قۇجات ەكى ەل اراسىندا كاسىپكەرلەردىڭ قۇقىقتارىن قورعاۋ مەن اقپارات الماسۋداعى ىنتىماقتاستىقتى كوزدەيدى. تاراپتار ىسكەرلىك احۋالدى جاقسارتۋ بويىنشا, كاسىپكەرلىك سۋبەكتىلەرىنىڭ قۇقىقتارى مەن زاڭدى مۇددەلەرىن قورعاۋ بويىنشا جۇمىس جاساۋعا بەيىمدەلگەن, اتالمىش جۇمىستار سىندارلىلىق, اشىقتىق جانە ولاردىڭ قىزمەتىنىڭ تيىمدىلىگى قاعيداتى بويىنشا اتقارىلاتىن بولادى.
سونىمەن قاتار مەملەكەتتىڭ ۇلتتىق زاڭدارىن دۇرىس قولدانۋ بويىنشا كونسۋلتاتسيالىق-قۇقىقتىق كومەك كورسەتۋ, عىلىمي-تاجىريبەلىك كونفەرەنتسيالارعا, سەمينارلارعا جانە باسقا دا ءىس-شارالارعا قاتىسۋ قاراستىرىلعان.
ء«بىز كاسىپكەرلەردىڭ قۇقىقتارىن قورعاۋ بويىنشا جۇمىستا ودان ءارى ءتيىمدى ءارى جەمىستى ىنتىماقتاستىق ورناتامىز دەگەن ۇمىتتەمىز. ءبىز ءۇشىن باستى مىندەتتەردىڭ ءبىرى – ءبىزدىڭ كاسىپكەرلەر وزگە ەلدە باسىنا تۇسكەن قيىنشىلىقپەن جالعىز قالماۋى كەرەك, ولارعا كومەك كورسەتىلۋى قاجەت», - دەپ, اتاپ ءوتتى بولات پالىمبەتوۆ.
ءوز كەزەگىندە, ديلمۋرود كاسيموۆ تاراپتاردىڭ جۇمىسىندا جاقسى سەرپىن بار ەكەندىگىن اتاپ ءوتتى.
ء«بىز, قازاقستاندىق ارىپتەستەرىمىزبەن, بۇگىنگى كەزدەسۋدەن بۇرىن بيزنەس قۇرىلىمداردىڭ قۇقىقتارىن قورعاۋ سالاسىندا بىرلەسىپ, جۇمىس ىستەپ كەلەمىز. بۇگىن ءبىز ءتيىستى كەلىسىممەن ىنتىماقتاستىقتى نىعايتقىمىز كەلەدى. حالىقارالىق تاجىريبە كورسەتىپ وتىرعانداي, بيزنەس-ومبۋدسمەن ينستيتۋتى مەملەكەت پەن كاسىپكەرلەر اراسىنداعى كوپىر بولىپ تابىلادى», - دەدى وزبەكستان رەسپۋبليكاسىنىڭ پرەزيدەنتى جانىنداعى ۋاكىل.
ەستەرىڭىزگە سالا كەتەيىك, وتكەن جىلى قازاقستان مەن رەسەيدىڭ بيزنەس-ومبۋدسمەندەرى اراسىنداعى ءوزارا كومەك جانە ىنتىماقتاستىق تۋرالى كەلىسىمگە قول قويىلعان بولاتىن. ەكى ەلدىڭ بىرلەسكەن كۇش-جىگەرىنىڭ ارقاسىندا قازاقستاندىق جانە رەسەيلىك كاسىپكەرلىك سۋبەكتىلەرىنىڭ قۇقىقتارى قورعالدى.
