وسىنداي جاعداي كوممۋنالدىق كاسىپورىنداردىڭ جۇمىسىن جاقسارتۋ ءۇشىن ۇكىمەتتىڭ جۇيەلى جانە كەشەندى شارالار قابىلداۋىن تالاپ ەتەدى. بۇرىنعى تالاپتاردىڭ قاتتى بولماۋىنان ۇيلەرىن ساتىپ جىبەرگەن كەيبىر بۇرىنعى قوجايىنداردىڭ قارىزدارىن قايتارۋ دا قيىنعا تۇسۋدە.
كوممۋنالدىق كاسىپورىنداردىڭ تۇرعىندار قارىزدارىنىڭ ەسەبىنەن ءوسىپ جاتقان دەبيتورلىق قارىزدارى ولاردىڭ ءوز ۇسىنۋشىلارىمەن ەسەپ ايىرىسۋىنا, ۋاقتىلى جوندەۋ-جاڭالاۋ جۇمىستارىن جۇرگىزۋىنە قولبايلاۋ بولۋدا. سونىمەن بىرگە ولاردىڭ قوسىمشا قارجى كوزدەرىن تابۋ مۇمكىنشىلىكتەرى دە شەكتەۋلى بولىپ وتىر.
كوممۋنالدىق كاسىپورىنداردىڭ قوسىمشا قاراجات تابۋى ءۇشىن ولارعا ءوز ىستەرىنەن باسقا ارەكەتتەرمەن اينالىسۋىنا جول بەرۋ ورىندى. قازاقستان رەسپۋبليكاسىنىڭ «تابيعي مونوپوليالار تۋرالى» زاڭىنىڭ 18-بابىنا سايكەس ولارعا ءوز جۇمىستارىمەن تەحنولوگيالىق تۇرعىدان بايلانىسى بار جۇمىستارمەن اينالىسۋعا مۇمكىندىك بەرىلگەن. سونىمەن بىرگە وسى جۇمىستاردىڭ ءتىزىمى دە جاسالعان. ول: سۋدى حيميالىق جولمەن تازالاۋ جانە ونى ساتۋ, ەلەكتر ەنەرگياسىن ءوندىرۋ, جىلۋ جۇيەلەرىن گيدراۆليكالىق جانە تەمپەراتۋرالىق سىناقتاردان وتكىزۋ, جىلۋ نىساندارىنا جوندەۋ جاساۋ جانە ولارعا تەحنيكالىق قىزمەتتەر كورسەتۋ جانە ت.ب. الايدا كوممۋنالدىق كاسىپورىندار كۆازيمەملەكەتتىك سەكتورعا جاتاتىندىقتان ولارعا كاسىپكەرلىك كودەكسىنىڭ 192-بابىنا سايكەس اكتسيالارىنىڭ ەلۋ پايىزدان ارتىعى مەملەكەتكە تيەسىلى زاڭدى تۇلعالار اتقاراتىن تىزىمدەگى جۇمىستاردى عانا اتقارۋعا رۇقسات بەرىلگەن. بۇل ءتىزىم ۇكىمەتتىڭ 2015 جىلعى 28 جەلتوقسانداعى №1095 قاۋلىسىمەن بەكىتىلگەن. وندا كوممۋنالدىق كاسىپورىنداردىڭ نەگىزگى ارەكەتتەرىمەن تەحنولوگيالىق تۇرعىداعى قىزمەتتەر قاراستىرىلماعان. ءسويتىپ, جەس-تەر تابيعي مونوپوليالار سۋبەكتىلەرىنە جاتاتىندىقتان وزدەرىنىڭ نەگىزگى ارەكەتتەرىمەن تەحنولوگيالىق تۇرعىداعى باسقا جۇمىستاردى اتقارۋعا زاڭدى نەگىزگە يە بولا تۇرا, وسى مۇمكىندىكتەرىن پايدالانا الماۋدا.
سوندىقتان ءبىز ۇكىمەت باسشىسى باقىتجان ساعىنتاەۆتىڭ اتىنا دەپۋتاتتىق ساۋال جولداپ, وسى ماسەلەلەردىڭ شەشىلۋىنە ىقپال ەتۋىن سۇرادىق. سونىڭ ىشىندە تۇرعىنداردىڭ قارىزدارىن ءوندىرىپ الۋدىڭ زاڭدى نەگىزدەرىن جاساپ, سونىمەن قاتار 2015 جىلدىڭ 28 جەلتوقسانىنداعى №1095 قاۋلىمەن بەكىتىلگەن ءتىزىمدى دە قايتا قاراپ, ونىڭ كوممۋنالدىق كاسىپورىنداردىڭ قوسىمشا جۇمىستار اتقارۋىنا مۇمكىندىك بەرۋدى قاراستىرۋ قاجەت.
شاۆحات وتەمىسوۆ,
ءماجىلىس دەپۋتاتى
