كەلىسسوزدەر بارىسىندا تاراپتار ەكى جاقتى قاتىناستاردىڭ قازىرگى ماسەلەلەرى جانە ءوزارا ىنتىماقتاستىقتى دامىتۋدىڭ الداعى جوسپارلارى جونىندە اڭگىمەلەستى.
مەملەكەت باسشىسى ەكى ەل اراسىنداعى بايلانىستاردى نىعايتۋدىڭ پەرسپەكتيۆتى باعىتتارىنا توقتالىپ, تاتارستاننىڭ الەۋمەتتىك-ەكونوميكالىق دامۋىنىڭ قارقىنى جوعارى ەكەنىن اتاپ ءوتتى.
نۇرسۇلتان نازارباەۆ قازاقستان مەن تاتارستان اراسىندا باۋىرلاستىق ءارى سەنىمدى قارىم-قاتىناس ورناعانىن ايتتى.
قازاقستان پرەزيدەنتى ساۋدا-ەكونوميكالىق جانە ينۆەستيتسيالىق ىنتىماقتاستىقتى جانداندىرۋدىڭ ماڭىزدىلىعىنا نازار اۋداردى.
– سىزدەردە ءىت-تەحنولوگيالار سالاسى جاقسى دامىپ كەلەدى. ءبىزدىڭ جاستارىمىز بۇل تاجىريبەنى زەرتتەۋى كەرەك. وڭىرارالىق ىنتىماقتاستىق تا ىلگەرىلەپ كەلەدى. ەكى جاقتى ساۋدا كولەمى 700 ميلليون دوللارعا دەيىن ءوستى. ەندى 1 ميلليارد دوللار كورسەتكىشىنە قول جەتكىزۋ كەرەك, – دەدى مەملەكەت باسشىسى.
قازاقستان پرەزيدەنتى ماشينا جاساۋ, قورعانىس جانە عارىش ونەركاسىبى سالالارىندا بىرلەسكەن كاسىپورىندار قۇرۋ مۇمكىندىگى جونىندە ايتتى.
نۇرسۇلتان نازارباەۆ تاتارستاننىڭ مۇناي ونىمدەرىن قايتا وڭدەۋ سالاسىنداعى تاجىريبەسىن اتاپ ءوتتى.
– بارلىق مەملەكەتتەر بالامالى ەنەرگيا كوزدەرىن پايدالانۋعا كوشەتىن بولادى. بىراق, تاياۋ 50 جىل ىشىندە مۇناي مەن گازعا دەگەن سۇرانىس تا ساقتالا بەرەدى. وسى ۋاقىت كەزەڭىن پايدالانىپ, ءبىز وڭدەۋ ونەركاسىبىن قۇرۋىمىز كەرەك, – دەدى مەملەكەت باسشىسى.
سونىمەن قاتار, قازاقستان پرەزيدەنتى اۋىل شارۋاشىلىعى سالاسىنداعى ىنتىماقتاستىق ماسەلەلەرىنە نازار اۋداردى.
– اۋىل شارۋاشىلىعى عىلىمىن دامىتۋ قاجەت. رەسەيگە ەت ونىمدەرىن دە جەتكىزە الامىز. ءبىز جوعارى ساپالى سيىر ەتىن ءوندىرۋ ءۇشىن شەت ەلدەن اسىل تۇقىمدى ءىرى قارا مالدى الىپ كەلدىك, – دەدى نۇرسۇلتان نازارباەۆ.
مەملەكەت باسشىسى قازاقستاننىڭ كولىك-ترانزيت الەۋەتىن دامىتۋدىڭ جانە ينفراقۇرىلىمدىق باعدارلامالاردى جۇزەگە اسىرۋدىڭ ناتيجەلەرىنە توقتالدى.
قازاقستان پرەزيدەنتى مادەني-گۋمانيتارلىق ىنتىماقتاستىق, سونىڭ ىشىندە ءبىلىم بەرۋ مەن مەديتسينا سالاسىنداعى بايلانىستاردى نىعايتۋ ماسەلەلەرىنە نازار اۋداردى.
– قازان قالاسىنىڭ تابىستى دامىپ كەلە جاتقانىنا قۋانىشتىمىن. رەسەيمەن ءوزارا جالپى قارىم-قاتىناسىمىز تۇرعىسىنان العاندا تاتارستان جەتەكشى ورىنداردىڭ بىرىندە. ءبىز ەكى حالىقتىڭ يگىلىگى ءۇشىن ىنتىماقتاستىعىمىزدى جالعاستىرا بەرەتىن بولامىز, – دەدى مەملەكەت باسشىسى.
نۇرسۇلتان نازارباەۆ ر.ميننيحانوۆتىڭ ەلدەرىمىز اراسىنداعى دوستىق قاتىناستاردى, ءوزارا تۇسىنىستىك پەن سەنىمدى نىعايتۋعا قوسقان ۇلەسىن اتاپ ءوتىپ, تاتارستان رەسپۋبليكاسىنىڭ پرەزيدەنتىن ءبىرىنشى دارەجەلى «دوستىق» وردەنىمەن ماراپاتتادى.
رۋستام ميننيحانوۆ ەكونوميكانىڭ ءتۇرلى سەكتورلارىنداعى ءتيىمدى ەكى جاقتى ىنتىماقتاستىقتىڭ ماڭىزدىلىعىن اتاپ ءوتتى.
– بۇگىندە قازاقستان – ءبىزدىڭ باستى سەرىكتەسىمىز. تابىستى بىرلەسكەن جوبالاردى جۇزەگە اسىرۋ تاجىريبەسى ماڭىزدى بولىپ سانالادى, – دەدى تاتارستان رەسپۋبليكاسىنىڭ پرەزيدەنتى.
ر.ميننيحانوۆ قازاقستانداعى ءبىلىم بەرۋ جۇيەسىنىڭ دامۋ قارقىنىن اتاپ ءوتىپ, ستۋدەنتتەرمەن الماسۋ ۇدەرىسىن جانداندىرۋعا دايىن ەكەنىن جەتكىزدى.
تاتارستان پرەزيدەنتى استاناداعى حالىقارالىق «ەكسپو-2017» كورمەسىن ارالاپ كورگەن كەزدە العان اسەرى جونىندە ايتتى.
– «ەكسپو-2017» كورمەسى جوعارى دەڭگەيدە ءوتتى. ءسىز قۋاتتى ءارى زامانۋي الاڭ سالدىڭىز. وسى كەشەننىڭ بازاسىندا «استانا» حالىقارالىق قارجى ورتالىعىنىڭ اشىلۋى ايتۋلى وقيعا بولادى دەپ ويلايمىن. ءبىز كەلەشەكتە قازاقستانداعى ارىپتەستەرىمىزبەن «استانا» حالىقارالىق قارجى ورتالىعى اياسىندا جۇمىس ىستەگىمىز كەلەدى, – دەدى ر.ميننيحانوۆ.
