جاستار بۋىنى اراسىنداعى جارىستاردىڭ تالايىندا قازاقستاننىڭ ورەندەرى جاسىنداي جارقىراپ, تولاعاي تابىستارعا قول جەتكىزدى. بۇگىنگى تاڭدا مەملەكەتىمىزدىڭ ماقتانىشىنا اينالىپ وتىرعان گۇرزى جۇدىرىقتى جىگىتتەرىمىزدىڭ دەنى ءدال وسى باسەكەلەردە ىسىلىپ, ءار جىلدارى جەڭىس تۇعىرىنا كوتەرىلدى. الىسقا بارماي-اق, سوڭعى بەس الەم بىرىنشىلىگىنىڭ ناتيجەلەرىنە زەر سالساق تا جەتكىلىكتى دەگەن ويدامىز. ماسەلەن, 2008 جىلى مەحيكودا ۇيىمداستىرىلعان جارىستا دانيار ەلەۋسىنوۆ (60 كيلو) پەن يۆان دىچكو (91 كيلو) كۇمىس مەدالدى مويىندارىندا جارقىراتتى. دانيار يرلانديالىق رەي مويلەتكە, ال يۆان كۋبالىق ەريسلاندي ساۆونعا ۇتىلدى. ەكى رەتىندە دە باسەكە تاعدىرىن ەكى ۇپاي عانا شەشكەن ەدى.
2010 جانە 2012 جىلدارى باكۋ مەن ەرەۆاندا وتكەن جارىستىڭ ناتيجەسىنە كوڭىلىمىز تولمادى. ازەربايجاندا بىردە-ءبىر بوكسشىمىز جۇلدەگەرلەر ساناتىنا قوسىلا الماسا, ارمەنيادا داۋلەت بايعاباتوۆتىڭ (75 كيلو) جالعىز قولا مەدالىن قاناعات تۇتۋعا تۋرا كەلدى.
ەسەسىنە 2014 جىلى بولگاريانىڭ باس شاھارى سوفيادا ءتورت جەرلەسىمىز اقتىق سىندا ايقاسىپ, تورتكۇل دۇنيە جانكۇيەرلەرىنىڭ نازارىن وزدەرىنە اۋداردى. اتاپ ايتساق, قارسى كەلگەندەردىڭ بارلىعىن قوعاداي جاپىرعان شالقار اقشاباي (49 كيلو) مەن ابىلايحان ءجۇسىپوۆ (60 كيلو) التىن تۇعىردان قول بۇلعادى. فينالدا شالقار وزبەكستاندىق سۋلەيمان ءلاتيپوۆتى جەڭسە, ابىلايحان رۋمىنيالىق ارسەن مۇستافادان ايلاسىن اسىردى. شەشۋشى ساتتە عانا ۇتىلعان سۇلتان زاۋىربەك (56 كيلو) پەن ۆلاديمير كازاكوۆ (81 كيلو) كۇمىس جۇلدەگە قول جەتكىزدى. وسى كورسەتكىشتىڭ ارقاسىندا قازاقستاننىڭ جاستار قۇراماسى ءوز تاريحىندا تۇڭعىش رەت الەم بىرىنشىلىگىنىڭ جالپى ەسەبىندە باس جۇلدەنى ولجالادى.
2016 جىلعى دودانى رەسەيدىڭ سانكت-پەتەربۋرگ قالاسى قابىلدادى. نەۆا جاعالاۋىندا اسقان شەبەرلىك تانىتقان سادريددين احمەدوۆ (69 كيلو) باس جۇلدەنى قانجىعاسىنا بايلادى. فينالدا ول ۋكراينالىق پاۆەل گۋلاعا ادىم اشتىرعان جوق. اقتىق ايقاستا قارسىلاستارىنا ءبىر عانا ۇپاي ايىرماشىلىعىمەن ەسە جىبەرگەن ءساماتالى تولتاەۆ (56 كيلو) پەن بەك نۇرماعامبەت (75 كيلو) كۇمىس مەدالدى مويىندارىندا جارقىراتتى. ال بەكزات نۇرداۋلەتوۆ (81 كيلو) قولاعا قول سوزدى. جارىستىڭ جالپى ەسەبىندە كۋبا مەن اقش قۇرامالارىن عانا العا جىبەرگەن قازاقستاننىڭ بىلعارى قولعاپ شەبەرلەرى ءۇشىنشى ورىنعا تۇراقتادى.
مىنە, ەندى ءبىزدى بۋداپەشتەگى الەم بىرىنشىلىگى كۇتىپ تۇر. بۇل جارىستا كىمدەردىڭ باق سىنايتىنىن جوعارىدا ايتتىق. بۇل جىگىتتەردىڭ بارلىعىنىڭ دا ءتۇرلى حالىقارالىق دودالاردا جۇلدە الىپ جۇرگەنىن جانكۇيەرلەر جاقسى بىلەدى. ونىڭ ۇستىنە ۇستىمىزدەگى جىلدىڭ ءساۋىر ايىندا بانگكوكتا جالاۋى جەلبىرەگەن ازيا بىرىنشىلىگىندە 6 التىن, 1 كۇمىس جانە 1 قولا مەدالدى يەلەنگەن وتانداستارىمىز كوماندالىق ەسەپتە باس جۇلدەنى ولجالاعان ەدى. ەندى الەمدىك دودادا دا ءوزىمىزدىڭ مىقتىلىعىمىزدى دالەلدەۋگە ءتيىسپىز.
عالىم سۇلەيمەن,
«ەگەمەن قازاقستان»
الماتى
