تاريح ولشەمىمەن قاراعاندا ازعانتاي عانا ۋاقىتتا العاشقىدا مۇمكىن ەمەستەي كورىنگەن ويلار جۇزەگە استى. ارينە بۇل جەردە تەك عالامات قۇرىلىستىڭ قارقىنىن عانا ەمەس, ونىمەن قاپتالداسا جۇرەتىن ينجەنەرلىك, الەۋمەتتىك, قارجىلىق ساياسي ماقساتتار مەن كەشەندى وزگە دە پروبلەمالاردى ايتىپ وتىرمىن.
ادەتتە ماعان زاماناۋي قازاقستاننىڭ رۋحى مەن مازمۇنىن اشاتىن ايرىقشا بەلگىسى نە دەگەن ساۋال بەرىلگەن كەزدە, ويلانباستان ايتاتىن جاۋابىم بىرەۋ – استانا! جاڭا مىڭجىلدىق قارساڭىندا سايىن دالانىڭ توسىندە پايدا بولعان قازاقستاننىڭ استاناسى بۇگىندە الەمدىك قالا قۇرىلىسىنىڭ وزىق ۇلگىلەرىنىڭ ءبىرى بولىپ تانىلدى. ول قازاق جەرىنىڭ ەجەلگى رۋحى مەن حالىق ءداستۇرىنىڭ تەرەڭدىگىنە بويلاي وتىرىپ, قالا قۇرىلىسىندا, قالانى جوسپارلاۋدا الدىڭعى قاتارلى ساۋلەت يدەيالارىن سىڭىرە ءبىلدى.
بۇگىنگى استانا – وتە ساۋلەتتى, جايلى جانە دوستارىنا قۇشاعى اشىق, كەلگەن سايىن ىنتىقتىرىپ, قۋانتىپ تۇراتىن قالا.
استانانىڭ ىسكەرلىك ىرعاعىنا ءتۇسىپ, كەڭ كوشەلەرىندە, وزەن جاعالاۋىندا, ساياباقتارىندا قىدىرىستاپ, مۋزەيىنە جانە ءوزىم كورگەندەردىڭ ىشىندەگى ەڭ عاجايىپ تەاترىنا بارۋدىڭ ءوزى ءبىر عانيبەت.
استاناعا كەلگەن سايىن ءبىر تىڭ جاڭالىقتىڭ كۋاسى بولاتىنىم راس – قازاقستاننىڭ استاناسى ءوسىپ-وركەندەپ, دامىپ قانا قويماي, قارجى, ىسكەرلىك, ساياسي سالالاردا الەمدىك بەدەلى جوعارىلاپ كەلەدى.
ءدال وسى جەردە اۋقىمدى حالىقارالىق فورۋمدار وتەدى جانە بۇعان ەۋروپا مەن ازيانىڭ, وڭتۇستىك پەن سولتۇستىكتىڭ تۇيىسەتىن تۇسىندا ورنالاسقان گەوگرافيالىق قولايلى ورنالاسۋى دا سەبەپ بولسا كەرەك.
استانا كەز كەلگەن قالىپتاعى, بارلىق دەڭگەيدەگى اۋقىمدى شارالاردى شەبەر ۇيىمداستىرىپ, كۇن تارتىبىنە حالىقارالىق ساياساتتىڭ كۇردەلى ماسەلەلەرىن جانە نەگىزگى سالالاردىڭ بولاشاعى, جاڭا تسيفرلى تەحنولوگيالار, «جاسىل ەكونوميكا» ءتارىزدى وزەكتى تاقىرىپتاردى شىعارىپ كەلەدى.
مەن نۇرسۇلتان ءابىش ۇلىنىڭ ۇزەڭگىلەستەرىنىڭ ورتاسىندا بولعان ساتتەرىمدە جاڭا استانانى سالۋ جوسپارىن جۇزەگە اسىرۋدا كوپتەگەن قيىندىقتاردىڭ قالاي ەڭسەرىلگەندىگىن تالاي ەستىدىم.
سول اۋقىمدى ماقساتتارعا جەتۋ تەك ساياسي جىگەرلى, باسشىلىق قىزمەتتە تاجىريبەسى مول, مەملەكەت قۇرىلىسىن تەرەڭ تۇسىنەتىن جانە ۇعىناتىن, الداعى ونجىلدىقتاردى ءدال بولجاي بىلەتىن ناعىز كوشباسشىنىڭ عانا قولىنان كەلەدى.
وسى ءساتتى پايدالانا وتىرىپ, استاناعا, ەل پرەزيدەنتىنە, وسىناۋ تاماشا قالانىڭ تۇرعىندارىنا, بارشا قازاقستاندىقتاردىڭ گۇلدەنۋىنە, جاڭا تابىستارعا جەتۋىنە, نۇرسۇلتان ءابىش ۇلى نازارباەۆتىڭ وسىدان بىرنەشە جىل بۇرىن جوباسىن ءوز قولىمەن سىزعان «بولاشاقتىڭ قالاسى» سياقتى وزگە دە باتىل شەشىمدەرى مەن ارماندارى ورىندالا بەرۋىنە تىلەكتەستىك بىلدىرەمىن.
ولەگ سوسكوۆەتس,
رەسەي تاۋار وندىرۋشىلەر وداعىنىڭ پرەزيدەنتى
