تۇركىستاننىڭ تاريح تەگەرشىگىندە جاڭا ءبىر بەلەسكە, دالىرەك ايتساق ءوز ارناسىنا قايتا ورالۋى, قايتادان ۇلتتى ۇيىستىراتىن ايماققا اينالعانى, وبلىستىق دارەجەگە كوتەرىلىپ, كەلەشەكتە تۇركى الەمىنىڭ, ءتىپتى شىعىس حالىقتارىنىڭ مادەنيەتى مەن ونەرىنىڭ قايتادان وركەن جايىپ, قاينار بۇلاعىنا اينالاتىنى مارتەبەسى بيىك بولعان ولكەنىڭ قۋاتى مەن الەۋەتىنىڭ قانشالىقتى مول ەكەنىن تانىتىپ وتىر.
تۇركىستاننان حالقىمىز ازىرەت سۇلتان دەپ قۇرمەت تۇتاتىن قوجا احمەت ياساۋيگە ماۆزولەي ورناتىپ, اتا-بابامىزدىڭ مادەني اعىنىن ءبىر ارناعا ءتۇسىرىپ, كەلەشەكتەگى قازاقتىڭ التىن قازىعى ەتىپ بەلگىلەۋىن ءبىز بۇگىنگى تاۋەلسىزدىگىمىزدىڭ سەنىمدى ءدىڭى دەپ باعالايمىز. قوجا احمەت ياساۋي – وزىنە دەيىنگى دامىپ كەلگەن مىڭجىلدىقتار مادەنيەتىن ءبىر بويىنا جيىپ, كەلەر ۇرپاققا مادەنيەت پەن ونەردىڭ سان سالالى باستاۋ تۇمالارىن اشىپ كەتكەن ءبىرتۋار تۇلعا. ول تۇمالار – قازاقتىڭ تاۋسىلماس قاسيەتتى ءدىلى.
ەلباسىنىڭ استانانى ەلىمىزدىڭ جۇرەگى, مەملەكەتىمىزدىڭ تىرەگى ەتىپ قالىپتاستىرۋداعى ءاربىر قادامى قازاقستاننىڭ باياندى بولاشاعىنىڭ كەپىلىنە اينالدى.
بۇل ورايدا ەلوردامىز استانانىڭ 20 جىلدىق مەرەيتويىندا تۇركىستاننىڭ جاڭا وبلىستىق ورداعا اينالۋى – تاريحتا التىن ارىپتەرمەن جازىلاتىن ەرەكشە تاريحي شەشىم بولدى!
تۇركىستان وبلىسىن قۇرۋ بويىنشا قابىلداعان ەلباسىنىڭ جارلىعى سانامىزعا سەرپىلىس بەرىپ, ءوزىمىزدىڭ رۋحاني الەمىمىزدە ءۇنسىز جادىگەرگە اينالىپ بارا جاتقان تاريحي-مادەني مۇرالارىمىز بەن ونەرىمىزدىڭ كاۋسارىمەن سۋا-
رىپ, ءدىلىمىزدى وياتتى. «رۋحاني جاڭعىرۋ» باعدارلاماسىنىڭ تاعى ءبىر تاماشا تابىسى – تۇركىستاننىڭ وبلىس ورتالىعىنا اينالۋى بولدى.
قاي قازاقتان سۇراساڭىز دا, ونىڭ اتا-باباسى, مىندەتتى تۇردە, قوجا احمەت ءياساۋيدىڭ مازارىنا بارىپ ءتاۋ ەتكەن, ءبىلىم العان, سول رۋحاني كاۋساردان قانىپ سۋ ىشكەن قاسيەتتى ادام بولىپ شىعادى. بۇل اقيقاتتى اۋىزشا ءجون سۇراسۋدىڭ عانا ەنشىسىنە بەرىپ قويماي, ءار قازاق ءۇشىن تۇركىستان قاسيەتتى بولاتىن قايتا جاڭعىرعان تاريح اقپاراتىنا اينالۋى ءتيىس. تۇركىستانعا بارماعان قازاقتىڭ بولاشاقتا دا بولمايتىنىن كوزدەپ, مادەنيەتتىڭ قالىپتاسقان ورداسىنان باتا الۋىن تاماشا تۋريستىك جولمەن ۇيىمداستىرۋىمىز كەرەك.
ەندىگى ءبىزدىڭ مىندەت – «تۇما كورسەڭ, كوزىن اش» دەپ, اتا-بابامىز قاعيدا ەتىپ كەتكەن رۋحاني بۇلاقتاردىڭ كوزىن اشۋ.
قازاقستاننىڭ ءاربىر ايماعى, ءاربىر جەر-سۋى, ءتىپتى توپىراعىنىڭ ءاربىر قيىرشىعى – تاريحتا جەر بەتىنە وركەنيەتتىڭ ساۋلەسىن تاراتقان ادامداردىڭ باسىپ وتكەن ىزدەرىن «تاڭبالاپ» قالعان, ارقايسىسى ماڭدايعا تيگىزىپ ءتاۋ ەتەرلىك قاسيەتتى جادىگەر. تۇركىستاننىڭ, وسىناۋ ساكرالدى, قاستەرلى دە قاسيەتتى ايماقتىڭ ءوز الدىنا مەملەكەتتىك دەڭگەيدە ۇلكەن دارەجە الۋى – قازاقتىڭ عانا ەمەس, ءيىسى ءبىر تۇركى جۇرتىنىڭ, ءتىپتى كورشىلەس شىعىس ەلدەرىنىڭ دە باسىن يدىرگەن الىپ تۇلعالاردىڭ تۋعان جەرىنە دەگەن ەرەكشە قۇرمەتىمىز بولىپ تابىلادى.
سول تۇلعالاردىڭ ءىزىن ءتىرىلتۋ ارقىلى جاڭا ۇرپاق قازاق مادەنيەتىنىڭ زايىرلىلىعىن, ىزگىلىگىن, تاريحي ساباقتاستىعىن, ونىڭ جالپىادامزاتتىق وركەنيەتپەن بايلانىسىن, مۇمكىن, بەسىگى بولعانىن دالەلدەيتىن وزدەرىنىڭ ومىردەگى يگى جولدارىن قالىپتاستىرا الادى.
1500 جىلدان استام تاريحى بار, قازاق حاندىعىنىڭ استاناسى بولعان, شارتاراپقا كەتكەن كەرۋەن جولدارىنىڭ توعىسقان جەرى, ۇلى جىبەك جولىنىڭ ورتالىعىنا اينالعان تۇركىستان قالاسى تۋرالى ەلباسى ن.ءا.نازارباەۆ: ء«اربىر حالىق, ءاربىر تاۋەلسىز مەملەكەت ءوزىنىڭ رۋحاني ورتالىعىن ناقتىلاپ الۋى كەرەك. قازاقستاننىڭ رۋحاني ورتالىعى تۇركىستان», – دەپ باعا بەرگەن بولاتىن.
ەلىمىزدىڭ رۋحاني وركەنيەتتى ورتالىعى بولۋىنا بىرلەسىپ اتسالىسۋ كوپتىڭ الدىنداعى مىندەت.
قۋاتجان ۋاليەۆ,
قازاقستان رەسپۋبليكاسى
مادەنيەت جانە سپورت مينيسترلىگىنىڭ جاۋاپتى حاتشىسى
