حالىقارالىق, ۇكىمەتتىك ەمەس ۇيىمداردىڭ جەتەكشىلەرى, قوعام بەلسەندىلەرى, بيزنەس وكىلدەرى, مەملەكەتتىك ورگاندار مەن الەۋمەتتىك قورلاردىڭ باسشىلارى قاتىسقان جيىندى ەڭبەك جانە الەۋمەتتىك قورعاۋ ءمينيسترى ءمادينا ابىلقاسىموۆا جۇرگىزدى.
مينيستر بۇگىندە ەلىمىزدە 2 ميلليون 40 مىڭ ادام ءوزىن ءوزى جۇمىسپەن قامتىعاندار ساناتىنا جاتاتىنىن, ال 1 ميلليون 800 مىڭ ادامنىڭ ءالى كۇنگە ەڭبەك مارتەبەسى انىقتالماعاندىعىن اتاپ ءوتىپ, وسى باعىتتا ءتيىستى جۇمىستاردىڭ قولعا الىنعانىن جەتكىزدى.
«قازىرگى ۋاقىتتا ءوزىن ءوزى جۇمىسپەن قامتىعاندارعا ارنالعان جۇمىسپەن قامتۋدى رەسىمدەۋ تۋرالى زاڭ جوباسى ازىرلەندى. زاڭ جوباسى اياسىندا بىرىڭعاي جيىنتىق تولەم ەنگىزۋ جوسپارلانىپ وتىر. ءبىزدىڭ ماقساتىمىز – ءوزىن ءوزى جۇمىسپەن قامتىعان ازاماتتار الەۋمەتتىك تۇرعىدان قورعالىپ, مەملەكەت تاراپىنان كورسەتىلەتىن كومەكتەرگە قول جەتكىزسە دەيمىز», دەدى م.ابىلقاسىموۆا.
دوڭگەلەك ۇستەلدە ءسوز العان ەڭبەك جانە الەۋمەتتىك قورعاۋ ءمينيسترىنىڭ ورىنباسارى نۇرجان التاەۆ جاڭادان ازىرلەنگەن زاڭ جوباسىنداعى جەڭىلدىكتەرگە توقتالدى. ۆيتسە-مينيستر زاڭ جوباسى شەڭبەرىندە ەنگىزىلمەك بىرىڭعاي جيىنتىق تولەم (بجت) تىركەۋدى جەڭىلدەتىپ, كەدەرگىلەردى ازايتۋعا باعىتتالاتىنىن تىلگە تيەك ەتتى. «بجت ەڭ الدىمەن بەيرەسمي ءوزىن ءوزى جۇمىسپەن قامتىعان ازاماتتى ءوز قىزمەتى تۋرالى حاباردار ەتەدى. ەكىنشىدەن, جەكە تابىس سالىعىن, مىندەتتى زەينەتاقى جارنالارىن, الەۋمەتتىك تولەمدەردى جانە مەديتسينالىق ساقتاندىرۋدى تولەيتىن بىردەن ءبىر قۇرال بولادى», دەدى ول.
مەملەكەت تاراپىنان قولعا الىنعان ءارتۇرلى شارالارعا قاراماستان ءوزىن ءوزى جۇمىسپەن قامتىعان ازاماتتاردىڭ سانى ازايماي وتىرعان وڭىرلەر دە بار. جيىندا ءسوز سويلەگەن قولدانبالى ەكونوميكانى زەرتتەۋ ورتالىعىنىڭ عىلىمي جەتەكشىسى جاقسىبەك قۇلەكەەۆ الماتى, جامبىل, قىزىلوردا جانە وڭتۇستىك قازاقستان وبلىستارىندا جۇرگىزىلگەن زەرتتەۋ قورىتىندىسىن جاريا ەتىپ, ەلىمىزدەگى ءوزىن ءوزى جۇمىسپەن قامتىعان تۇرعىنداردىڭ 51 پروتسەنتى وسى وڭىرلەرگە تيەسىلى ەكەندىگىن ايتتى.
جانە اتالعان ءتورت وبلىستىڭ 2800 تۇرعىنى ء(وزىن ءوزى جۇمىسپەن قامتىعاندار) اراسىندا ساۋالداما جۇرگىزىلىپ, ناتيجەسىندە ولاردىڭ 61 پروتسەنتى رەسمي تىركەلمەگەنى انىقتالعاندىعىن العا تارتتى. سونداي-اق ەلىمىزدەگى ءوزىن ءوزى جۇمىسپەن قامتىعان ازاماتتاردىڭ ۇشتەن ءبىرى وڭتۇستىك قازاقستان وبلىسىنا تيەسىلى ەكەندىگىن, وسى وڭىردەگى اۋىل تۇرعىندارىنىڭ 81 پروتسەنتى اتالعان توپقا جاتاتىندىعىنا الاڭداۋشىلىعىن ءبىلدىرىپ, مەملەكەت تاراپىنان ءتيىستى شارالار قولدانىلۋى كەرەكتىگىن اتاپ ءوتتى.
ازامات قاسىم,
«ەگەمەن قازاقستان»
