1999 جىل
10 قاڭتار – قازاقستان پرەزيدەنتىنىڭ كەزەكتى سايلاۋى ءوتىپ, 5 846 817 سايلاۋشىنىڭ داۋىسىن جيناعان ن.ءا.نازارباەۆ جەڭىسكە جەتتى.
18 قاڭتار – استانا قالاسىندا حالىقارالىق ءبىلىم ستاندارتىنا ساي «ميراس» حالىقارالىق مەكتەبىنىڭ العاشقى ىرگەتاسى قالاندى. وعان ەلباسى نۇرسۇلتان نازارباەۆتىڭ ءوزى قاتىسىپ, جينالعان كوپشىلىككە, ىرگەسى قالانىپ جاتقان مەكتەپتە ەلىمىزدەگى ەڭ دارىندى, زەرەك بالالار وقيتىن بولادى, دەگەن ەدى. بۇل مەكتەپ قازىر حالىقارالىق باكالاۆريات (IB), باستاۋىش (PYP), نەگىزگى (MYP) جانە جوعارعى (DP) مەكتەپ باعدارلامالارى بويىنشا اۆتوريزاتسيادان وتكەن تۇڭعىش وقۋ ورنى رەتىندە بەلگىلى.
20 قاڭتار – ن.ءا.نازارباەۆتىڭ قازاقستان رەسپۋبليكاسىنىڭ پرەزيدەنتى لاۋازىمىنا كىرىسۋىنە بايلانىستى يناۋگۋراتسيالىق – ۇلىقتاۋ سالتاناتى كونگرەسس-حولدا (قازىرگى «استانا» كونتسەرت زالى) وتكىزىلدى. ورتالىق سايلاۋ كوميسسياسىنىڭ ءتورايىمى زاعيپا باليەۆا سالتاناتتى جاعدايدا قازاقستان رەسپۋبليكاسى پرەزيدەنتىنىڭ كۋالىگىن تاپسىردى. ەلباسى اتا-بابا جولىمەن اق كيىزدىڭ ۇستىندە تۇرىپ انت بەردى. ودان كەيىن حالىققا ءوزىنىڭ جۇرەكجاردى لەبىزىن جەتكىزدى.
20 اقپان – ەلىمىزدىڭ باس باسىلىمى «ەگەمەن قازاقستان» گازەتى ەلورداعا قونىس اۋداردى. ۇجىمدى ۇلتتىق ءباسپاسوز ءباھادۇرى شەرحان مۇرتازا مەن سول كەزدەگى باسىلىم باسشىسى ەرجۇمان سمايىل باستاپ كەلدى. وسى ءبىر تاريحي ءساتتىڭ ماڭىزى جايلى شەرحان اعامىز: «استاناعا تەك «ەگەمەن قازاقستان» گازەتى كوشىپ كەلگەن جوق, ونىمەن بىرگە ساكەن, تۇرار, سماعۇل, عابيت سياقتى ۇلىلار رۋحى ورالدى» دەدى.
13 ناۋرىز – مىسىر ەلىنىڭ ورتالىعى الەمدەگى ەڭ كونە شاھاردىڭ ءبىرى كاير قالاسى مەن عالامنىڭ جاڭا ءشارى استانا اراسىندا دوستىق پەن ىنتىماقتاستىق تۋرالى كەلىسىمگە قول قويىلىپ, وسى وقيعامەن قاناتتاس پەرعاۋىندار ەلىنىڭ استاناسىنداعى ءبىر كوشەگە ابايدىڭ اتى بەرىلدى.
8 ءساۋىر – بۇعان دەيىن ەل استاناسى جانە وبلىس ورتالىعى رەتىندە قاتار تانىلىپ كەلگەن استاناعا جەكە مارتەبە بەرۋ ءۇشىن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ شەشىم قابىلداپ, اقمولا وبلىسىنىڭ اكىمشىلىك ورتالىعىن استانا قالاسىنان كوكشەتاۋ قالاسىنا كوشىرىلدى. سونىمەن قاتار وسى كۇنى استانا اتىنا لايىق جاڭا اۋەجايدىڭ قۇرىلىسى اياقتالىپ, ونىڭ اشىلۋ سالتاناتى ءوتتى.
29 ءساۋىر – استانا قالاسىندا تۇڭعىش رەت رەسپۋبليكالىق دارەجەدە اقىندار ايتىسى باستالدى. مەملەكەتتىك حاتشى ءابىش كەكىلباەۆتىڭ القاۋ باتاسىمەن باستالعان ءسوز سايىسىنا ەسكىكوز اقىندار كوكەن شاكەەۆ, قاليحان التىنباەۆ باستاعان 22 جۇيرىك قاتىستى. باس جۇلدەگە تىگىلگەن جەڭىل كولىك قوستانايلىق جىر زەرگەرى ءاسيا بەركەنوۆاعا بۇيىردى.
23 مامىر – ەلوردا تورىندە العاش رەت «استانا ارۋى» بايقاۋى ءوتتى. بۇعان ءار تاراپتان ىرىكتەلىپ الىنعان 17-25 جاس ارالىعىنداعى 30 بويجەتكەن قاتىسىپ, قازىلار القاسى باس قالانىڭ بايىرعى مەكتەبى جامبىل اتىنداعى №4 قازاق گيمنازياسىنىڭ 10 سىنىپ وقۋشىسى اينۇر يسمايلوۆانى جەڭىمپاز دەپ تانىدى.
10 ماۋسىم – استانا قالاسى ءبىر جىلدىق مەرەكەسىن سالتاناتپەن اتاپ ءوتتى. وسى شارامەن ورايلاستىرىپ ەلباسى نۇرسۇلتان نازارباەۆ قالادا شاعىن جانە ورتا كاسىپكەرلىكتى دامىتۋ ماقساتىندا اكتسيالارىنىڭ 90 پايىزى مەملەكەت مەنشىگىندە بولاتىن تەحنوپارك اشتى.
15 شىلدە – مەملەكەت باسشىسى نۇرسۇلتان نازارباەۆ ەلىمىزگە رەسمي ساپارمەن كەلگەن مولدوۆا رەسپۋبليكاسىنىڭ پرەزيدەنتى پەتر لۋچينسكيمەن كەزدەسىپ, وعان قالالىق ءماسليحاتتىڭ شەشىمىمەن «استانا قالاسىنىڭ قۇرمەتتى ازاماتى» اتاعىن بەرىلدى.
16 شىلدە – بوليۆيا استاناسى لا-پاس قالاسىندا يۋنەسكو-نىڭ شەشىمىمەن ەلورداعا «قالالار بەيبىتشىلىك ءۇشىن» سىيلىعى بەرىلدى. وسى ۋاقىتتان باستاپ قازاقستاننىڭ استاناسى «بەيبىتشىلىك قالاسى» دەپ اتالادى.
28 شىلدە – استانا قالاسىندا «SOS Kinderdorf International» حالىقارالىق قورىنىڭ قولداۋىمەن ءتورت گەكتار اۋماقتى الىپ جاتقان وتباسىلىق ۇلگىدەگى 12 ءۇيلى بالاباقشا تيپتەس مەديتسيالىق ورتالىق پايدالانۋعا بەرىلدى.
6 تامىز – ق.مۇڭايتپاسوۆ اتىنداعى ورتالىق ستاديوندا جالپىحالىقتىق مادەني شارا ۇيىمداستىرىلىپ, ول جىر الىبى – جامبىلدىڭ نەمەرەسى الىمقۇل اقساقالدىڭ جىر-باتاسىمەن اشىلدى.
7 تامىز – استانادا ەلباسى نۇرسۇلتان نازارباەۆتىڭ قاتىسۋىمەن گولف كلۋبى اشىلىپ, مەملەكەت باسشىسى العاشقى دوپتى سوعۋ ءراسىمىن جاسادى.
1 قىركۇيەك – ءبىلىم كۇنىنە وراي ق.مۇڭايتپاسوۆ اتىنداعى ورتالىق ستاديوندا ەلباسى نۇرسۇلتان نازارباەۆ وسى جىلى مەكتەپ تابالدىرىعىن اتتاۋعا ءتيىس بالدىرعاندارمەن كەزدەستى.
19 قاراشا – قالالىق ءماسليحاتتىڭ شەشىمىمەن ايگىلى ءانشى بيبىگۇل تولەگەنوۆاعا «استانا قالاسىنىڭ قۇرمەتتى ازاماتى» اتاعى بەرىلدى.
15 جەلتوقسان – تاۋەلسىزدىك مەرەكەسى قارساڭىندا ەلوردانىڭ اباي جانە جەڭىس داڭعىلدارى قيىلىسىندا اۋماعى 32 مىڭ شارشى مەتر, 12 قاباتتان تۇراتىن قارجى مينيسترلىگىنىڭ ساۋلەتى دە ەڭسەلى عيماراتى پايدالانۋعا بەرىلىپ, شاراعا ەلباسىنىڭ ءوزى كەلىپ قاتىستى.
دايىنداعان بەكەن قايرات ۇلى,
«ەگەمەن قازاقستان»
