كورمەنىڭ نەگىزگى ماقساتى – شەتەلدىك اۋديتوريانى ەۋرازيا ۇلى دالا بەلدەۋىنىڭ مادەني مۇرالارىمەن تانىستىرۋ.
«التىن ادام» تۇسىنىگى تاريح عىلىمىندا اتاقتى ارحەولوگ عالىم, قازاقستاندىق ارحەولوگيانىڭ نەگىزىن قالاۋشىلاردىڭ ءبىرى كەمال اقىشەۆتىڭ ارقاسىندا پايدا بولدى. تولىقتاي التىنان كيىم كيگەن ساق جاۋىنگەرى – ءبىرىنشى «التىن ادام» تابىلعان قازاقستاننىڭ وڭتۇستىگىندەگى ەسىك قورعانىندا زەرتتەۋ جۇرگىزگەن مىنە وسى كىسى بولاتىن. باعا جەتپەس قازىنا عاسىر جاڭالىعى رەتىندە تانىلىپ, شارتتى تۇردە «التىن ادام» دەپ اتالدى.
شارانىڭ اشىلۋ سالتاناتىندا ءسوز العان قازاقستاننىڭ قىتايداعى ەلشىسى شاحرات نۇرىشەۆ: «بۇگىن قازاقستان رەسپۋبليكاسى ۇلتتىق مۋزەيى قازاقستاننىڭ ەڭ باعالى تاريحي ەكسپوناتى بولىپ تابىلاتىن ساق داۋىرىندەگى التىن ادامدى اكەلىپ وتىر. بۇگىنگى كۇندە قازاقستاننىڭ جاڭا تاريحي كەزەڭگە قادام باسۋىنداعى باعدار رەتىندە قابىلدانعان قازاقستان پرەزيدەنتى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسى شەڭبەرىندەگى مىڭ جىلدىق تاريحىمىزداعى ءتول مادەنيەتىمىز الەم قۇرلىقتارىنا جول تارتتى. بۇگىنگى ۇلى دالا كورمەسى قازاقستاننىڭ ەلورداسى استانانىڭ 20 جىلدىعىنا جانە ء«بىر بەلدەۋ, ءبىر جول» باستاماسىنىڭ 5 جىلدىعىنا وراي ۇيىمداستىرىلدى. قازاقستان مەن قىتاي تاريحي كورشىلەس ەلدەر بولىپ ۇلى جىبەك جولىن جاڭعىرتۋعا بىرىگىپ اتسالىسىپ كەلەدى. 2013 جىلى قىتاي توراعاسى سي تسزينپين استانا قالاسىندا تۇڭعىش رەت جىبەك جولىنىڭ ەكونوميكالىق بەلدەۋىن قۇرۋ تۋرالى باستامانى جاريا ەتۋى ەكى مەملەكەت اراسىنداعى ستراتەگيالىق ارىپتەستىكتىڭ بيىك دەڭگەيىن دالەلدەيدى. «التىن ادام» ەكسپوناتى قىتاي جەرىنە ەكىنشى مارتە كەلىپ وتىرعانىن اتاپ وتكەن ءجون. 2013 جىلى بەيجىڭ قالاسىنداعى قىتاي ۇلتتىق مۋزەيىنە قويىلىپ, وتە جوعارى باعاعا يە بولعان. وسى ءۇردىس جالعاسىن تاۋىپ وتىرعانى قۋانتادى. كورمەگە ۇسىنىلعان كوپتەگەن تاريحي دەرەكتەر ارقىلى ۇلى دالانىڭ ەرەكشەلىكتەرى مەن ونىڭ رۋحىن سەزىنىپ, قۇندى دۇنيەلەرىمەن تانىسىپ, قازاق ەلىنىڭ ءتول تاريحىنان ءتيىستى اقپارات الاسىزدار دەپ ويلايمىن», - دەدى.
ەكسپوزيتسيالاناتىن كوللەكتسيا تىزىمىندە XV عاسىردىڭ (وڭتۇستىك قازاقستاننىڭ سايرام قالاشىعى) باسىنا ءتان دەپ بەلگىلەنگەن زەرگەرلىك ونەردىڭ بىرەگەي تۋىندىلارى, سول سياقتى ورتالىق قازاقستانداعى ءتالدى–ىى قورعانىنان تابىلعان جادىگەرلەر دە (ج.س.د. VII ع. ورتاسى جانە 2-جارتىسى) بار.
قر ۇلتتىق مۋزەيى ديرەكتورىنىڭ ورىنباسارى اباي ساتۋبالدين: «كورمەنىڭ باستى ەكسپوناتتارى - «التىن ادام» مەن «تاقساي التىن حانشايىمى». بىردەن اتاپ ءوتۋ كەرەك, قازاقستان مەن قىتاي ءوزارا ستراتەگيالىق ارىپتەس بولىپ تابىلادى. ءبىزدىڭ مەملەكەتتەرىمىزدىڭ اراسىنداعى قارىم-قاتىناس ءوزارا بىرلەستىكتىڭ ۇلگىسىندەي تانىلىپ وتىر. ءبىزدىڭ مادەني جوبامىز حالىقارالىق اسا ءىرى شارا ەكەنى بەلگىلى. بۇل كورمە جوباسى وسى كۇنگە دەيىن بەلورۋسسيا, رەسەي جانە ازەربايجان مۋزەيلەرىندە بولىپ كەلدى. ءارى قاراي وسى جىلدىڭ اياعىنا دەيىن پولشا جانە وڭتۇستىك كورەيادا وتكىزۋ جوسپارلانعان. حالىقتاردى جاقىنداستىرۋدا, ولاردىڭ اراسىنداعى دوستىق پەن ىنتىماقتاستىقتى نىعايتۋدا مادەنيەت ۇلكەن ءرول اتقارادى», - دەدى.
قازاقستان رەسپۋبليكاسى ۇلتتىق مۋزەيى قورلارىنان ۇسىنىلعان التىن زاتتاردىڭ از عانا بولىگى - ەۋرازيا دالا مادەنيەتى مۇراسىنىڭ وزىندىك ەرەكشەلىگىن كورسەتەتىن شەبەرلەر تۋىندىلارى زەرگەرلىك ونەر ءداستۇرىنىڭ ۇزدىكسىزدىگىن تاعى دا ءبىر رەت دالەلدەيدى.
