دەنساۋلىق ساقتاۋ سالاسى ەلباسى, پارتيا توراعاسىنىڭ ۇدايى باستى نازارىندا. سوندىقتان وسى باعىتتا كوپتەگەن يگى باستامالار قولعا الىنىپ, ءساتتى جۇزەگە اسىرىلىپ كەلەدى. ناتيجەسىندە ەلىمىزدە مەديتسينالىق كومەك كورسەتۋ ىسىندە ايتارلىقتاي ىلگەرىلەۋ انىق بايقالادى. بۇل جۇمىستار «نۇر وتان» پارتياسىنىڭ دا باستى باقىلاۋىندا ەكەنى ءسوزسىز.
ماۋلەن اشىمباەۆ الدىمەن №2 قالالىق اۋرۋحانادا بولدى. بۇل اۋرۋحانا 24/7 رەجىمىندە تاۋلىك بويى جۇمىس ىستەيتىن ستاتسيونار بولىپ سانالادى. مۇندا مامانداندىرىلعان 19 بولىمدە جوعارى ساپالى مەديتسينالىق قىزمەت كورسەتىلەدى. قالالىق اۋرۋحانا وتاندىق جانە شەتەلدىك مەديتسينالىق مەكەمەلەرمەن تىعىز بايلانىستا جۇمىس ىستەيدى. اۋرۋحانادا تالدامانىڭ بارلىق ءتۇرى جاسالادى. كونسۋلتاتيۆتىك-دياگنوستيكالىق بولىمدە پروفەسسورلار, مەديتسينا عىلىمدارىنىڭ كانديداتتارى, جوعارى جانە ءبىرىنشى دارەجەلى دارىگەرلەر قىزمەت كورسەتەدى. سونداي-اق چەكاپ باعدارلاماسى ارقىلى دا مەديتسينالىق كومەك الۋعا مۇمكىندىك بار.
اۋرۋحانا بولىمشەلەرى كومپيۋتەرلىك جانە ماگنيتتىك رەزونانستى توموگرافپەن, كەشەندى انگيوگرافيالىق, وپەراتسيالىق جانە رەانيماتسيالىق بولمەلەرگە ارنالعان قۇرالدارمەن, مانيپۋلياتسيالىق قوندىرعىلارمەن جانە اۆتوماتتاندىرىلعان زەرتحانالىق كەشەنمەن جابدىقتالعان. بۇل جىلىنا 12 مىڭنان استام وپەراتسيا جاساۋعا جانە 16 مىڭنان استام ادامعا قىزمەت كورسەتۋگە مۇمكىندىك بەرەدى. ەمدەۋ مەكەمەسى 360 ستاتسيونارلىق توسەك ورىنعا شاقتالعان.
اۋرۋحانىڭ باس دارىگەرى يۆان ءليدىڭ ايتۋىنشا, مۇندا پاتسيەنتتەردى باستاپقى قابىلداۋ حالىقارالىق تاجىريبە بويىنشا جۇرگىزىلەدى. ياعني, اۋرۋحانانىڭ قابىلداۋ بولىمىنە ترياج دەپ اتالاتىن جۇيە ەنگىزىلگەن. «سول بويىنشا بارلىق ناۋقاستار نەگىزشى ءۇش اعىنعا بولىنەدى. قىزىل – ومىرىنە قاۋىپ ءتونىپ تۇرعان, شۇعىل كومەكتى قاجەت ەتەتىن ناۋقاستارعا ارنالعان. سارى اعىندار دا شۇعىل ناۋقاستار بولىپ تابىلادى. بىراق مۇندا قىزمەت كورسەتۋ ۋاقىتى ەكى ساعاتقا شەگەرىلگەن. ال سوڭعى جاسىل اعىن كەلۋشىلەرگە دياگنوستيكالىق كەڭەس بەرۋگە, بەلگىلى ءبىر ۋاقىت ارالىعىندا كومەك كورسەتۋگە بولاتىن جانە امبۋلاتوريالىق نەگىزدە بوساتىلاتىن ناۋقاستار», – دەيدى ي.لي.
سونداي-اق اتالعان نىسان ەلىمىزدە قارقىندى جۇزەگە اسىرىلىپ كەلە جاتقان دەنساۋلىق ساقتاۋ سالاسىن دامىتۋ جانە جاڭعىرتۋ باعدارلاماسىنا دا بەلسەنە قاتىسۋدا. مەديتسينالىق كومەكتىڭ ساپاسىن ارتتىرۋ باعىتىندا تىڭ باستامالار قولعا الىنىپ, اۋرۋحانا جۇمىسىنا تسيفرلاندىرۋ ۇدەرىسى دە كەڭىنەن ەنگىزىلۋدە. سونىڭ ناتيجەسىندە دارىگەرگە جازىلۋ, كەڭەس الۋ سياقتى جۇمىستار اۋرۋحانانىڭ ۆەب-سايتى ارقىلى جۇرگىزىلەدى.
اتالعان مەديتسينالىق مەكەمەنىڭ قىزمەتكەرلەرىمەن كەزدەسكەن ماۋلەن اشىمباەۆ ولاردى كاسىبي مەرەكەلەرىمەن قۇتتىقتاپ, جۇمىستارىنا تابىس تىلەدى. سونىمەن قاتار پارتيا توراعاسىنىڭ ءبىرىنشى ورىنباسارى بالالارعا ارنالعان قالالىق جۇقپالى اۋرۋلار اۋرۋحاناسىنا باردى. بۇل اۋرۋحانا دا زاماناۋي مەديتسينالىق تەحنولوگيالارمەن جابدىقتالعان, جوعارى ساپالى قىزمەت كورسەتەتىن مەكەمەلەردىڭ ءبىرى. اقش-تان اكەلىنگەن ماسس-سپەكترومەتر اناليزاتورىنىڭ كومەگىمەن مۇندا ميكروبيولوگيا بويىنشا ساپالى تالداۋ جۇمىستارى جۇرگىزىلەدى.
ودان بولەك, پەدياتر-دارىگەرلەردىڭ وسى جەردە وقىپ, بىلىمدەرىن جەتىلدىرۋگە مۇمكىندىك قاراستىرىلعان. وتكەن جىلدان باستاپ بالالار اراسىنداعى اسقازان جۇقپالارىنىڭ الدىن الۋ شارالارى بويىنشا زەرتتەۋ جۇمىستارى دا تۇراقتى جۇرگىزىلىپ كەلەدى.
ماۋلەن اشىمباەۆ مەكەمە قىزمەتكەرلەرىن كاسىبي مەرەكەلەرىمەن قۇتتىقتاپ, دەنساۋلىق ساقتاۋ ەلىمىزدەگى اسا ماڭىزدى سالالاردىڭ ءبىرى ەكەنىن ايتتى.
– قوعامدا كەز كەلگەن ماماندىقتىڭ ءوز ورنى بار. دەگەنمەن, سولاردىڭ ىشىندە دارىگەرلەردىڭ ءرولى ەرەكشە. ويتكەنى حالىقتىڭ دەنساۋلىعى اق حالاتتى ابزال جانداردىڭ جۇمىسىنا تىكەلەي بايلانىستى. ال دەنساۋلىقتىڭ بارىنەن ماڭىزدى ەكەنى ايتپاسا دا تۇسىنىكتى. مۇنىڭ مەملەكەت ءۇشىن دە ماڭىزى جوعارى. سەبەبى مەملەكەتتىڭ ەڭ نەگىزگى بايلىعى شيكىزات, ءىرى ءوندىرىس وشاقتارى, تابيعي قازبالار ەمەس, ءبىلىمدى, دەنى ساۋ ازاماتتار. ءبىلىم مەن مىقتى دەنساۋلىق قانا ءححى عاسىرداعى دامۋ ۇردىستەرىنىڭ باستى تالابى بولىپ وتىر. ياعني, قازىر وزا شاۋىپ, العا شىعۋ ءۇشىن وسى ەكى باسىمدىققا ەرەكشە ءمان بەرۋ كەرەك. وسى تۇرعىدان العاندا ەلىمىزدە ەلباسىمىزدىڭ باستاماسىمەن اۋقىمدى جۇمىستار اتقارىلۋدا. سونىڭ ارقاسىندا وتاندىق مەديتسينا بارلىق جاعىنان قارقىندى دامىپ, جاڭا رەفورمالار تابىستى جۇزەگە اسىرىلىپ جاتىر. بۇل رەتتە «نۇر وتان» پارتياسى دا ەلباسىنىڭ سەنىمدى تىرەگى رەتىندە ايتارلىقتاي قولداۋ كورسەتىپ كەلەدى. الداعى ۋاقىتتا دا پارتيا وسى سالانىڭ ودان ءارى دامۋىنا, دارىگەرلەردىڭ الەۋمەتتىك جاعدايىن جاقسارتىپ, حالىقتىڭ دەنساۋلىعىن نىعايتۋعا باسىمدىق بەرەتىن بولادى, – دەدى ماۋلەن اشىمباەۆ.
سونداي-اق, «نۇر وتان» پارتياسى توراعاسىنىڭ ءبىرىنشى ورىنباسارى مىندەتتى الەۋمەتتىك مەديتسينالىق ساقتاندىرۋ جۇيەسىنە نازار اۋداردى. ءوز سوزىندە ماۋلەن اشىمباەۆ اتالعان باستامانىڭ وتاندىق مەديتسينانى جاڭا دەڭگەيگە كوتەرىپ, وسى سالاداعى بىرقاتار الەۋمەتتىك ماسەلەنىڭ وڭ شەشىلۋىنە ىقپالىن تيگىزەتىنىن تىلگە تيەك ەتتى.
