كينەماتوگرافيا سالاسى مەن مادەني بايلانىستاردى دامىتۋ ماقساتىنداعى قۇجاتقا قول قويۋ راسىمىنە ش.ايمانوۆ اتىنداعى «قازاقفيلم» اق ۆيتسە-پرەزيدەنتى داۋرەن ءابدىحاميتوۆ پەن «بەلارۋسفيلم» ۇلتتىق كينوستۋدياسىنىڭ باس ديرەكتورى ۆلاديمير كاراچەۆسكي قاتىستى.
ەكىجاقتى بىرلەسكەن مەموراندۋم كينووندىرىس توڭىرەگىندەگى كىلتيپاندى ماسەلەلەردى رەتتەۋگە باعىتتالعان. سونىمەن قاتار, قۇجاتتا كينووندىرىستى ۇيىمداستىرۋعا ىقپالداستىق ەتۋ, كينوتۋىندىلار الماسۋ جانە ديستريبۋتسياسىن جاساۋ, كينەماتوگرافيا سالاسىنداعى مامانداردى تاعىلىمداماعا جىبەرىپ, تاجىريبە ءبولىسۋ ماسەلەلەرى دە قامتىلعان.
ىنتىماقتاستىق تۋرالى كەلىسىمدى ءسوز ەتە كەلە, «قازاقفيلمنىڭ» ۆيتسە-پرەزيدەنتى داۋرەن ءابدىحاميتوۆ, اتالمىش مەموراندۋم ەكى ەلدىڭ كينەماتوگرافيا سالاسىنداعى بايلانىسى مەن دوستىق قارىم-قاتىناسى جولىنداعى ماڭىزدى قادام ەكەنىن باسا ايتتى.
شانحاي ىنتىماقتاستىق ۇيىمىنا مۇشە ەلدەرى كينوفەستيۆالىنىڭ كونكۋرستىق باعدارلاماسىنا 23 كينولەنتا قاتىسىپ وتىر. ولاردىڭ اراسىندا ەكى وتاندىق كارتينا – رەجيسسەر رۇستەم ابدىراشەۆتىڭ «الماس قىلىش» تاريحي ءفيلمى جانە رەجيسسەر تالعات تەمەنوۆتىڭ ء«بىزدىڭ قالانىڭ حانزاداسى» مەلودراماسى. جالپى كينوفەستيۆال كورەرمەندەرىنىڭ نازارىنا 60 كارتينا ۇسىنىلماق.
سونىمەن قاتار, فەستيۆالدە كورەرمەندەر ش.ايمانوۆ اتىنداعى «قازاقفيلم» كينوستۋدياسى تۇسىرگەن باسقا دا كارتينالاردى تاماشالاي الادى. ولار: رەجيسسەر اقان ساتاەۆتىڭ «اناعا اپارار جول» دراماسى جانە رەجيسسەر ءسابيت قۇرمانبەكوۆتىڭ «ورالمان» كارتيناسى.
ۇزدىكتەردى 12 كاسىبي ماماننان تۇراتىن قازىلار القاسى انىقتايدى. قازىلار القاسىنىڭ توراعاسى – تانىمال قىتايلىق پروديۋسەر حان سانپين. ايتا كەتەلىك, قازاقستاندىق رەجيسسەر, پروديۋسەر سەرگەي ءازىموۆ نەگىزگى كونكۋرستىڭ قازىلارى قاتارىندا.
كينوبايگەگە قاتىسۋشىلار «ۇزدىك فيلم», «ۇزدىك رەجيسسۋرا», «ۇزدىك ستسەناري», «ۇزدىك ەر ادام ءرولى», «ۇزدىك ايەل ادام ءرولى» اتالىمدارى بويىنشا جانە قازىلار القاسى تاعايىنداعان ارنايى جۇلدەمەن ماراپاتتالادى.
17 ماۋسىمعا دەيىن جالعاساتىن شىۇ اياسىنداعى كينوفەستيۆالدى قحر مەملەكەتتىك كينەماتوگرافيا باسقارماسى مەن شاندۋن پروۆينتسياسىنىڭ اكىمشىلىگى ۇيىمداستىرىپ وتىر.
ايگۇل احانبايقىزى,
«ەگەمەن قازاقستان»
الماتى
