان دەيىن اتىراۋ قالاسىنىڭ اكىمى اليمۇحاممەد قۇتتۇمۇرات ۇلى وبلىس ورتالىعىنىڭ بىرنەشە ىقشاماۋدانىن تەكسەرىپ, قاراماعىنداعىلارعا قوزعالىس كوپ جول قيىلىستارىن جەڭىلدەتۋ, سونداي-اق قالا ورتالىعىنداعى قوقىس پەن قۇرىلىس قالدىقتارى ماسەلەلەسى, تۇرعىن ۇيلەردىڭ قاسبەتتەرىندەگى اقاۋلاردى جويۋ جانە جول جيەگىندەگى يەسىز جەر ۋچاسكەلەرىن كوركەيتۋ بويىنشا بىرقاتار تاپسىرمالار بەرگەن ەدى.
- ءبىز قالا تۇرعىندارىن تازالىق ساقتاۋ مادەنيەتىنە ادەتتەندىرۋىمىز قاجەت. ءبىرىنشى كەزەكتە قالانى تازالايتىن كوممۋنالدىق قىزمەتتەردىڭ جۇمىسىن كۇشەيتۋ كەرەك, سوڭعى ۋاقىتتا تۇرعىندار ءبىزدىڭ اتىمىزعا كوپتەگەن رەنىشتەر ءبىلدىرىپ جاتادى. ەكىنشىدەن – كاسىپكەرلەردى وزدەرىنىڭ ىرگەلەس اۋماقتارىن كورىكتەندىرۋگە, ۋچاسكەلەرىندەگى ەسكى, قيسايعان قورشاۋلاردى, قۇرىلىس قوقىستارىن, ارام شوپتەردى جويۋعا داعدىلاندىرۋ قاجەت. ۇشىنشىدەن – تۇرعىن ۇيلەردىڭ قاسبەتتەرىن جاقسارتۋ جانە جول جيەگىندەگى جەرلەردى, قالانى ءساندى, ەستەتيكالىق تۇرگە كەلتىرۋ قاجەت. وسىنىڭ بارلىعىن ءبىز اعىمداعى جىلدىڭ سوڭىنا دەيىن شەشۋىمىز كەرەك, - دەپ تاپسىرما بەردى اليمۇحاممەد قۇتتۇمۇرات ۇلى.
