مەملەكەت باسشىسى نۇرسۇلتان نازارباەۆ بىلتىرعى جىلدىڭ ءساۋىر ايىندا جاريالاعان «بولاشاققا باعدار: رۋحاني جاڭعىرۋ» اتتى ماقالاسىندا كوپتەگەن وزەكتى ماسەلەلەرگە توقتالا كەلە, قوعامدىق سانانى جاڭعىرتۋ ماقساتىندا ۇكىمەتكە ناقتى تاپسىرمالار بەرگەن ەدى. سول ماقالادا كورسەتىلگەن ماڭىزدى جوبالاردىڭ ءبىرى – «قازاقستانداعى 100 جاڭا ەسىم». ايتۋلى جوبانىڭ ءمانى مەن ماڭىزى جانە ماقسات-مۇددەسىنە توقتالعان ەلباسى «جاستار ومىرگە شىنايى كوزبەن قاراپ, ءوز تاعدىرلارىنا وزدەرى يەلىك ەتە الاتىن ازامات بولىپ قالىپتاسۋى ءۇشىن ولارعا ۇلگى ۇسىنۋىمىز كەرەك», دەپ قاداپ ايتتى.
الماتىدا وتكەن وسى كوممۋنيكاتيۆتىك جانە موتيۆاتسيالىق ءىس-شاراعا «قازاقستانداعى 100 جاڭا ەسىم» اتتى رەسپۋبليكالىق بايقاۋىندا جەڭىمپاز اتانعان ءبىر توپ ازامات قاتىستى. ولار – ۆولەيبولدان قازاقستاننىڭ پاراليمپيادالىق جاستار قۇراماسىنىڭ كاپيتانى سەرىك ەسماتوۆ, جاس يننوۆاتور ءارى «MBionics» كومپانياسىنىڭ نەگىزىن قالاۋشى ماۋلەن بەكتۇرعانوۆ, كينورەجيسسەر جانە بەلسەندى قوعام قايراتكەرى ءازيز زايروۆ, جاڭا تەحنولوگيالاردى ەنگىزۋ جۇمىستارىمەن اينالىساتىن دارىندى عالىم-حيميك دياس تاستانبەك ۇلى جانە جۇرەكتىڭ پاتولوگياسىن كورۋگە كومەكتەسەتىن جۇرەك اقاۋلارىنىڭ ۋلترادىبىستىق دياگنوستيكاسىن جاسايتىن ساناۋلى كارديوحيرۋرگتىڭ ءبىرى گۇلجان سارسەنباەۆا. جوعارىدا ەسىمدەرى اتالعان ازاماتتاردىڭ بارلىعى دا ەشقانداي قيىندىققا مويىماي, ءومىر جولىندا كەزدەسكەن كەدەرگىلەردى بۇزىپ-جارىپ, كوزدەگەن ماقساتتارىنا قول جەتكىزگەن جاندار ەكەنى داۋسىز.
– «قازاقستانداعى 100 جاڭا ەسىم» – ەلباسىنىڭ «بولاشاققا باعدار: رۋحاني جاڭعىرۋ» اياسىنداعى اۋقىمدى جوبالاردىڭ ءبىرى. جوبانىڭ باستى ماقساتى – تاۋەلسىزدىك داۋىرىندە ەلىمىزدىڭ كوركەيۋىنە ۇلەس قوسقان, ۇلتىمىزدىڭ التىن قورىنا ەنۋگە لايىقتى جەرلەستەرىمىزدى كوپشىلىككە تانىتۋ. سونىمەن قاتار قاراپايىم حالىق اراسىنداعى ءبىلىمى مەن ەڭبەگى, ىزدەنىمپازدىعى مەن تاباندىلىعى, باتىرلىعى مەن قايسارلىعىنىڭ ارقاسىندا تابىسقا جەتكەن تۇلعالاردى كەڭىنەن ناسيحاتتاۋ. ماسەلەن, ءتۇرلى سالادا جەمىستى ەڭبەك ەتىپ, تورتكۇل دۇنيەگە تانىلعان شەت مەملەكەتتەردىڭ ازاماتتارى بۇل كۇندەرى قازاقستانعا ءجيى ات باسىن بۇرادى. ولاردىڭ ارقايسىسىنىڭ ەسىمىن بارلىعىمىز جاتقا بىلەمىز. ال ونداي تۇلعالار ءبىزدىڭ ەلدە دە بار. سول ابزال ازاماتتاردىڭ ءومىرى مەن تاعدىرىن, ءجۇرىپ وتكەن جولىن, باعىندىرعان بەلەستەرىن, جۇزەگە اسىرعان يگى ىستەرىن, كوپشىلىككە تيگىزگەن شاپاعاتىن ناسيحاتتاۋدى ماقسات تۇتىپ, وسىنداي اۋقىمدى شارالاردى ءجيى ۇيىمداستىرۋدى كوزدەپ وتىرمىز, – دەيدى اقپارات جانە كوممۋنيكاتسيالار مينيسترلىگى اقپارات كوميتەتىنىڭ قوعاممەن بايلانىس جانە مەملەكەتتىك ورگانداردى ۇيلەستىرۋ باسقارماسىنىڭ باسشىسى باقنياز قاراشينا.
راسىندا دا, ونداي تۇلعالار قازاقستاندا دا بار. ءبىر عانا مىسال, وسى شاراعا قاتىسقان 24 جاستاعى يننوۆاتور ماۋلەن بەكتۇرعانوۆ بۇرىن قاتارداعى كەڭسە جۇمىسشىلارىنىڭ ءبىرى بولعان. كەڭسەدە وسىلاي تاپجىلماي وتىرا بەرسەم, ءومىرىم ەلەۋسىز وتەدى دەپ ويلاعان ول تاۋەكەلگە بەل بۋدى. ءوزىنىڭ بويىنداعى قارىم-قابىلەتىن پايدالانعان جاس مامان جاڭاشىلدىققا بەت بۇردى. اتاپ ايتساق, قازاقستانداعى تۇڭعىش بيونيكالىق قول پروتەزدەرىن ازىرلەپ, جاساتتى. بۇل قۇرال III-توپتاعى مۇگەدەكتەرگە ارنالعان جانە ولاردىڭ ءومىر سالتىن جاقسارتادى. پروتەز ادام قولىنىڭ فۋنكتسيونالىن بارىنشا قايتالايدى جانە ادام يمپۋلستەرى ارقىلى بەلسەندىرىلەدى. ءوزىنىڭ ەڭبەگى ارقىلى ماۋلەن قازاقستان عىلىمىنا ۇلكەن سەرپىلىس اكەلدى.
ال سەرىك ەسماتوۆ بولسا, اپاتتىڭ سالدارىنان ەكى اياعىنان بىردەي ايىرىلىپ, مۇگەدەكتەر ارباسىنا تاڭىلدى. 13 جاستاعى بالا ءۇشىن بۇل اۋىر سوققى بولدى. الايدا سەرىك تاعدىرعا مويىنسىنعان جوق. ول قيىندىقپەن كۇرەسىپ, ءوزىنىڭ ارمانىنا قاراي بەت الدى. بۇل كۇندەرى قازاقتىڭ قايسار ۇلى پاراليمپياداشىلار دوداسىندا جەڭىمپاز اتانىپ قانا قويماي, رەسپۋبليكامىزدىڭ ءار اۋماعىندا ءوتىپ جاتقان قوعامدىق جۇمىستارعا دا بەلسەنە ارالاسادى.
عالىم سۇلەيمەن,
«ەگەمەن قازاقستان»
الماتى
