پاستورە – «روما» فۋتبولشىسى
پسج كلۋبىنىڭ جارتىلاي قورعاۋشىسى حاۆەر پاستورە جازعى ترانسفەر كەزەڭىندە «روما» كومانداسىنا اۋىستى. يتاليالىق كلۋب 29 جاستاعى ويىنشىمەن 2023 جىلدىڭ 30 ماۋسىمىنا دەيىن كەلىسىمشارتقا وتىرعان.
حاۆەر پاستورەنىڭ ترانسفەرى ريمدىكتەر ءۇشىن 24,7 ميلليون ەۋروعا باعالانعان. ارگەنتينالىق فۋتبولشى «روما» ساپىندا 27-ءشى نومىردە وينايتىن بولادى. پاستورە 2009-2011 جىلدار ارالىعىندا «پالەرمو» كلۋبىندا ويناپ, 42 ميلليون ەۋروعا پاريج كومانداسىنا اۋىسقان بولاتىن. ول جەتى جىل ىشىندە پسج كلۋبىمەن بىرگە 19 جۇلدە جەڭىپ العان.
جاڭا سالماق قوسىلدى
بۇكىلالەمدىك بوكس سۋپەر سەرياسىنىڭ (WBSS) ەكىنشى ماۋسىمىنا جاڭا سالماق قوسىلاتىن بولدى. بۇل تۋرالى اتالعان ءتۋرنيردى ۇيىمداستىرۋشىلاردىڭ ءبىرى كاللە زاۋەرلياند مالىمدەدى
ونىڭ ايتۋىنشا, سۋپەر سەريانىڭ كەلەسى ماۋسىمىندا ءبىرىنشى جارتىلاي ورتا سالماقتاعى (63,5 كگ) بوكسشىلار قاتىسا الادى. «WBSS جوباسىنىڭ كەلەسى ماۋسىمىنا جاڭا سالماق قوسىلعانىن قۋانىشپەن حابارلاعىم كەلەدى. بۇل سالماقتا كاسىپقوي بوكستىڭ ەڭ ۇزدىك بوكسشىلارى جينالعان. وتە تارتىستى جەكپە-جەكتەر بولادى دەپ ويلايمىز. جۋىردا سىزدەرگە سەنساتسيالى ءتىزىمدى ۇسىناتىن بولامىز», دەيدى زاۋەرلياند.
قازىرگى ۋاقىتتا بۇل سالماقتا قازاقستاندىق بوكسشى باتىر جۇكەمباەۆ جۇدىرىقتاسىپ, جاقسى ناتيجەلەرگە قول جەتكىزىپ ءجۇر. بۇگىنگە دەيىن 13 جەكپە-جەك وتكىزىپ, ونىڭ بارلىعىندا جەڭىسكە جەتكەن. 11 كەزدەسۋىن مەرزىمىنەن بۇرىن اياقتاعان. سونىمەن قاتار ونىڭ ەنشىسىندە IBO International مەن WBC Continental Americas بەلدىكتەرى بار. الداعى ۋاقىتتا ۇمىتكەرلەر تىزىمىنەن وتانداسىمىزدى كورىپ قالۋىمىز مۇمكىن.
العاشقى اينالىمدا جەڭىلدى
ۇلىبريتانيانىڭ يستبۋرن قالاسىندا ءوتىپ جاتقان تەننيستەن قىزدار اراسىنداعى «Premier» جارىسىنا ەنەتىن «Nature Valley International» ءتۋرنيرىنىڭ ءبىرىنشى اينالىمىندا وتانداسىمىز يۋليا پۋتينتسەۆا جەڭىلىپ قالدى.
قازاقستاندىق تەننيسشى العاشقى اينالىمدا حورۆاتيالىق تەننيسشى دوننا ۆەكيچپەن كەزدەسكەن بولاتىن. ەكى سەتكە سوزىلعان ويىندا پۋتينتسەۆا قارسىلاسىنا 5:7, 3:6 ناتيجەسىمەن ەسە جىبەردى. سونداي-اق ءتۋرنيردىڭ ۇزدىك تەننيسشىلەرى سانالعان رەسەيلىك اناستاسيا پاۆليۋچەنكوۆا رۋمىنيالىق سورانا كيرستياندى 2:6, 7:5, 6:4 ەسەبىمەن جەڭسە, ۋكراينالىق تەننيسشى كاتەرينا بوندارەنكو فرانتسيالىق اليزە كورنەنيدەن 4:6, 6:2, 6:4 ناتيجەسىمەن باسىم ءتۇستى.
ايتا كەتەيىك, پۋتينتسەۆا جۋىردا عانا اياقتالعان فرانتسيا اشىق چەمپيوناتىنىڭ شيرەك فينالىنا دەيىن جەتىپ, WTA رەيتينگىندە 56-ورىنعا دەيىن كوتەرىلگەن-ءدى.
دايىنداعان ءالي بيتورە,
«ەگەمەن قازاقستان»
