ازاماتتاردىڭ قۇقىقتارى مەن بوستاندىقتارىن قورعاۋدان باستاپ, قۇقىق قورعاۋ, توتەنشە جاعدايلاردىڭ الدىن الۋ جانە سالدارىن جويۋ, تۇزەتۋ مەكەمەلەرىن باسقارۋ ءتارىزدى جانە باسقا دا ەڭ وزەكتى سالالاردىڭ باسىن بىرىكتىرىپ وتىرعان مينيسترلىكتىڭ الدىنا قويىلعان مىندەت تە اۋقىمدى. وسىدان 26 جىل بۇرىن 23 ماۋسىمدا قۇرىلعان قۇرىلىم بۇگىندە ەلىمىزدەگى ەڭ ءىرى مينيسترلىك بولىپ وتىر.
رەسمي دەرەكتەرگە قاراعاندا, تاۋەلسىزدىك جىلدارىندا ىشكى ىستەر ورگاندارىنىڭ 850 قىزمەتكەرى قىزمەتتىك مىندەتتەرىن وتەۋ كەزىندە, قىلمىسكەردى ۇستاۋ كەزىندە قازا تاپقان. سونىمەن قاتار قىزمەتتىك مىندەتتەرىن وتەۋ كەزىندە پوليتسيانىڭ 2320 قىزمەتكەرى جاراقات العان.
شارا قىزمەتتىك بورىشىن وتەۋ كەزىندە قازا تاپقان ارىپتەستەردى ءبىر مينۋت ءۇنسىز ەسكە الۋمەن باستالدى.
سونداي-اق مونۋمەنت الدىندا ىشكى ىستەر مينيسترلىگىنىڭ جوعارى وقۋ ورىندارىن ۇزدىك تامامداعان تۇلەكتەرگە – لەيتەنانت پوگوندارىن تابىستاۋ ءراسىمى دە ءوتتى. قالمۇحانبەت قاسىموۆتىڭ قولىنان العاشقى شەنىن العانداردىڭ ءبىرى – نارگيز جاقسىلىقوۆا ءىىم ب.بەيسەنوۆ اتىنداعى قاراعاندى اكادەمياسىنىڭ تۇلەگى.
– مەن بۇل سالانى بەكەردەن-بەكەر تاڭداعان جوقپىن. مەكتەپتە وقىپ جۇرگەنىمدە تۋعان اۋىلىمدا اۋىر قىلمىس تىركەلىپ, ول اشىلماي قالدى. ال قىلمىسكەردىڭ قولىنان قازا تاپقان كەلىنشەكتىڭ قىزىن جاقسى تانيتىنمىن. وسى جاعداي ماعان قاتتى اسەر ەتتى. قۇربىمنىڭ كۇيزەلىسىن كورىپ, مەكتەپ بىتىرگەن سوڭ پوليتسيا قىزمەتكەرى بولۋدى ويلادىم. ءسويتىپ ەلىمىزدە قۇقىقتىق ءتارتىپتىڭ ساقتالۋىنا, قىلمىستاردى بولدىرماۋعا كۇش سالعىم كەلدى. مىنە, بۇل ارمانىما دا جەتتىم, – دەيدى جاس لەيتەنانت.
نارگيز بۇگىندە جۇمىسقا ورنالاسىپ تا ۇلگەرگەن. ول شىعىس قازاقستان وبلىستىق ىشكى ىستەر باسقارماسىنا قاراستى ەرتىس پوليتسيا بولىمىندە تەرگەۋشى بولىپ قىزمەت ەتۋدە.
جالپى, بيىل ءىىم جوعارى وقۋ ورىندارىن تامامداعان 1070 تۇلەك لەيتەنانت شەنىن الىپ, تۇگەلدەي جۇمىسقا ورنالاستىرىلعان.
ءىس-شارادان سوڭ ىشكى ىستەر ءمينيسترى قالمۇحانبەت قاسىموۆ مينيسترلىكتىڭ كلۋبىندا ارىپتەستەرىن كاسىبي مەرەكەلەرىمەن قۇتتىقتاپ, قىزمەتتەرىن ادال ورىنداۋدا كوزگە تۇسكەن بىرقاتار پوليتسەيلەردى سالتاناتتى جاعدايدا ماراپاتتاپ, ىزگى تىلەكتەرىن جەتكىزدى. بيىل ىشكى ىستەر سالاسىندا اۋقىمدى رەفورمالاردىڭ تاعى ءبىر لەگى باستالاتىندىعىن جەتكىزدى جانە الداعى قۇرىلىمدىق وزگەرىستەر جايىندا بايان ەتتى.
وسى كۇنى ورتالىق اپپاراتتىڭ جانە اۋماقتىق بولىنىستەردىڭ 854 قىزمەتكەرى قىزمەتتىك مىندەتتەرىن ادال ورىنداعانى ءۇشىن ماراپاتتالدى.
كەش سوڭىندا جينالعاندار نازارىنا الماتى قالاسى ءىىد مەن ۇلتتىق ۇلان كوركەمونەرپازدارى دايارلاعان مەرەكەلىك كونتسەرت ۇسىنىلدى.
سەرىك ابدىبەك,
«ەگەمەن قازاقستان»
