– بۇل ورايدا بىردەن ايتارىمىز, تۋريستىك قىزمەت كورسەتۋ شارتى جوسپارلانعان دەمالىسىڭىزدىڭ ءساتتى ءوتۋىنىڭ ناقتى كەپىلى بولا الادى. ارينە جازعى دەمالىس كەزەڭى جاپپاي باستالىسىمەن كوپتەگەن تۋروپەراتورلار جانە تۋراگەنتتىك كومپانيالار دا ءوز جۇمىستارىنا قىزۋ كىرىسىپ, حالىققا ءارتۇرلى تۋريستىك مارشرۋتتاردى ۇسىنادى. سوندا الدىمەن, تۋروپەراتورمەن نەمەسە تۋراگەنتتىك كومپانياسىمەن ارادا تۇزىلەتىن كەلىسىمشارتتى مۇقيات وقىپ, اسىقپاي تانىسىپ شىعۋ, الداعى دەمالىسىڭىزدىڭ جاقسى ءارى كوڭىلدى وتۋىنە جول اشادى. سەبەبى بۇگىندە كەيبىر كومپانيالار «جەڭىلدىڭ ۇستىمەن» جۇرمەك بولىپ, زاڭدا بەكىتىلگەن تۋريستىك قىزمەت كورسەتۋ شارتىنىڭ ورنىنا مويىندارىنا ارتىلعان مىندەتتەمەلەردى ورىنداماۋدىڭ سىلتاۋى رەتىندە قىزمەت كورسەتۋ تۋرالى شارت جاساۋدى ۇسىنادى. ماسەلەن, «قازاقستان رەسپۋبليكاسىنداعى تۋريستىك قىزمەت تۋرالى» زاڭى تۇتىنۋشىنىڭ قۇقىقتارىن قورعاۋدىڭ بىرقاتار تەتىكتەرىن قاراستىرعان. اتاپ ايتقاندا, زاڭنىڭ 17-بابىندا ساياحات بارىسىنىڭ ناشارلاۋى, ساياحات مەرزiمiنiڭ وزگەرۋi نەمەسە كولiك تاريفتەرiنiڭ ويلاماعان جەردەن ءوسۋi ورىن العان جاعدايدا تاراپتاردىڭ ارقايسىسىنىڭ شارتتى وزگەرتە الۋ نەمەسە بۇزۋدى تالاپ ەتۋ قۇقىعى قاراستىرىلعان.
سونىمەن قاتار تۋريستىك قىزمەتتى جۇزەگە اسىراتىن تۇلعاعا شارتتى ورىنداۋدان باس تارتۋ تۋرالى حاباردار ەتiلگەنگە دەيiن, ياعني قىزمەت تۇرلەرىنە قارجى تولەنىپ قويىلعان بولسا دا, ساياحات باستالماي تۇرىپ شارتتى ورىنداۋدان باس تارتۋ قۇقىعى ساقتالادى. تاعى ءبىر ماڭىزدى تالاپ, تۋروپەراتوردا جانە تۋراگەنتتە تۋروپەراتوردىڭ جانە تۋراگەنتتىڭ ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋدىڭ جارامدى شارتى بولعان كەزدە عانا تۋروپەراتورلىق جانە تۋراگەنتتىك قىزمەتتى جۇزەگە اسىرۋعا رۇقسات ەتىلەدى.
دەمەك, دەمالىس كەزىندە تۇتىنۋشىنىڭ ءومىرى مەن دەنساۋلىعىنا زالال كەلگەن بولسا, ساقتاندىرۋ كومپانياسى ساقتاندىرۋ تولەماقىسىن وتەيدى. بۇل زاڭدا قاراستىرىلعان ماڭىزدى ماسەلە. بۇعان تۇتىنۋشى تۋروپەراتورمەن نەمەسە تۋراگەنتپەن تۋريستىك قىزمەت شارتىن جاساسقان جاعدايدا عانا قول جەتكىزە الادى. ال ەگەر تۇتىنۋشى تۋريستىك كومپانيانىڭ ايتقانىنا ەرىپ, تۋريستىك قىزمەت كورسەتۋ شارتىنىڭ ورنىنا وتەلمەلى قىزمەت كورسەتۋ تۋرالى شارت جاساسا, وندا اتالعان قۇقىقتاردان ايىرىلۋى بەك مۇمكىن. سەبەبى مۇنداي ارەكەتكە بارعان كومپانيانىڭ پيعىلى ايتپاسا دا تۇسىنىكتى.
شارت جاساردىڭ الدىندا تۋريستىك مارشرۋتتى ازىرلەگەن تۋريستىك وپەراتوردىڭ نارىقتا قانشا ۋاقىت قىزمەت ىستەپ كەلە جاتقاندىعىن ءبىلىپ العان ءجون. تاڭداۋ كەزىندە, اسىرەسە دەمالىس ورىندارىنىڭ ارزان باعاسىنا ەمەس, تۋروپەراتور كومپانياسىنىڭ سەنىمدىلىگىنە نازار اۋدارۋ كەرەك دەپ كەڭەس بەرەمىز. سوندا ءبىر جىل اسىعا كۇتكەن دەمالىسىڭىزدىڭ ءساتتى وتەرىنە كۇمانىڭىز بولمايدى.
دايىنداعان
الەكساندر تاسبولات,
«ەگەمەن قازاقستان»
