«قازاقستان رەسپۋبليكاسىنىڭ ۇزدىك مەملەكەتتىك قىزمەتشىسى» رەسپۋبليكالىق بايقاۋىنا ماڭعىستاۋ وڭىرىنەن 4 ۇمىتكەر قاتىسقان بولاتىن. ولار – امانعالي نۇرداۋلەتوۆ, رامير الەكپەروۆ, باۋىرجان تۇياقوۆ جانە رەنات شامۋحانوۆ.
ايتا كەتۋ كەرەك, بۇعان دەيىن وتكەن وڭىرلىك كوميسسيا وتىرىسىندا بەلگىلى بولعانداي بايقاۋعا قاتىسۋعا 27 ۇمىتكەر نيەت بىلدىرگەن. ونىڭ 16 باسقارما مەن ءبولىم باسشىلارى بولسا, 11 – باس ماماندار.
بايقاۋ مەملەكەتتىك قىزمەتتى ناسيحاتتاۋ, وڭ ءيميدجىن قالىپتاستىرۋ, مارتەبەسىن ارتىرۋ جانە وتانسۇيگىشتىككە تاربيەلەۋ ماقساتىندا ۇيىمداستىرىلعان.
ەلىمىز بويىنشا 20 قاتىسۋشى جەڭىمپاز دەپ تانىلسا, ونىڭ ەكەۋى ماڭعىستاۋلىقتار. ولار – باۋىرجان تۇياقوۆ جانە رامير الەكبەروۆ.
32 جاستاعى شەنەۋنىك باۋىرجان تۇياقوۆ 2012 جىلدىڭ قاراشا ايىنان «ماڭعىستاۋ وبلىسىنىڭ جاستار ساياساتى ماسەلەلەرى باسقارماسى» مەملەكەتتىك مەكەمەسىنىڭ باسشىسى لاۋازىمىن اتقارىپ كەلەدى. ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىن «حالىقارالىق قاتىناستار» ماماندىعى بويىنشا بىتىرگەن. بيىل قر پرەزيدەنتىنىڭ «بولاشاق» حالىقارالىق باعدارلاماسى اياسىندا ۇلىبريتانيانىڭ نوتتينگەم ۋنيۆەرسيتەتىندە وقىپ, «مەملەكەتتىك ساياسات» ماگيسترى اتاعىن العان. مەملەكەتتىك قىزمەتتەگى ءوتىلى 9 جىلعا جۋىقتاعان. قازاق, ورىس, اعىلشىن جانە يتاليان تىلدەرىندە سويلەيدى.
ەكىنشى جەڭىمپاز رامير الەكپەروۆ 27 جاستا. مەملەكەتتىك قىزمەتتە جۇرگەنىنە 5 جىلعا جۋىقتاپتى. 2012 جىلدىڭ قاراشاسىندا «ماڭعىستاۋ وبلىسىنىڭ قارجى باسقارماسى» مەملەكەتتىك مەكەمەسىنە جۇمىسقا تۇرىپ, بۇگىندە بيۋدجەتتىڭ اتقارىلۋىن ۇيلەستىرۋ جانە مونيتورينگ ءبولىمىنىڭ باسشىسى لاۋازىمىن اتقارىپ كەلەدى. اقتاۋداعى «Yessenov University» جوعارى وقۋ ورنىندا زاڭگەر ماماندىعى بويىنشا ءبىلىم العان. ورىس, اعىلشىن, لەزگين جانە ءازىربايجان تىلدەرىن مەڭگەرگەن.
رەسپۋبليكالىق بايقاۋدىڭ جەڭىمپازدارىن قر مەملەكەتتىك قىزمەت ىستەرى جانە سىبايلاس جەمقورلىققا قارىس ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتىنىڭ باسشىسى, ادەپ جونىندەگى كەڭەس ءتورايىمى نۇرگۇل جاننازاروۆا قابىلداپ, ءوزىنىڭ قۇتتىقتاۋ تىلەگىن جەتكىزدى.
-بۇل بايقاۋعا وتكەن جىلى ماڭعىستاۋدان بىردە-ءبىر مەملەكەتتىك قىزمەتشى قاتىسپاعان ەدى. ال بيىل قىزىعۋشىلىق تانىتقاندار كوپ بولدى. مەنىڭشە بۇل ءۇردىس كەلەسى جىلى دا جالعاسىپ, جەرلەستەرىمىز ءالى دە جاقسى ناتيجەلەرگە قول جەتكىزەتىنىنە سەنىمدىمىن. مەملەكەتتىك قىزمەتكە جاڭادان قابىلدانعان جاستار باۋىرجان مەن رامير اعالارىنان ۇلگى الىپ, وسىنداي جەڭىستەرىمەن قۋانتىپ, رەسپۋبليكالىق دەڭگەيدە تالاي جەڭىمپاز شىعارى ءسوزسىز. جالپى بۇرىنعىعا قاراعاندا مەملەكەتتىك قىزمەتكە دەگەن قىزىعۋشىلىقتىڭ ارتقانىن بايقاۋعا بولادى, بۇل ارينە قۋانتارلىق جاعداي», - دەدى دەپارتامەنت باسشىسى.
ال رەسپۋبليكالىق بايقاۋدىڭ جەڭىمپازدارى بولسا, ءوز ىسىنە ادال ءارى كۇندەلىكتى قىزمەتىندە ءوزىنىڭ فۋنكتسيونالدىق مىندەتتەرىنە جاۋاپكەرشىلىكپەن قاراعان ادام وڭ ناتيجەگە قول جەتكىزەرى ءسوزسىز دەيدى. ەڭ باستىسى مەملەكەتتىك قىزمەت دەگەنىمىز حالىققا قىزمەت, ەلىڭە دەگەن قىزمەت ەكەندىگىن جادىنان شىعارماۋ ءتيىس ەكەندىگىن ايتادى باۋىرجان مەن رامير.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
