بۇل تۇجىرىمدى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ەۋرازيالىق ينتەگراتسيا ينستيتۋتىنىڭ ۇيىمداستىرۋىمەن « ۇلى استانالار – «اقىلدى قالالار» اتتى ەكى كۇن بويى وتكەن مازمۇنى تەرەڭ حالىقارالىق عىلىمي كونفەرەنتسيادا ءسوز سويلەگەندەر راستاي ءتۇستى.
ولاردىڭ قاتارىندا ەلىمىزدىڭ ءماجىلىس دەپۋتاتتارى, اقش, رەسەي, تۇركيا, فرانتسيا, بەلارۋس, وزبەكستان, قىرعىزستان مەملەكەتتەرىنىڭ شىعارماشىل عىلىمي زيالى قاۋىم جانە ديپلوماتيالىق ميسسيا وكىلدەرى اتالعان كونفەرەنتسيا اياسىندا تۇششىمدى باياندامالار جاساپ, استانانىڭ اتىن اسقاقتاتا ءتۇستى.
كونفەرەنتسياعا قاتىسۋشىلار قازاقستاننىڭ جاڭا ەلورداسى – استانانىڭ بوي كوتەرۋى مەملەكەت باسشىسىنىڭ قايراتكەرلىگى مەن كورەگەندىلىگىنىڭ, ەرىك-جىگەرىنىڭ جەڭىسى ەكەندىگىن باسا ايتتى.
حالىقارالىق جيىن اياسىنداعى «اقىل-وي ورتالىقتارىنىڭ» باسىمدىقتارى: جاڭا ناقتىلىق قالىپتاستىرۋ, «استانا – جالپىۇلتتىق جانە الەۋمەتتىك بىرلىكتىڭ فارۆاتەرى», «الەۋمەتتىك ءال-اۋقات جانە ەكونوميكالىق تۇراقتىلىق: استانا – قازاقستاندىقتاردىڭ قالاسى», «جاڭا تەحنولوگيالار جانە تسيفرلاندىرۋ ەلوردانىڭ ورنىقتى دامۋ جولىندا» تاقىرىپتارى بويىنشا ۇيىمداستىرىلعان دوڭگەلەك ۇستەل وتىرىستارى مەن پىكىرسايىستاردا ەڭ وزەكتى ماسەلەلەر قوزعالدى.
ال كونفەرەنتسيانىڭ جالپى وتىرىسى استاناعا قاتىستى قۇندى دەرەكتەردىڭ كەنىشى قازىلعانداي اسەر قالدىردى. اتاپ ايتقاندا, ءماجىلىس توراعاسىنىڭ ورىنباسارى ۆ.بوجكو, قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ل.پروكوپەنكو, اوسشك حاتشىلىعىنىڭ كاسىبي (ديپلوماتيالىق) پەرسونالىنىڭ مۇشەسى ن.جالعاسباەۆ جانە باسقالار استانانىڭ قالىپتاسۋى مەن ەلوردانى دامىتۋداعى ەلباسىنىڭ ءرولى جايىندا تولىمدى پىكىرلەرىن ورتاعا سالدى.
– الەمدىك ديپلوماتيالىق لەكسيكادا استانا پروتسەسى دەگەن انىقتاما پايدا بولدى. بۇل ۇعىم سيريا ەلىن ازاماتتىق سوعىستان قۇتقارۋعا بايلانىستى ىلكىمدى ءىس-شارالار بارىسىندا ءجيى قايتالاندى. استانا اتاۋى يراننىڭ يادرولىق باعدارلامادان شىعۋ ماسەلەسى كوتەرىلگەن سايىن ءجيى اتالادى. استانا الەمدىك جانە ءداستۇرلى دىندەردىڭ تۇسىنىستىك تاۋىپ, ورتاق شەشىمگە كەلگەن كەلىسسوزدەردىڭ تال بەسىگىنە اينالدى. استاناعا دەيىن الەمدىك ءدىني كوشباسشىلاردىڭ باسىن ءبىر جەرگە قۇراۋ مۇمكىن ەمەس بولاتىن. ەقىۇ اياسىندا استانا دەكلاراتسياسىنىڭ قابىلدانۋى دا زور ەڭبەكتى قاجەت ەتتى. استانادا عىلىمي ورتالىقتار, الەمدىك وقۋ ورىندارىنىڭ فيليالدارى, مەديتسينالىق كلاستەرلەر قۇرىلىپ, استانا ەكونوميكالىق فورۋمىنا الەمدىك ەكونوميكانىڭ مارقاسقالارى جينالىپ تۇرادى. بۇل جەتىستىكتەر الىستان ايقىن كورىنەدى, – دەدى ءماجىلىس توراعاسىنىڭ ورىنباسارى ءوزىنىڭ قۇتتىقتاۋ سوزىندە.
قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ل.پروكوپەنكو كونفەرەنتسياعا قاتىسۋشىلاردى استانانىڭ 20 جىلدىعىمەن قۇتتىقتاي كەلە, ەلىمىز تاۋەلسىزدىك جىلدارى ءوزىنىڭ تاريحي تاڭداۋىن جاساپ, مەملەكەت باسشىسىنىڭ باتىل ساياسي شەشىمى ارقىلى جاڭا استانانىڭ قالىپتاسىپ, دامۋدىڭ داڭعىل جولىنا تۇسكەندىگىن اتاپ ءوتتى.
– بۇگىندە استانا قۇرىلىس, اقپارات, كوممۋنيكاتسيا سالاسىندا, ناقتىلاي ايتقاندا, تۇتاستاي ەلىمىزدىڭ دامۋىنا سەرپىن بەرىپ كەلەدى. وعان قوسا ەلىمىزدىڭ ءار تۇكپىرىندە ەكونوميكالىق بەلدەۋلەردىڭ قالىپتاسۋىنا وڭ اسەرىن تيگىزدى. استانانى كوشىرۋ ەلىمىزدىڭ مەملەكەتتىك اپپاراتقا, كاسىپورىنداردىڭ مەنەدجەرلەرىنە ستراتەگيالىق سيپاتتاعى عالامات الەۋمەتتىك-ەكونوميكالىق جوبالاردى جۇزەگە اسىرۋدا تەڭدەسسىز تاجىريبە جيناقتاۋعا مۇمكىندىك بەردى. ولاردىڭ ەڭ باستىلارىنىڭ ءبىرى – ەكسپو-2017 حالىقارالىق كورمەسى. وسىعان وراي ەلباسىنىڭ ساليقالى ساياساتى ەلىمىزدى تابىستى, بەيبىتشىل جانە بولاشاققا سەنىممەن قارايتىن مەملەكەت رەتىندە تانىتتى, – دەدى ل.پروكوپەنكو.
ال وزبەكستان ەلشىلىگىنىڭ وكىلدەرى ەكى ەل اراسىنداعى قارىم-قاتىناستاردى دامىتۋداعى استانانىڭ ءرولىن اتاپ ءوتتى.
كونفەرەنتسيانىڭ جالپى وتىرىسىندا, سونداي-اق ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى قحا كافەدراسىنىڭ مەڭگەرۋشىسى ا. باشماكوۆ پەن رەسەي وكىلى, پروفەسسور, ساياسي عىلىمدار دوكتورى ر.كاناپيانوۆانىڭ باياندامالارىن جينالعاندار ۇيىپ تىڭدادى.
ل.ن.گۋميلەۆ اتىنداعى ەۇۋ پرورەكتورى باۋبەك سومجۇرەك جۇرگىزىپ وتىرعان كونفەرەنتسيا سوڭىندا جيىننىڭ قورىتىندى قۇجاتى – ارنايى قارار قابىلداندى.
سەرىك ابدىبەك,
«ەگەمەن قازاقستان»
