اتالعان ماسەلە جۋىردا عانا وبلىس اكىمىنىڭ كەڭەسىندە قايتا قارالدى. وبلىستىق قارجى باسقارماسىنىڭ باسشىسى گاملەت قايناربەكوۆتىڭ وبلىس بيۋدجەتىنىڭ اعىمداعى جىلدىڭ ءبىرىنشى ماۋسىمىنا ورىندالۋى تۋرالى ەسەبىنە سۇيەنسەك, اتالعان مەرزىم ىشىندە وبلىس بيۋدجەتىنىڭ كىرىستەرى 97 ميلليارد 227,3 ميلليون تەڭگە سوماسىندا 105,5 پايىزعا قامتاماسىز ەتىلگەن. سونىمەن قاتار, مەنشىكتى كىرىستەر جوسپارى 24 ميلليارد 251,3 ميلليون تەڭگەگە نەمەسە 123,8 پايىزعا ورىندالىپ, بيۋدجەتكە 4 ميلليارد 662,7 ميلليون تەڭگە جوسپاردان ارتىعىمەن تۇسكەن. سونىمەن قاتار, باسقارما باسشىسىنىڭ ايتۋىنشا, وبلىس بويىنشا جوسپارداعى 95 ميلليارد 892,0 ميلليون تەڭگە سوماسىنداعى بيۋدجەتتىك قاراجاتتار 94 ميلليارد 283,1 ميلليون تەڭگەگە نەمەسە 98,3 پايىزعا يگەرىلگەن. الايدا 1 ميلليارد 608,9 ميلليون تەڭگە يگەرىلمەي قالىپ تۇر.
قارجى باسقارماسىنىڭ باسشىسى تاراز قالاسىنىڭ كورسەتكىشى وبلىستىڭ ورتاشا كورسەتكىشىنەن تومەن ەكەندىگىن دە اتاپ ءوتتى. ونىڭ ايتۋىنشا, جالپى جامبىل وڭىرىندە بۇگىنگى كۇنى يگەرىلمەگەن قاراجاتتاردىڭ 837,3 ميلليون تەڭگەسى نەمەسە 52,1 پايىزى قۇرىلىس نىساندارى بويىنشا قالىپتاسىپ وتىر ەكەن. سونىمەن قاتار, بۇلار نەگىزىنەن رەسپۋبليكالىق بيۋدجەتتەن بولىنگەن نىسانالى ترانسفەرتتەر مەن جەرگىلىكتى بيۋدجەت ەسەبىنەن يگەرىلمەگەن قاراجاتتار ەكەنىن دە ايتتى. «جامبىل, ت.رىسقۇلوۆ اۋداندارىندا جانە تاراز قالاسىندا ءالى دە يگەرىلمەگەن قاراجات سوماسى قالىپ وتىر. سونداي-اق, تالاس, مەركى اۋداندارىندا دا پروبلەما بار», دەيدى گاملەت قايناربەكوۆ.
ال وبلىستىق قۇرىلىس, جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ادىلەت احاتاەۆتىڭ مالىمەتىنشە, 47,1 ميلليارد تەڭگەنى قۇرايتىن 273 لوتتى ساتىپ الۋ جوسپارى ازىرلەنىپتى. بۇگىنگى تاڭدا ونىڭ 256-سى بويىنشا كەلىپ تۇسكەن وتىنىمدەرگە كونكۋرس جاريالانىپ, 35 ميلليارد تەڭگەنى قۇرايتىن 195 لوت بويىنشا جەڭىمپازدار انىقتالعان. سونىمەن قاتار, وتكەن جىلى 1,6 ميلليارد تەڭگە ۇنەمدەلسە, بيىلعى بەس ايدىڭ ىشىندە 1,3 ميلليارد قارجى ۇنەمدەلگەن.
ءوز سوزىندە وبلىس اكىمى اسقار مىرزاحمەتوۆ الداعى ۋاقىتتا بولىنگەن قاراجاتتىڭ التى ايدا يگەرىلۋى جايىن قارايتىنىن, سوندىقتان دا بەس ايلىق قورىتىندى كەزىندەگىدەي جاعدايدىڭ ورىن الماۋىن قاداعالاۋدى ءتيىستى باسشىلارعا تاپسىردى. سونىمەن قاتار, اكىم وبلىستا 2019 جىلدىڭ بيۋدجەتىنە قاتىستى بيۋدجەتتىك كوميسسيا ءوز جۇمىسىن باستاعالى تۇرعانىن دا ايتتى.
حاميت ەسامان,
«ەگەمەن قازاقستان»
جامبىل وبلىسى
