استانا قالاسى مادەنيەت جانە سپورت باسقارماسىنىڭ ۇيىمداستىرۋىمەن وتكىزىلىپ كەلە جاتقان ايتۋلى ونەر دۋمانىنىڭ باستى ماقساتى – تەاتر ونەرى سالاسىندا ىنتىماقتاستىقتى نىعايتۋ.
– سامعاۋ ءسوزىنىڭ ماعىناسى وتە كەڭ. بۇگىنگى ونەر دۋمانىنىڭ نەگىزىندە بايلانىستىرساق, وندا بۇل اتاۋ – ونەر كوگىندە قالىقتاۋ, شابىتتىڭ شىڭىندا ءجۇرۋ, ءاردايىم ۇزدىك بولۋ دەگەن مازمۇنعا سايادى. وسى جىلدار ىشىندە فەستيۆال ءوزىنىڭ باستى مىندەتى – ەلوردا مادەنيەتىن دامىتۋ جانە قازاقستاندىق تەاتر ونەرىنە دەگەن قىزىعۋشىلىقتى ارتتىرۋ, شەتەلدىك سەرىكتەستەرمەن رۋحاني-شىعارماشىلىق ىنتىماقتاستىقتى نىعايتۋ, گۋمانيتارلىق بايلانىستاردى كەڭەيتۋ سىندى الدىنا قويعان ماقساتتارىن ابىرويمەن ەڭسەرىپ كەلەدى. بۇگىندە «SAMGAU» – وتاندىق جانە الەمدىك تەاتر ونەرى ماماندارىنىڭ شىعارماشىلىق پىكىر الماسۋ الاڭى عانا ەمەس, ساحنا سالاسى قىزمەتكەرلەرى مەن استانالىق ونەر جاناشىرلارى ءۇشىن ءار جىل سايىن اسىعا كۇتەتىن سۇيىكتى ونەر مەرەكەسىنە دە اينالىپ ۇلگەردى. سوندىقتان فەستيۆالدىڭ بارلىق قاتىسۋشىلارىنا ساتتىلىك جانە جەڭىس تىلەيمىن, – دەپ ءوز قۇتتىقتاۋىن جەتكىزدى فەستيۆالدىڭ سالتاناتتى اشىلۋ راسىمىنە قاتىسقان استانا قالاسى اكىمىنىڭ ورىنباسارى ەرمەك امانشاەۆ.
بۇگىندە ەلوردا مادەنيەتىنىڭ اجىراماس بولىگىنە اينالىپ ۇلگەرگەن «SAMGAU» حالىقارالىق تەاتر فەستيۆالى وسىدان 6 جىل بۇرىن استانانىڭ 15 جىلدىق مەرەيتويىنا وراي, قالا اكىمدىگىنىڭ قولداۋىمەن وتكىزىلگەن بولاتىن. باس شاھار مادەني-رۋحاني ءومىرىنىڭ تىنىسىمەن تانىستىرۋدى ماقسات تۇتقان ونەر دۋمانى 2012 جىلى قالا كۇنى قارساڭىندا تۇڭعىش رەت ءوز شىمىلدىعىن ءتۇردى. سودان بەرگى 6 جىل ۋاقىت ارالىعىندا فەستيۆال اياسىن كەڭەيتىپ, مازمۇنىن بايىتىپ, بۇگىندە باس قالانىڭ باستى مادەني وقيعاسىنا اينالدى.
بيىل فەستيۆالعا سەربيا, قىرعىزستان, وزبەكستان, تاتارستان, سونىمەن قاتار پەتروپاۆل, وسكەمەن, شىمكەنت جانە استانا تەاترلارى – بارلىعى 12 ونەر ۇجىمى قاتىسادى. سونداي-اق تەاتر سۇيەر قاۋىم فەستيۆال باعدارلاماسى اياسىندا قازاق ۇلتتىق ونەر ۋنيۆەرسيتەتى ستۋدەنتتەرىنىڭ «قوزى كورپەش-بايان سۇلۋ» جانە «رەۆوليۋتسيا» اتتى قوس بىردەي وزىندىك جۇمىسىن دا تاماشالاي الادى.
استانا قالاسىنىڭ 20 جىلدىعىنا ارنالعان «SAMGAU» VI حالىقارالىق تەاتر فەستيۆالىنىڭ تاعى ءبىر قۋانىشتى جاڭالىعى – فەستيۆال وسى جىلدان باستاپ اتاۋى مەن فورماتىن وزگەرتتى. ياعني بۇعان دەيىن «ساحنادان سالەم!» اتالىپ كەلگەن ونەر دۋمانى بيىلدان باستاپ «SAMGAU» اتاۋىن يەلەندى. سونداي-اق ۇزدىك اتانعان قويىلىمدارعا ارنايى جۇلدە قورى تاعايىندالدى. فەستيۆالعا قاتىسىپ, ۇزدىك ونەر كورسەتكەن ۇجىمدار: «ۇزدىك سپەكتاكل», «ۇزدىك رەجيسسۋرا», «ۇزدىك ەر ادام بەينەسى», «ۇزدىك ايەل ادام بەينەسى», «II پلانداعى ەر ادام بەينەسى», «II پلانداعى ايەل ادام بەينەسى», «ۇزدىك سۋرەتشى» اتالىمدارىندا جانە كسرو حالىق ءارتىسى, قازاقستاننىڭ حالىق قاھارمانى ءا.مامبەتوۆ اتىنداعى ارنايى سىيلىقپەن ماراپاتتالاتىن بولادى.
استانا قالاسى جاستار تەاترى ۇسىنعان ن.گوگولدىڭ «رەۆيزور» تراگيفارسىمەن (سپەكتاكلدىڭ قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى نۇرقانات جاقىپباي) اشىلعان مادەني شارا ءبىر اپتا بويى استانا ءتورىن تەاتر ونەرىنىڭ دۋمانىنا بولەيتىن بولادى.
نازەركە جۇماباي,
«ەگەمەن قازاقستان»
