سوڭعى اپتادا ۇلتتىق ۆاليۋتا قايتا السىرەي باستادى. 17 ماۋسىم كۇنى ايىرباستاۋ پۋنكتتەرىندە امەريكالىق دوللار 337-338 تەڭگەگە ساتىلۋدا. بۇل سوڭعى ەكى ايمەن: ءساۋىر ايىنىڭ سوڭىمەن سالىستىرعاندا - 10 تەڭگەگە, مامىر ايىنىڭ سوڭىنا قاراعاندا 7-8 تەڭگەگە قىمبات. ۇلتتىق بانك مۇنى ماۋسىمدىق فاكتور رەتىندە تۇسىندىرۋدە جانە سەزىلەرلىكتەي تاۋەكەلدەردىڭ جوقتىعىن قاداپ ايتۋدا.
«سوڭعى ۋاقىتتا بايقالىپ وتىرعان تەڭگەنىڭ ايىرباس باعامىنىڭ بولماشى عانا قۇبىلۋى, ەڭ الدىمەن, دەمالىستار ماۋسىمىنا بايلانىستى شەتەلدىك ۆاليۋتاعا سۇرانىستىڭ جوعارىلاۋىنان بولىپ وتىر. تاعى ءبىر فاكتور - اقش فەدەرالدى رەزەرۆتى جۇيەسىنىڭ مولشەرلەمەنى ارتتىرۋىندا بولىپ وتىر. وسىنىڭ ناتيجەسىندە الەمدىك نارىقتا اقش دوللارىنىڭ نىعايۋى جانە دامۋشى نارىقتاردان كاپيتالداردىڭ بولماشى عانا جىلىستاۋى بايقالۋدا», - دەلىنگەن ۇب حابارلاماسىندا.
جىلدىق ينفلياتسيا ماقساتتى دالىزدە تومەندەۋىن جالعاستىرۋدا جانە مامىر ايىندا 6,2% پايىزدى قۇرادى. جىل باسىنان بەرى قارقىننىڭ تومەندەۋى ينفلياتسيانىڭ بارلىق قۇرامداۋىشتارى بويىنشا تىركەلۋدە - ازىق-ت ۇلىك جانە ازىق-ت ۇلىك ەمەس تاۋارلارعا, سونداي-اق حالىققا كورسەتىلەتىن قىزمەتتەر بويىنشا. «ەلدەگى ينفلياتسيالىق پروتسەستەرگە ىقپال ەتەتىن فاكتورلار - جاعىمدى. ينفلياتسيالىق بولجامدار سونداي-اق تومەندەي تۇسۋدە, مامىر ايىندا اتالمىش كورسەتكىش 6,0% قۇرادى. تەڭگەنىڭ ايىرباس باعامىنا الەمدىك مۇناي نارىعى تاراپىنان جاعىمدى ىقپال بايقالۋدا. مۇناي باعاسى ورتاشا العاندا, باررەلى ءۇشىن 70 اقش دوللار اينالاسىندا قالىپتاسۋدا. وسىعان وراي ەلدىڭ تولەمدىك بالانسى جاقسارا تۇسۋدە», - دەپ قوستى ۇلتتىق بانكتەن.
قارجى نارىعىن رەتتەۋشى ورگان قازاقستاندىقتاردى تەڭگە باعامىنا قاتىستى جوعارى تاۋەكەلدەر مەن ينفلياتسيا دەڭگەيىنىڭ وسىمىنە بايلانىستى ءارتۇرلى اقپاراتتارعا سەنبەۋگە شاقىرادى.
