اتىراۋ قالاسىنداعى 41433 جانە بەينەۋ اۋدانىنداعى 99116 اسكەري بولىمدەرىندە 100-گە جۋىق جاس سارباز, العاشقى اسكەري دايىندىعىن اياقتاپ سالتاناتتى تۇردە اسكەري انت قابىلدادى. سالتاناتتى اسكەري انت قابىلداۋ راسىمىنە قازاقستان رەسپۋبليكاسى قارۋلى كۇشتەرىنىڭ ارداگەرلەرى شاقىرىلىپ, ساربازدارعا وزدەرىنىڭ اق تىلەكتەرىن ءبىلدىردى.
ساربازدار الماتى قالاسى جانە الماتى وبلىسىنان شاقىرىلعان بولاتىن. اسكەري قىزمەتشىلەردىڭ انت قابىلداۋ راسىمىنە كۋاگەر بولۋعا شالعايداعى اتا-انالارى مەن تۋعان تۋىسقاندارى كەلدى.
- بۇل ءبىزدىڭ وتباسىمىز ءۇشىن وتە ەرەكشە كۇن, سەبەبى ءبىزدىڭ ۇلىمىز كىشكەنتاي كەزىنەن بەرى اسكەر قاتارىنا بارام دەپ ايتىپ جۇرەتىن, ەندى مىنە ارمانى ورىندالدى. بالاما تەك قانا ءوز اسكەري بورىشىن ابىرويمەن وتكىزۋدى تىلەيمىن, - دەدى جاس سارباز, قاتارداعى جاۋىنگەر ەلدوس تەمىرحاننىڭ اناسى روزا قۇلمانوۆا .
99116 اسكەري ءبولىمىنىڭ كومانديرى پودپولكوۆنيك رينات كاليەۆتىڭ ايتۋىنشا, انت قابىلداۋ ءراسىمى ەرەكشە اسكەري سالتتاردىڭ ءبىرى بولىپ سانالادى, بۇل ءسات اسكەري قىزمەتشىلەردى وتانىن سۇيۋگە جانە تۋعان جەردىڭ پاتريوتى بولۋعا ىنتالاندىرادى.
انت قابىلداۋ راسىمىنەن كەيىن, ساربازداردى الىستان كەلگەن اتا-انا, تۋعان-تۋىستارىمەن بىرگە سەيىلگە جىبەردى, ەندى ولار تەك ءبىر جىلدان سوڭ عانا قاۋىشاتىن بولادى.
اسكەر قاتارىنا اتا-بابالارىمىزدىڭ جاۋىنگەرلىك رۋحىنا ساي, ولاردىڭ ابىرويىن تۇسىرمەيتىن, قازاقستان رەسپۋبليكاسىنا ادال قىزمەت ەتەتىن, دەنە دايارلىعى مىقتى, ءبىلىمدى, ءور مىنەزدى ساربازدار عانا شاقىرىلۋدا.
گۇلايىم شىنتەمىرقىزى,
"ەگەمەن قازاقستان"
ماڭعىستاۋ وبلىسى
