دارىگەر – حالىققا قىزمەت ەتۋگە ءومىرىن ارنايتىن ابزال ماماندىق. ول موينىنا ومىردەگى ەڭ قىمبات جاۋاپكەرشىلىك سانالاتىن ادام ءومىرىن الادى. سوندىقتان دا بەدەلدى, قاجەتتى جانە ادامگەرشىلىكتى تالاپ ەتەتىن ىزگى ماماندىقتاردىڭ ءبىرى بولىپ قالا بەرمەك.
وسى ىسپەتتى اۋىرتپالىق جۇگىن قورىقپاي ارقالاعان قوستاناي وبلىسىنداعى رۋدنىي قالالىق اۋرۋحاناسىنىڭ كارديولوگيا بولىمشەسىنىڭ دارىگەرى زينات كەنىشبەكقىزى 23 جىلدان بەرى ناۋقاستار جانىنا اراشا بولىپ كەلە جاتقان تاجىريبەلى مامان.
دارىگەر قانداي قاسيەتتەرگە يە بولۋى كەرەك؟ زينات كەنىشبەكقىزىنىڭ ايتۋىنشا, ەڭ الدىمەن اق جەلەڭدى جاندار اقجۇرەك بولۋى قاجەت. ياعني ادامدى جاقسى كورە ءبىلۋى ءتيىس. ءبىلىمدى دە بىلىكتى, كۇردەلى جاعدايلارعا ءازىر جانە ماحاببات پەن مەيىرىمدىلىكتى تۋ ەتۋى شارت. سوندا عانا سالاسىنىڭ جىلىگىن شاعىپ, مايىن ىشكەن مامانعا اينالادى.
«دارىگەردىڭ جۇمىسى ناۋقاستىڭ جانىن قيناعان ازاپتى جەڭۋدەن تۇرادى. ول حالىقتىڭ دەنساۋلىعىنا جاۋاپتى مامان. بويىنداعى قايسار مىنەز – دارىگەردىڭ باستى قارۋى. ياعني الدىندا قانداي قيىن ءىس كۇتىپ تۇرسا دا, بارىنە بىردەي توتەپ بەرۋگە دايىن بولۋى دارىگەردىڭ قايسارلىعى مەن كۇرەسكەرلىگىنىڭ ايناسى. سونداي-اق ادام ءومىرىنىڭ اراشاشىسى شەشىمدى تەز قابىلداپ, جاۋاپكەرشىلىكتەن جالتارماۋى كەرەك. ويتكەنى قاي جەرىڭ اۋىرسا, جانىڭ سول جەردە عوي, دەيدى كارديولوگ-دارىگەر.
البەتتە, قانشاما ادامنىڭ جانىن ساقتاپ قالعان مەيىرىمدى جان بارلىق قۇرمەتكە يە. ول ءتىپتى باس اۋىرىپ, بالتىر سىزداپ كەلگەن مىڭداعان ادامداردىڭ كوڭىلىنە دەمەۋ, جانىنا سۇيەنىش بولا بىلگەن دارىگەردىڭ ءبىراۋىز جىلى ءسوزى اۋىرىپ جاتقان ادامعا دارىدەن دە ارتىق اسەر ەتەتىنىن ايتادى.
– جۇمىس بارىسىندا ءتۇرلى جاعدايمەن بەتپە-بەت كەلۋگە تۋرا كەلەدى. قيىن ساتتەردە كۇردەلى جاعدايدان شىعا ءبىلۋ – تاپقىرلىقتىڭ بەلگىسى. ايتپەسە سەنىمسىزدىكتىڭ كەسىرىنەن جۇرەك سوعۋىن توقتاتادى. سول سەبەپتى سابىرلى شەشىم قابىلداي ءبىلۋدىڭ ماڭىزى زور. ارينە, ەڭبەك جولىندا ەستە قالارلىق ساتتەر كوپ. الايدا, مەن ءۇشىن سونىڭ ىشىندەگى ەڭ قيىن ءارى جۇرەگىمە تيگەنى ەكى بىردەي جاننىڭ ءومىرىن اراشالاپ قالۋعا جانتالاسقان وقيعا دەر ەدىم. جۇرەك اقاۋى بار جۇكتى ايەلدىڭ ءبىزدىڭ اۋرۋحاناعا كەلگەنى ءالى ەسىمدە. دارىگەرلەردىڭ ايتقان سوزىنە قۇلاق اسپاي, ءوز بەتىنشە ارەكەت جاساعان جاس انانىڭ ءومىرى قىل ۇستىندە تۇرعانىن ول بىلمەگەن ەدى. ءومىرىن بارىنشا ساقتاپ قالۋ ءبىزدىڭ دارىگەرلىك مىندەتىمىز بولاتىن. جۇرەگىنىڭ ءالسىز ەكەندىگىنە قاراماستان قۇرساعىنداعى نارەستەگە جاڭا ءومىر سىيلاۋ جانكەشتىلىك قوي. الايدا مۇنىڭ ءبىر عانا جولى بولدى. نە انانىڭ ءومىرىن اراشالاۋ, نە نارەستەگە جاڭا ءومىر سىيلاۋ. بۇل – وتە قيىن شەشىم. ءدال وسىنداي اۋىرتپالىقتى بۇرىن-سوڭدى سەزىنىپ كورمەپپىن. مۇنداي مەديتسينالىق وپەراتسيانى جۇزەگە اسىرۋعا ءبىزدىڭ اۋرۋحانا قاۋقارسىز ەدى. سول سەبەپتى دە انانى تەز ارادا وبلىستىق اۋرۋحاناعا جەتكىزۋ كەرەك بولدى. جول ۇستىندە جۇكتى ايەلدىڭ قان قىسىمى كەنەتتەن تومەندەپ كەتىپ, جۇرەگى ءبىر مەزەتتە توقتاپ قالادى. بار جىگەرىمدى جيناپ, سول ارادا العاشقى كومەك كورسەتۋگە اسىقتىم. دەفيبريلياتوردىڭ كومەگىمەن سونگەن جۇرەكتى قايتا ومىرگە اكەلدىم. بىراق, بۇل ۋاقىتشا عانا بولدى. اۋرۋحاناعا جەتكەنشە انانىڭ ءومىرىن اراشالاپ قالۋ مۇمكىن ەمەس ەدى. سول سەبەپتى قۇرساقتاعى نارەستەگە جاڭا ءومىر سىيلاعان دارىگەردىڭ قانداي اۋىرتپالىقپەن بەتپە-بەت كەلگەنىنە كوزىمىز جەتىپ وتىر, دەيدى زينات كەنىشبەكقىزى تولقىپ.
دارىگەرگە وسى ادال قىزمەتى ءۇشىن 2016 جىلى قالا اكىمىنىڭ ديپلومىمەن ماراپاتتالدى. جالپى, رۋدنىي قالالىق كارديولوگيا بولىمشەسىنىڭ قىزمەتكەرلەرى ادام ءومىرىن اراشالاپ الىپ قالۋ, ولارعا ەكىنشى ءومىر سىيلاۋ- ءار دارىگەردىڭ باستى مىندەتى دەپ بىلەدى. ولاردىڭ كومەگىمەن توقتاعان جۇرەك قايتا سوعىپ, سونگەن ءۇمىت قايتا جانادى. سوندىقتان ولارعا ءاردايىم قۇرمەت كورسەتىپ جۇرەيىك.
لاۋرا ەشنازاروۆا,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى
ساياساتتانۋ جانە جۋرناليستيكا فاكۋلتەتىنىڭ ءى كۋرس ستۋدەنتى
