جيىنعا «Syctom» قالدىقتاردى باسقارۋ بويىنشا فرانتسۋز اگەنتتىگىنىڭ وكىلدەرى دە قاتىستى. «Syctom» كومپانياسى ەكسپو-2017 حالىقارالىق مامانداندىرىلعان كورمەسىنە قاتىسۋشى جانە قالدىقتى وڭدەۋ بويىنشا ەڭ ۇزدىك يننوۆاتسيالىق تەحنولوگيانى ۇسىندى.
وتىرىستا «Syctom» اگەنتتىگىنىڭ وكىلدەرى استانا قالاسىنا ارنالعان «قاتتى تۇرمىستىق قالدىقتاردى قايتا وڭدەۋ بويىنشا شەبەر-جوسپار جوباسىن دامىتۋ سالاسىنداعى ءوزارا ارەكەتتەستىك» جوباسىن تانىستىردى. «وپەراتور روپ» جشس قاتتى تۇرمىستىق قالدىقتار (قتق) فراكتسياسى بويىنشا ورگانيكالىق وڭدەۋ بارىسىندا تەحنولوگيانىڭ وڭتايلى جولدارىن ىزدەۋدەگى اتقارىلعان جۇمىستارىن تانىستىرىپ شىقتى.
ەلوردانىڭ كليماتتىق جاعدايىن ەسەپكە الا وتىرىپ, حالىقارالىق تاجىريبەمەن قتق قۇرامىن زەرتتەدى, جۇمىس توبىنىڭ مۇشەلەرى تەحنيكالىق كومپوست ءوندىرىسى ارقىلى قتق بويىنشا ورگانيكالىق (تاماق) قوردالاندىرۋ جولىمەن قالدىقتاردى وڭدەۋ ءادىسىن تاڭدادى. باسقاشا ايتقاندا, «سۋلى» قالدىقتار – ياعني يىستەنىپ كەتكەن تاماق قالدىقتارىن ارنايى تەحنولوگيانىڭ كومەگىمەن ورگانيكالىق تىڭايتقىشقا (كومپوست) اينالدىرادى. ناتيجەسىندە كومپوست جەردى تىڭايتۋعا, كارەردى رەكۋلتيۆاتسيا جاساۋعا, پوليگوندار مەن قۇرتىلىپ بارا جاتقان لاندشافتىلاردى قالپىنا كەلتىرۋگە پايدالانادى.
ەستەرىڭىزگە سالا كەتەيىك, استانادا قالدىقتاردى بولەك جينايتىن جۇيەنى ەنگىزۋدىڭ پيلوتتىق جوباسى ىسكە اسىرىلىپ جاتىر. قاتتى تۇرمىستىق قالدىقتار بولەك جينالىپ, ولار ەكى فراكتسياعا بولىنەدى, «قۇرعاققا» (پلاستيك, قاعاز, شىنى, مەتالل) جانە «سۋلى» دەگەنىنە ورگانيكالىق زاتتار. «قۇرعاق» قالدىقتاردى جيناۋ ءۇشىن وسى جىلى 6276 سارى ەۆروكونتەينەر ورناتىلدى. بۇلارعا 25 جاڭا «Iveco» ماركالى قالدىق تاسىمالدايتىن كولىك قىزمەت كورسەتەدى.
