ەلىمىزدىڭ ۇلتتىق ويىنىنا الەمنىڭ تۇكپىر-تۇكپىرىنەن 20 مەملەكەتتىڭ 80 سپورتشىسى قاتىسادى, ولاردىڭ قاتارىندا ليتۆا, رەسەي, فرانتسيا, پولشا, تۇركيا, اۆستريا, سەربيا, كيپر, ءازىربايجان, يرلانديا جانە ت.ب. بار.
سايىستا ەۋروپانىڭ ايتۋلى سپورتشىلارى باق سىناسادى. اتاپ ايتساق, پولشانىڭ بىرنەشە دۇركىن چەمپيونى پەتر توماش تالاچ, دزيۋدودان ەۋروپا چەمپيونى گۋرام تۋشيشۆيلي جانە تاعى باسقالارى بار.
ەسكە سالا كەتەيىك, قازاق كۇرەسىنەن ەۋروپا چەمپيوناتى العاش رەت ءوتىپ جاتىر. بۇل تۋرالى ەۋروپا كۇرەس فەدەراتسياسىنىڭ پرەزيدەنتى كارەن ارۋتيۋنيان بىلاي دەدى: "ەۋروپا ەلدەرىنەن وسى ءتۋرنيردى وتكىزۋ قۇقىعىن گرۋزيا جەڭىپ الدى. سەبەبى گرۋزيا - بالۋاندار ەلى. توعىز سالماق بويىنشا 1-ورىنعا 1000, 2-ورىنعا 700, 3-ورىنعا 500, ءابسوليۋتتى سالماق دارەجەسىنە 3000, 1-2-ءشى ورىندارعا 2000, 3-ورىنعا 1000 دوللار اقشالاي سىيلىق تابىستالادى. كوبىنەسە دزيۋدوشىلار قاتىسىپ جاتىر. ءبىز كۇرەستىڭ دزيۋدومەن قاتار تۇرعانىن قالايمىز".
سونىمەن قاتار, قازاق كۇرەسىنەن حالىقارالىق فەدەراتسياسىنىڭ باس ديرەكتور كەڭەسشىسى ۇلان رىسقۇل ۇلتتىق سپورت ءتۇرىنىڭ ەۋروپادا ناسيحاتتالۋى ءۇشىن جۇمىس جاساپ جاتقانىن ايتتى.
«بۇل تۋرنير كارى قۇرلىق سپورتشىلارىنىڭ اراسىندا ءوتىپ جاتىر. سوندىقتان, قازاق بالۋاندارى قاتىسپايدى. قازاق كۇرەسىنەن جاقىندا عانا ەۋروپا فەدەراتسياسى اشىلدى. قازاقستاننان التى تورەشى, شەتەلدەن ون تورەشى كەلدى. جارىس باستالماس بۇرىن قازاق كۇرەسى سايىسىندا قالاي تورەلىك ەتۋ تۋرالى ماستەر-كلاسس, سپورتشىلار اراسىندا ەرەجەلەرى جونىندە سەمينار وتكىزدىك», - دەدى.
سونداي-اق, قارا تەڭىزدىڭ جاعاسىندا ءوتىپ جاتقان چەمپيوناتتا 100+ سالماق دارەجەسىندە ۋكراينالىق لەونيد حاسيۋك اتتى دزيۋدوشى العاش رەت قازاقشا كۇرەسپەكشى.
"دزيۋدومەن اينالىسامىن. الەم چەمپيوناتىنا دا بارۋىم مۇمكىن. مەن ءالى كۇرەسىپ كورمەدىم, تەك ۆيدەودان قاراپ ۇيرەندىم. بۇگىن العاش رەت بەلدەسەمىن",- دەدى سپورتشى.
ايتا كەتسەك, حالىقارالىق قازاق كۇرەسى فەدەراتسياسىنا 19 ەل مۇشەلىك ەتەدى. بۇگىنگى جارىستىڭ نەگىزگى ۇيىمداستىرۋشى - ەۋروپا اسسوتسياتسياسى.
