ءۇي بەس بولمە. بەس بولمەدە ءتورت تەلەديدار, ءبىر كومپيۋتەر. وسى ۋاقىتقا دەيىن التاۋى ەمىن-ەركىن وتىرىپ, شۇيىركەلەسكەن ەمەس. تاماق ىشىلە سالىسىمەن ۇشەۋى تۇرىك تەلەسەريالىنا, بىرەۋى كونتسەرت تاماشالاۋعا, ەندى ءبىرى مۋلتفيلم كورۋگە وتىرسا, ارقاباي فۋتبول ويىنىنا جانكۇيەرلىك ەتۋگە تەلەديدارىن قوساتىن. تەلەديدارداعى تۇرىك سەريالدارىنىڭ ءتۇرلى جىمىسقى ارەكەتتەرى مەن وپاسىزدىق ىستەرى جۇيكەلەرىنە سالماق سالىپ, قاتتى اسەر ەتەدى-اۋ, ايتەۋىر داستارقانعا وتىرعاندا ءبىر-ءبىرىنىڭ ءسوزىن كوتەرە الماي, اشۋ شاقىرىپ كوڭىلدەرىنە قاياۋ سالىپ الاتىن ساتتەرى دە ءجيى كورىنىس تاباتىن.
كەشەگى ءۇش كۇن ەلەكتر جارىعى وشكەلى ارقابايدىڭ وتباسى داستارقان باسىنا ۋاقتىلى جيىلىپ, ورتادا بارىنە ورتاق اجىك-گۇجىك اڭگىمەلەر ايتىلىپ جاتتى. اناسى بالالارىنىڭ ءسابي كەزىندەگى ءتاتتى قىلىقتارىن ەسكە السا, اكەلەرى ارقاباي انالارىمەن بىرگە ماحاببات قۇرعان جاستىق داۋرەنىنەن ەستەلىكتەر ايتىپ ارقا-جارقا بولىستى. وسى جارىق سونگەن ءۇش كۇندە التاۋى ءبىرىن-ءبىرى جاڭا كورگەندەي ايتارلارى تاۋسىلمادى. تىمىرىق, توماعا تۇيىق كەزدەر كەلمەسكە كەتىپ, شاڭىراقتارىنا بەرەكە كىرگەندەي بولدى. اتا-انا رەتىندە ۇل-قىزدارىنىڭ كۇندەلىگىن تەكسەرىپ, تانىسىپ, قولدارىن قويىپ, ساباقتارىن پىسىقتاتتى. بالالارىنان سىنىپ جەتەكشىلەرىنىڭ كىم ەكەنىن دە ءبىلىپ الدى.
اراسىندا الىس جاقىن اعايىننىڭ اماندىعىن سۇراسۋدى دا ۇمىت قالدىرماعان ارقاباي استاناداعى جيەنىنە حابارلاستى «جيەنجان, سەندەردە سبەت بارما؟» ء«يا, ناعاشەكە, قانشا داۋىل تۇرسا دا بىزدە جارىق سونبەيدى», دەدى جيەنى ماساتتانا. «قاپ!» دەگەن ءسوزدىڭ اۋزىنان قالاي شىققانىن اڭعارماي قالعان ارقابايدىڭ ۇنىندە جيەنىنە دەگەن اياۋشىلىق بايقالىپ تۇردى.
جارىق سونگەن ءۇش كۇندە ايەلى تەلەديدارعا الاڭداماي, كوڭىل ءبولىپ دايارلاعاننان با, تاماعىنىڭ دا ءدامى كىرگەندەي بولدى.
ەرتەدە بابالارىمىز ماي شاممەن-اق ءومىر سۇرگەنى بەلگىلى. ەرتە جاتىپ, تاڭ الاكەۋىمنەن شارۋاسىنا كىرىسىپ, ەلدىڭ سوڭى توسەگىنەن ەندى تۇرىپ جاتقاندا قورا جايىن بىرجاقتى ەتىپ شايعا كىرەتىن بولعان. «ەرتە تۇرعاننىڭ ىرىسى دا, ءبىر ءىسى دە ارتىق» بولاتىنى سودان بولسا كەرەك.
ء«يا, دۇرىس ايتاسىز. حالقىمىزدىڭ دەموگرافيالىق وسۋىنە دە سونگەن جارىقتىڭ كوپ-كورىم ۇلەسى بار ەكەندىگى داۋسىز. وعان ءسىز تۇگىلى ءوسۋ, كوبەيۋ دەگەنگە قوس قولىن كوتەرە قولدايتىن ماقاش كوكەمىز دە داۋلاسا قويماس», دەيدى ارقاباي ءوز-وزىنە سەنىمدى تۇردە.
ەرتەڭ جارىق جانسا ءبارى دە قايتادان تاز قالپىنا تۇسەرىن بىلگەن ارقاباي كوزىنىڭ استىمەن توبەدەگى مەلشيگەن لامپاعا اقىرىن قاراپ قويدى...
ماقسات قارعاباي
