نۇرسۇلتانوۆتىڭ كەزەكتى جەڭىسى
قازاقستاندىق كاسىپقوي بوكسشى مەيىرىم نۇرسۇلتانوۆ (7-0-0,6 KO) اقش-تىڭ لوس-اندجەلەس قالاسىندا وتكەن بوكس كەشىندە شارشى الاڭعا شىعىپ, جەتىنشى جەڭىسىنە قول جەتكىزدى.
التى راۋندقا جوسپارلانعان كەزدەسۋدە وتانداسىمىز مەكسيكالىق بوكسشى حوسە وباندومەن جۇدىرىقتاسىپ, التىنشى راۋندتا تەحنيكالىق نوكاۋتپەن جەڭدى. جەكپە-جەكتىڭ اياقتالۋىنا بىرنەشە سەكۋند قالعاندا نۇرسۇلتانوۆ قارسىلاسىن قىسپاققا الىپ, سەريالى سوققىلار جاسادى. مەكسيكالىق بوكسشىنىڭ شاراسىز قالعانىن بايقاعان تورەشى كەزدەسۋدى مەرزىمىنەن بۇرىن توقتاتۋعا ءماجبۇر بولدى.
وسىلايشا, وتانداسىمىز كاسىپقوي بوكستاعى جەتىنشى جەڭىسىن تويلاسا, ونىڭ التاۋىن مەرزىمىنەن بۇرىن اياقتادى. ول كاسىپقوي بوكستاعى دەبيۋت جەكپە-جەگىندە عانا تولىق جۇدىرىقتاسىپ, تورەشىلەردىڭ شەشىمى بويىنشا ۇپاي سانىمەن جەڭىسكە جەتكەن ەدى.
«رەال» جاس قاقپاشىمەن تولىقتى
ءمادريدتىڭ «رەال» كلۋبى لۋگانسكىنىڭ «زاريا» كومانداسىنىڭ قاقپاشىسى اندرەي ءلۋنيندى ساتىپ الدى. بۇل تۋرالى كلۋبتىڭ رەسمي سايتى مالىمدەدى.
19 جاستاعى قاقپاشىنىڭ «رەال» كومانداسىمەن اراداعى كەلىسىمشارتى التى جىلعا جوسپارلانعان. بۇعان دەيىن «Marca» باسىلىمى «رەال» لۋنين ءۇشىن 14 ملن ەۋرو تولەگەنى تۋرالى اقپارات تاراتقان بولاتىن.
لۋنين «زاريا» قاقپاسىن 2017 جىلدان بەرى قورعاپ كەلگەن-ءدى. 2017/18-جىلعى ماۋسىمدا ول كلۋبتىڭ ەڭ ۇزدىك فۋتبولشىسى دەپ تانىلعان. وتكەن ماۋسىمدا ول كوماندا ساپىندا 36 رەت جاسىل الاڭعا شىعىپ, 10 ويىندا قاقپاسىنا گول جىبەرمەگەن.
ازيا چەمپيوناتى قازاقستاندا وتەدى
قاتار استاناسى دوحادا وتكەن ازيا اۋىر اتلەتيكا فەدەراتسياسىنىڭ اتقارۋ كوميتەتىنىڭ وتىرىسىنا قازاقستان اۋىر اتلەتيكا فەدەراتسياسىنىڭ وكىلدەرى قاتىسىپ, 2020 جىلعى قۇرلىقتىق چەمپيوناتتى وتكىزۋ تۋرالى نيەتىن راستادى.
سونداي-اق وتىرىس كەزىندە ازيا قۇرلىعىندا اۋىر اتلەتيكانى دامىتۋ ماسەلەسى, 2018 جىلعى جازعى ازيا ويىندارىنا جانە 2019 جىلى ءۇندىستاندا وتەتىن ازيا چەمپيوناتىنا دايىندىق بارىسى تالقىلاندى. شارا بارىسىندا قازاقستاندىق تاراپ IWF جانە AWF باسشىلىعىمەن كەزدەسۋ وتكىزدى. وندا قازاقستان 2020 جىلعى وليمپيا ويىندارىنىڭ كۆاليفيكاتسيالىق ەرەجەلەرىنە سايكەس كۆوتا كولەمىن قىسقارتۋ ماسەلەسىنە قاتىستى ءوز پىكىرىن ءبىلدىردى.
ايتا كەتەيىك, بۇعان دەيىن 2004, 2009 جانە 2013 جىلدارى ءۇش مارتە قۇرلىق بىرىنشىلىگى قازاقستاندا وتكەن بولاتىن.
دايىنداعان ءالي بيتورە,
«ەگەمەن قازاقستان»
