قالىپتاسقان داستۇرگە سايكەس بۇگىن سەمەي قالالىق ءىىب ءماجىلىس زالىندا سەمەي قالاسىنىڭ اكىمى ەرماك ءسالىموۆتىڭ, قالالىق ءماسليحات حاتشىسى بەيسەنبەك اقجالوۆتىڭ جانە سەمەي قالالىق ءىىب باستىعى, پوليتسيا پولكوۆنيگى دۋلات قازاقپاەۆتىڭ قاتىسۋىمەن قازاقستان پوليتسياسىنىڭ 26 جىلدىعىنا ارنالعان سالتاناتتى ءىس-شارا بولىپ ءوتتى.
قازاقستان پوليتسياسى كۇنىنە ارنالعان سالتاناتتى جيىن قازاقستان رەسپۋبليكاسىنىڭ گيمنىمەن اشىلىپ, قۇتتىقتاۋ ءسوز باسقارما باستىعى دۋلات قازاقپاەۆقا بەرىلدى.
-وسىدان 26 جىل بۇرىن قابىلدانعان «قازاقستان رەسپۋبليكاسىنىڭ ىشكى ىستەر ورگاندارى تۋرالى» زاڭ ەلىمىزدىڭ پوليتسياسىنىڭ قۇقىقتىق مارتەبەسى مەن ۇيىمداستىرۋشىلىق قۇرىلىمىن رەتتەپ, ونىڭ قوعامداعى جانە مەملەكەتىمىزدەگى ورنى مەن ءرولىن انىقتاپ بەردى,-دەدى ول ءوز سوزىندە,- ىشكى ىستەر ورگاندارى دامۋىنىڭ بارلىق كەزەڭدەرىندە دە پوليتسيا قىزمەتكەرلەرى ەڭ باستى مىندەت – ازاماتتاردىڭ كونستيتۋتسيالىق قۇقىقتارى مەن بوستاندىقتارىن زاڭسىز قول سۇعۋشىلىقتان قورعاۋدى قامتاماسىز ەتىپ, قىلمىسقا قارسى كۇرەستە ارقاشان الدىڭعى شەپتە تۇردى. قازاقستاندىق پوليتسيا ءۇشىن وسىناۋ اتاۋلى كۇنى بارشاڭىزعا زور دەنساۋلىق, باياندى باقىت, وتباستارىڭىزعا ىرىس-بەرەكە جانە وتانىمىز – قازاقستان رەسپۋبليكاسىنىڭ يگىلىگى جولىنداعى قىزمەتتەرىڭىزگە تابىستار تىلەيمىن!
- جاس قىزمەتكەرلەردى پاتريوتتىق رۋحتا تاربيەلەۋگە مول ۇلەس قوسىپ جانە ءبىزدىڭ دانقتى داستۇرلەرىمىزدى ساقتاۋدا ونەگەلىك تانىتىپ كەلە جاتقان ارداقتى ارداگەرلەرىمىزدىڭ دە ورنى ەرەكشە,-دەيدى سەمەي قالالىق ىشكى ىستەر باسقارماسىنىڭ ءباسپاسوز جەتەكشىسى ەلۋبەك وسپانوۆ,-بۇگىنگى تاڭدا قازاقستاندىق پوليتسيا قىزمەتكەرلەرى قىلمىسقا قارسى كۇرەستە باسىمدى تويتارىس بەرۋدى جۇزەگە اسىرۋ, ەلىمىزدەگى قۇقىقتىق ءتارتىپتى نىعايتۋ جانە قاۋىپسىزدىكتى قامتاماسىز ەتۋ ءۇشىن بارلىق قاجەتتى جاعدايلار مەن مۇمكىندىكتەرگە يە.
ءتارتىپ ساقشىلارىنىڭ كاسىبي مەرەكەسىندە جۇرەكجاردى لەبىزىن بىلدىرگەن قالا اكىمى ەرماك بيداحمەت ۇلى انتىنا ادال, سەرتىنە بەرىك پوليتسيا قىزمەتكەرلەرى پوليتسيا پودپولكوۆنيگى راديك سايفۋتدينوۆكە, پوليتسيا مايورلارى ەرنۇر تولەۋمۇحانوۆ, ءاليا بەكيشەۆا جانە اسەل داۋلەتباەۆالارعا ارنايى ماراپاتتار تابىس ەتتى. قالا اكىمىنىڭ العىس حاتىمەن پوليتسيا اعا لەيتەنانتى ايدار دۇيسەمباەۆ ماراپاتتالدى. سونداي-اق قالالىق ءماسليحات حاتشىسى بەيسەنبەك اقجالوۆ العىس حاتپەن تاعى ءتورت قىزمەتكەردى ماراپاتتادى.
قوعامدىق ءتارتىپتى ساقتاۋدا, ءوزىنىڭ قىزمەتتىك مىندەتتەرىن ادال اتقارعانى ءۇشىن 28 قىزمەتكەر ءىىى دارەجەلى «ىشكى ىستەر ورگاندارىنداعى ءمىنسىز قىزمەتى ءۇشىن» توسبەلگىسىمەن, 28 قىزمەتكەر ءىىب گراموتاسىمەن جانە العىس حاتىمەن, سونداي-اق 154 قىزمەتكەر اقشالاي سىياقى ماراپاتتالدى.
سالتاناتتى ءىس شارا قالالىق ەسترادا جۇلدىزدارىنىڭ جانە تالانتتى پوليتسيا قىزمەتكرەلەرىنىڭ دايىنداعان مەرەكەلىك كونتسەرتىمەن جالعاستى.
راۋشان نۇعمانبەكوۆا,
سەمەي
