سۋرەتتى تۇسىرگەن ەرلان ومار
بۋرابايدىڭ كوگىلدىر قىرقا جوتالارىمەن كوكتەي ءوتىپ, وقجەتپەستىڭ وزىمەن بوي تالاستىراتىن, الەمدە سيرەك كەزدەسەتىن وسى زامانعى تالاپتارعا ساي ترامپلين الىستان كوز تارتادى. بۇل نىسان – جالعىز تاۋ شاڭعىسى عانا ەمەس, ەلىمىزدەگى ءتۋريزمنىڭ دامۋىنا ايرىقشا سەرپىن بەرەتىن نىسان. ءترامپليندى شاڭعى سپورتىنىڭ رەسپۋبليكالىق بازاسىنىڭ اۋماعى 125,54 گەكتاردى قۇرايدى. قۇرىلىس جۇمىستارى ەكى كەزەڭمەن جۇزەگە اسىرىلدى. ءبىرىنشى كەزەڭدە اۋماعى 111 گەكتاردى الىپ جاتقان شاڭعى بازاسى ىسكە قوسىلسا, ەكىنشى كەزەڭدە 90 جəنە 125 مەترلىك ترامپليننەن سەكىرۋ نىسانى پايدالانۋعا بەرىلدى. مادەنيەت جانە سپورت مينيسترلىگىنىڭ عالامات شاڭعى بازاسى ۇستىمىزدەگى جىلدىڭ ناۋرىز ايىندا اشىلعان بولاتىن. كەشەندى ەلباسى نۇرسۇلتان نازارباەۆقا مادەنيەت جانە سپورت ءمينيسترى ارىستانبەك مۇحامەدي ۇلى تانىستىرىپ كورسەتتى. بۇل شاڭعى بازاسى قىسى-جازى جۇمىس ىستەيتىن بولادى. اتالمىش سپورت كەشەنىن سالۋعا بارلىعى 38 ميلليارد تەڭگە قارجى جۇمسالدى. شاڭعى بازاسى قىسقى سپورت تۇرلەرى (شاڭعى جارىسى, بياتلون, تۇعىردان سەكىرۋ) بويىنشا əلەمدىك تالاپتارعا ساي سالىنعان. نىسانعا شاڭعى جولى, 90 جəنە 125 مەترلىك بيىكتىكتەن سەكىرۋ تۇعىرى (ترامپلين), 200 ورىندىق قوناق ءۇي, 250 ورىندىق اسحانا, ءجۇزۋ باسسەينى, دəرىگەرلىك-ساۋىقتىرۋ ورتالىعى كىرەدى.
مەملەكەت باسشىسىنىڭ ساپارى كەزىندە جاڭا شاڭعى بازاسىندا 200-دەن استام سپورتشىنىڭ وقۋ-جاتتىعۋ جيىنى ءوتىپ جاتقان بولاتىن. قازاقستاننىڭ ترامپليننەن سەكىرۋ سپورتىنىڭ ەڭ مىقتى حاس شەبەرلەرى پايدالانۋعا بەرىلىپ وتىرعان جاڭا كەشەننىڭ وتە ساپالى ەكەندىگىن وزدەرىنىڭ شەبەرلىكتەرىمەن كورسەتتى.
ەلباسىنا «تۋريستىك قازاقستان» باعدارلاماسىنىڭ الداعى ۋاقىتتا جۇزەگە اسىرىلۋى جانە «ششۋچە-بۋراباي» كۋرورتتى ايماعىن دامىتۋ بويىنشا اتقارىلىپ جاتقان جۇمىستار تۋرالى پرەمەر-ءمينيستردىڭ ءبىرىنشى ورىنباسارى اسقار مامين, مادەنيەت جانە سپورت ءمينيسترى ارىستانبەك مۇحامەدي ۇلى جانە اقمولا وبلىسىنىڭ اكىمى مالىك مىرزالين بايانداپ بەردى.
باياندامالاردى تىڭداعان سوڭ مەملەكەت باسشىسى قازاقستاننىڭ تۋريستىك الەۋەتىن ارتتىرۋدىڭ وزەكتىلىگىن ايتتى.
– وسىعان دەيىن ءتۋريزمدى دامىتۋعا تولىق مۇمكىندىگىمىز بولمادى. ءار نارسەنىڭ ءوز ۋاقىتى بار. جاعدايى بار قازاقستاندىقتار شەتەلدەردەگى كۋرورتتارعا بارىپ دەمالىپ ءجۇردى. ەندىگى ۋاقىتتا قازاقستاننىڭ كوركەم جەرلەرىن وتانداستارىمىزعا عانا ەمەس, شەتەلدىكتەرگە دە كورسەتەتىن ۋاقىت جەتتى. ءتۋريزمدى ەكونوميكانىڭ ءبىر سالاسى دەپ ەسەپتەۋىمىز كەرەك. قازىر «ششۋچە-بۋراباي» كۋرورتىنا قاتىناۋعا بارلىق جاعداي جاسالعان. «استانا-بۋراباي» اۆتوبانى سالىندى. تەمىر جول بار. كوكشەتاۋدىڭ اۋەجايى جۇمىس ىستەپ تۇر. ەندى بۋراباي كەنتىنىڭ ىشكى جولدارىن سالىپ, اباتتاندىرىپ, دەمالۋشىلارعا قولايلى جاعداي تۋعىزۋىمىز قاجەت. بۇل وبلىس اكىمىنىڭ شارۋاسى. جالپى, بۋرابايدا عانا ەمەس, يمانتاۋ, شالقار, باياناۋىل, تۇركىستاندا دا ءتۋريزمدى دامىتۋدى قولعا الۋىمىز قاجەت. تۇركىستان ءتۋريزمدى دامىتۋعا وتە قولايلى. ەڭ باستىسى, ينفراقۇرىلىمدى دۇرىستاۋىمىز كەرەك. مەن بارلىق وبلىستىق اكىمدىكتەرگە تاپسىرما بەرەمىن, بۋراباي كۋرورتى تۋريستەردىڭ ارقاسىندا بيۋدجەتكە تابىس اكەلەتىن بولادى, – دەدى ەلباسى نۇرسۇلتان نازارباەۆ ءوز سوزىندە.
ەلباسى بۇگىندە 10 تۋريستىك ايماققا باسا نازار اۋدارىلاتىنىن ايتتى. ولار – يمانتاۋ, باياناۋىل, تۇركىستان, الماتى وبلىسى, شارىن شاتقالى, الاكول, كاسپي جاعالاۋى جانە باسقالارى. «بۋرابايدان كەيىن يمانتاۋ-شالقار كۋرورتتى ايماقتارى بار. پاۆلودار وبلىسىندا باياناۋىل كۋرورتىنىڭ الەۋەتى زور. تۇركىستان ەرەكشە ماڭىزعا يە. ول جەردە جاقسى تۋريستىك ورتالىق قالىپتاستىرۋمىز كەرەك. تۋريزم تۇركىستاندا قازىردىڭ وزىندە بار. ءار جىل سايىن وعان 1,5 ميلليونعا جۋىق تۋريست كەلەدى», – دەپ اتاپ ءوتتى ن.نازارباەۆ. مەملەكەت باسشىسى الماتىداعى تاۋ شاڭعىسى كۋرورتى جانە شارىن شاتقالى تۋرالى دا ايتىپ ءوتتى.
– ەگەر ءبىز ينفراقۇرىلىمدى سالاتىن بولساق, بۇل كولەمدى كوبەيتۋگە ابدەن بولادى. الماتى وبلىسىنداعى تاۋ شاڭعىسى كۋرورتى تۋرالى ايتىپ وتىرمىز. ونى الداعى ۋاقىتتا بارىنشا دامىتۋ قاجەت. بۇل جونىندە جوسپار دا, يدەيا دا بار. شارىن شاتقالىن ەلىمىزدە بىلمەيتىن ادام كەمدە-كەم. ءتىپتى شەتەلدىكتەردىڭ ءوزى ونى سولتۇستىك امەريكاداعى اتاقتى شاتقالمەن سالىستىرادى. ءبىز ەلىمىزدىڭ سۇلۋ تابيعاتى تۋرالى ءجيى ايتا بەرمەيمىز. سوندىقتان, مۇنى مىقتاپ قولعا الۋ قاجەت, – دەدى ەلباسى.
سونىمەن قاتار مەملەكەت باسشىسى تۋريستىك نىساندارعا سۋبسيديا ءبولۋ كوزدەلىپ وتىرعانىن اتاپ ايتتى.
– تۋريستەردى باسەكەگە قابىلەتتى باعا بولعاندا عانا تارتا الامىز. ەكونوميكانىڭ وسى سالاسىنا زور ءمان بەرۋىمىز كەرەك, – دەدى قازاقستان پرەزيدەنتى.
پرەمەر-ءمينيستردىڭ ءبىرىنشى ورىنباسارى اسقار مامين نۇرسۇلتان نازارباەۆقا ەلىمىزدە تۋريزم سالاسىن دامىتۋ باعىتىندا اتقارىلىپ جاتقان جۇمىس تۋرالى بايانداپ بەردى.
– ءسىزدىڭ تاپسىرماڭىزعا وراي, ۇكىمەت «قازاقستان تۋريستەرى اعىنى» مەملەكەتتىك جوباسىن ازىرلەۋ بويىنشا جۇمىس جۇرگىزۋدە. جوبانىڭ 7 باسىم باعىتى بار. وندا تۋريزم سالاسىندا باسەكەلەستىكتى ورىستەتۋ ماسەلەسىن تۇبەگەيلى شەشىپ, ەل ەكونوميكاسىنىڭ 33 سالاسىن بىرىكتىرۋ كوزدەلىپ وتىر. ءبىزدىڭ نەگىزگى ماقساتىمىز 2023 جىلعا دەيىن قازىرگى ەكونوميكاداعى ءتۋريزمنىڭ ۇلەسىن 1,9 پروتسەنتتەن 8 پروتسەنتكە دەيىن ۇلعايتۋ, – دەدى اسقار مامين.
ونىڭ ويىنشا, بولاشاقتى بولجاعان كورسەتكىش الەمنىڭ جاقسى دامىعان مەملەكەتتەرىنىڭ دەڭگەيىندە بولماق.
– قازىرگى كەزدە قۇرامىنا 60-تان استام تۋريستىك وبەكتى كىرەتىن تۋريستيفيكاتسيا كارتاسى ازىرلەنۋ ۇستىندە. وسى توپقا كىرەتىن 10 تۋريستىك جوبانى جۇزەگە اسىرۋ ءۇشىن 70 پايىزى جەكە ينۆەستور ەسەبىنەن قارجىلاندىرىلاتىن قۇنى 21,4 تريلليون تەڭگە ينۆەستيتسيا تارتۋ قاجەت, – دەدى ءبىرىنشى ۆيتسە-پرەمەر.
سونىمەن قاتار ا.مامين ەلىمىزدەگى تۋريستەر اعىنىن ارتتىرۋ بارىسىنداعى جوسپارىمەن ءبولىستى.
– 2023 جىلدارعا قاراي ءبىز تۋريستەر اعىنىن 2 ميلليون ادامعا جەتكىزۋدى كوزدەپ وتىرمىز. بۇعان قوسا ىشكى ءتۋريزمدى 500 مىڭ ادامنان 2 ميلليون ادامعا, ياعني ءتورت ەسەگە ارتتىرۋعا كۇش سالامىز, – دەدى ۇكىمەت باسشىسىنىڭ ورىنباسارى.
ال مادەنيەت جانە سپورت ءمينيسترى ارىستانبەك مۇحامەدي ۇلى ءوز سوزىندە بۋراباي كۋرورتىن دامىتۋ بويىنشا قولعا الىنعان مەملەكەتتىك باعدارلامالاردى جۇزەگە اسىرۋ ماسەلەسىنە توقتالا كەلە, ايگىلى گولليۆۋد پروديۋسەرلەرى كوركەم تابيعاتتىڭ كەستەلى بەينەسىن سومداپ, دەرەكتى فيلم تۇسىرۋگە قىزىعۋشىلىق تانىتىپ وتىرعانىن جەتكىزدى.
بۋراباي باۋرايىنداعى جاسالىپ جاتقان يگى شارالار ەل ءتۋريزىمىنىڭ ودان ءارى دامۋىنا سونى سەرپىن بەرەتىندىگى انىق.
بايقال ءبايادىل,
«ەگەمەن قازاقستان»
اقمولا وبلىسى
