مەديتسينالىق قىزمەتپەن قامتىلادى
قازاقستان مەن رەسەي ۇكىمەتتەرىنىڭ كەلىسىمى بويىنشا بايقوڭىر قالاسىنىڭ, تورەتام جانە اقاي كەنتتەرىنىڭ 48 مىڭ تۇرعىنى قازىر مەديتسينالىق كومەكتى تەك رەسەيلىك ۇيىمداردىڭ تارتىبىنە ساي الۋدا. ولاردىڭ ەلىمىزدىڭ زاڭنامالارىنا سايكەس تەگىن مەديتسينالىق كومەكتى, دارىلىك زاتتار مەن مەديتسينالىق ماقساتتاعى بۇيىمداردى تەگىن الۋى, پروفيلاكتيكالىق مەديتسينالىق تەكسەرۋدەن ءوتۋى زاڭ جۇزىندە قامتاماسىز ەتىلمەگەن. بۇل ولقىلىقتىڭ ورنىن تولتىراتىن قۇجات ماجىلىستە ماقۇلداندى.
اتاپ ايتقاندا, پالاتا دەپۋتاتتارى «2009 جىلعى 17 قاراشاداعى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» كەشەنىن جالعا الۋ جاعدايىندا بايقوڭىر عارىش ايلاعىنىڭ پەرسونالىنا, بايقوڭىر قالاسىنىڭ, تورەتام جانە اقاي كەنتتەرىنىڭ تۇرعىندارىنا مەديتسينالىق قىزمەت كورسەتۋ ءتارتىبى تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن ءبىراۋىزدان ماقۇلدادى.
اتالعان زاڭ جوباسىن دەپۋتاتتارعا تانىستىرعان دەنساۋلىق ساقتاۋ ءمينيسترى ەلجان ءبىرتانوۆ بۇل قۇجاتتىڭ ارتىقشىلىقتارى جايىندا باياندادى.
– قازىر بايقوڭىر قالاسى تۇرعىندارىنىڭ قولجەتىمدى جوعارى مامانداندىرىلعان مەديتسينالىق كومەك الۋعا مۇمكىندىگى جوق. بۇل مۇگەدەك ادامداردىڭ ءومىرىنىڭ جانە جالپى ءومىر ءسۇرۋ ساپاسىنىڭ تومەندەۋ قاۋپىن ۇلعايتادى. قولدانىستاعى كەلىسىمگە وزگەرىستەر ەنگىزۋ تۋرالى حاتتاما جوباسى بايقوڭىر قالاسىندا, تورەتام جانە اقاي كەنتتەرىندە تۇراتىن ەلىمىزدىڭ ازاماتتارىنا ۇلتتىق زاڭناماعا سايكەس, قازاقستان دەنساۋلىق ساقتاۋ مەكەمەلەرىنىڭ مەديتسينالىق قىزمەت كورسەتۋىنە مۇمكىندىك بەرەدى», – دەدى دەنساۋلىق ساقتاۋ ءمينيسترى.
ە.ءبىرتانوۆتىڭ ايتۋىنشا, بايقوڭىر قالاسىندا وسىدان ەكى جىل بۇرىن قىزىلوردا وبلىستىق مەديتسينالىق ورتالىعىنىڭ فيليالى اشىلعان. بۇل مەكەمەدە تاۋلىكتىك 60 ورىندىق جانە كۇندىزگى ستاتسيونارعا 20 ورىندىق پالاتالار ۇيىمداستىرىلعان. سونىمەن قاتار فيليال جانىنان 30 مىڭ ادامعا لايىقتالعان ەمحانا اشىلعان. وعان قوسا الداعى جىلى وپەراتسيالىق, رەانيماتسيالىق, حيرۋرگيالىق بولىمدەر اشۋ كوزدەلگەن.
سونداي-اق اتالعان حاتتاما قازىر جەتىسپەي وتىرعان جالپى تاجىريبەلىك دارىگەرلەر سانىن كوبەيتىپ, اۋرۋحانا مەن ەمحانانى سالالىق دارىگەرلەرمەن قامتۋعا مۇمكىندىك بەرمەك. وسى ماقساتتا قازىردىڭ وزىندە ەلىمىزدىڭ مەديتسينالىق جوعارى وقۋ ورىندارىن بىتىرەتىن تۇلەكتەرمەن كەلىسىمدەر جاسالىپ, قىزىلوردا قالاسىنان بىلىكتى دارىگەرلەردى اۋىسىممەن باعىتتاپ وتىرۋ جوسپارى بەكىتىلگەن.
دەپۋتاتتاردىڭ ساۋالدارىنا وراي دەنساۋلىق ساقتاۋ ءمينيسترى قىزىلوردا وبلىستىق مەديتسينالىق ورتالىعىنىڭ بايقوڭىر قالاسىنداعى فيليالىندا وسى اۋماققا جاقىن ورنالاسقان ەلدى مەكەن تۇرعىندارىنىڭ دا ەمدەلە الاتىندىعىن جەتكىزدى. بىراق ولار بايقوڭىر قالاسىنا كىرۋدىڭ جالپىعا ورتاق تارتىبىنە ساي رۇقسات قاعازدارىن الدىن الا راسىمدەۋلەرى قاجەت.
ءماجىلىس دەپۋتاتتارى اتالعان زاڭ جوباسىن تۇتاستاي ماقۇلدادى.
سەناتتىڭ تۇزەتۋلەرى قارالدى
جالپى وتىرىستا ءماجىلىس دەپۋتاتتارى ۇكىمەتتىڭ ازاماتتىق قورعانىس, توتەنشە جاعدايلاردىڭ الدىن الۋ جانە جويۋ سالاسىنداعى ىنتىماقتاستىق تۋرالى يوردان حاشيميت كورولدىگىمەن جاسالعان كەلىسىمىن راتيفيكاتسيالاۋ تۋرالى زاڭ جوباسىن ماقۇلدادى.
سونىمەن قاتار ءماجىلىس دەپۋتاتتارى سەناتتىڭ كەيبىر كونستيتۋتسيالىق زاڭدار, سايلاۋ ماسەلەلەرى, ساقتاندىرۋ جانە ساقتاندىرۋ قىزمەتى, باعالى قاعازدار نارىعى تۋرالى تۇزەتۋلەرىن قارادى.
ماسەلەن بۇعان دەيىن سەنات دەپۋتاتتارى سايلاۋ ماسەلەلەرىنە بايلانىستى زاڭ جوباسىنان قالا, اۋىل, اۋىلدىق وكرۋگ اكىمدەرىن جالپىعا بىردەي تەڭ توتە سايلاۋ تۋرالى نورمانى الىپ تاستاپ, قۇجاتتى ماجىلىسكە جىبەرگەن بولاتىن. وسى ورايدا ءماجىلىستىڭ زاڭناما جانە سوت-قۇقىقتىق رەفورما كوميتەتى سەنات ەنگىزگەن وزگەرتۋلەردى قاراستىرا كەلە ءوز ۇسىنىسىن ءبىلدىردى.
– سەنات ۇسىنعان تۇزەتۋلەر اۋداندىق ماڭىزداعى قالا, اۋىل, اۋىلدىق وكرۋگ اكىمى لاۋازىمىنا سايلاۋدا قولدانىستاعى ءتارتىپتى ساقتاۋعا باعىتتالعان. وسى ورايدا كوميتەت سەنات ەنگىزگەن وزگەرىستەرمەن كەلىسۋدى ۇسىنادى, – دەدى ءماجىلىس دەپۋتاتى سۆەتلانا بىچكوۆا.
وسى وتىرىستا ءماجىلىس بىرقاتار زاڭ جوبالارى بويىنشا بەيىندى كوميتەتتەرگە قورىتىندى ازىرلەۋ مەرزىمدەرىن بەلگىلەدى. ولاردىڭ قاتارىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك قىزمەت جانە سىبايلاس جەمقورلىققا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى», «تاريحي-مادەني مۇرا وبەكتىلەرىن قورعاۋ جانە پايدالانۋ تۋرالى», سونداي-اق كولىك ماسەلەلەرىنە بايلانىستى جانە ەۋرازيالىق ەكونوميكالىق وداقتا تاۋارلاردى سايكەستەندىرۋ قۇرالدارىمەن تاڭبالاۋ تۋرالى كەلىسىمدى راتيفيكاتسيالاۋ تۋرالى زاڭ جوبالارى بار.
جالپى وتىرىس سوڭىندا حالىق قالاۋلىلارى بىرقاتار مەملەكەتتىك ورگانداردىڭ باسشىلارىنا دەپۋتاتتىق ساۋالدار جولدادى.
سەرىك ابدىبەك,
«ەگەمەن قازاقستان»
