بولمىسىن بۇگىنگى قازاق رۋلارىنىڭ دەنى قۇراعان سول نوعايدىڭ سۋرەتشىسى الىبەك قويلاقاەۆ قىزىلوردا قالاسىنداعى كوركەمسۋرەت گالەرەياسىندا «قورقىت دالاسى» دەگەن اتپەن جۇرتشىلىققا ون كۇندىك كورمەسىن ۇسىندى.
الىبەك بايمۇرات ۇلى قويلاقاەۆ 1982 جىلى رەسەيدىڭ داعىستان رەسپۋبليكاسى ايماعىنداعى تەرەكلي-مەكتەب ايماعىنا قاراستى نوعاي اۋدانىندا دۇنيەگە كەلگەن. سۋرەت سالۋ ونەرىنە 3-4 جاسىنان دەن قويعان قىلقالام شەبەرى داعىستاننىڭ ماحاچكالا قالاسىنداعى كوركەم- سۋرەت ۋچيليششەسى مەن كراسنودار مەملەكەتتىك مادەنيەت جانە ونەر ۋنيۆەرسيتەتىندە ءبىلىم العان ەكەن.
قاسيەتتى سىر ءوڭىرى ءتۇبى ءبىر تۇركى حالقى ءۇشىن قۇتتى مەكەن. مۇندا بارلىق تامىرلاس تۇركى بۇتاعى ءۇشىن ورتاق بابا قورقىت دۇنيەگە كەلىپ, ءاز دەنەسى ماڭگىلىك دامىل تاپقان. وسىنداي تاريحي جەرگە كەلگەن نوعاي سۋرەتشىسى ءوزىن اتامەكەنىندە جۇرگەندەي سەزىنگەنىن ايتادى.
– وسى ساپارىمدا قورقىت اتا كەشەنىنە ارنايى باردىم. ودان العان اسەرىمدى سوزبەن جەتكىزۋ مۇمكىن ەمەس. ەرەكشە تولقىنىستا بولدىم. وزدەرىڭىز دە بايقاعان شىعارسىزدار, مەنىڭ شىعارماشىلىق جولىمداعى نەگىزگى تاقىرىبىم – تۇركى الەمى. بۇگىنگى كورمە تاقىرىبى دا سوعان سايكەس. قورقىت اتادان باستاپ ەدىل پاتشا, توميريس حانشايىم, ەدىگە باتىر, شىڭعىس حان سەكىلدى كوپتەگەن سۋرەتتەردى جارىققا شىعاردىم. بۇل – مەنىڭ جانىما وتە جاقىن. سوندىقتان وسى باعىتتا ۇنەمى ىزدەنىستە جۇرەمىن. ءاربىر ۇلت ءوزىنىڭ ءتۇپ-توركىنىنە ۇڭىلۋگە تىرىسادى, ءبىز قازاق حالقىمەن وتە جاقىن, تۋىس ەكەنىمىزدى بىلەمىز. سول سەبەپتى باۋىرلاس قازاقپەن ەتەنە جاقىن ارالاسۋعا نيەت تانىتامىز. بۇگىندە نوعايدىڭ جالپى سانى 110 مىڭعا جۋىق. ولاردىڭ 103 مىڭعا جۋىعى رەسەيدە تۇرادى. ءتۇبى ءبىر تۇركى جۇرتىنىڭ تاريحى مەن تۇلعالارىن قىلقالام ۇشىندا سويلەتۋگە تىرىسامىن, – دەيدى ول.
ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا وتكەن كورمەدە الىبەك قويلاقاەۆ جەرگىلىكتى جاس سۋرەتشىلەرگە شەبەرلىك ساعاتىن وتكىزدى.
باقتيار تايجان,
«ەگەمەن قازاقستان»
قىزىلوردا وبلىسى
