وزبەكستاندىق دەلەگاتسيانى جىبەك جولى كەدەن بەكەتىندە قارسى العان دەپۋتاتتار اتالعان بەكەتتى اباتتاندىرۋ, دامىتۋ جايىن تالقىلادى. ال نەگىزگى ماسەلەلەر پارلامەنتارالىق شەكارا جانە سىرتقى ەكونوميكالىق ىنتىماقتاستىق تاقىرىبىندا وتكەن وتىرىستا ورتاعا سالىندى. پارلامەنت سەناتىنىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ ءتورايىمى داريعا نازارباەۆا كەزدەسۋدىڭ ماڭىزدى ناتيجەسىنىڭ ءبىرى رەتىندە پارلامەنتتىك كوميسسيا قۇرىلعانىن اتاپ ءوتتى. بۇل ءوز كەزەگىندە ەكى ەل اراسىنداعى قارىم-قاتىناستى نىعايتۋعا باعىتتالعان جۇمىستاردىڭ جۇيەلى جۇرگىزىلۋىنە سەپتىگىن تيگىزبەك. سونداي-اق كوميتەت توراعاسىنىڭ ايتۋىنشا, دەپۋتاتتاردىڭ كەزدەسۋلەرى بەلگىلەنگەن مەرزىمدە وتكىزىلىپ, كوتەرىلگەن ماسەلەلەر بويىنشا جۇزەگە اسىرىلعان جۇمىستار تالقىلانباق.
كەزدەسۋ بارىسىندا ەكى ەل اراسىندا ءوزارا ءتيىمدى ساۋدانىڭ سەرپىندى دامىپ كەلە جاتقاندىعى دا ايتىلدى. مىسالى, 2017 جىلى قازاقستان مەن وزبەكستان اراسىنداعى ساۋدا اينالىمى 2 ملرد اقش دوللارىنا جەتىپ, 2016 جىلعى كورسەتكىشپەن سالىستىرعاندا 31,2% جوعارى بولعان. قازاقستاننان وزبەكستانعا ەكسپورت كولەمى 35 پايىزعا ارتىپ, 1,3 ملرد اقش دوللارىنا جەتتى. وزبەكستاننان اكەلىنەتىن تاۋارلار كولەمى 25,1 پايىزعا ارتىپ 735,2 ملن اقش دوللارىن قۇرادى. ال 2018 جىلى ساۋدا اينالىمىن 3 ملرد اقش دوللارىنا, 2020 جىلى ونى 5 ملرد اقش دوللارىنا جەتكىزۋدىڭ ءوزارا ءتيىمدى جولدارىن قاراستىرۋ كوزدەلگەن. بۇعان بيىل وزبەكستاننىڭ قازاقستانداعى جىلى جاريالانۋى, مەملەكەت باسشىلارىنىڭ ىسكەرلىك قارىم-قاتىناسىنا وڭ ىقپال ەتەتىنى انىق.
جالپى, وزبەكستاننىڭ قازاقستانداعى جىلىن وتكىزۋ اياسىندا ەكونوميكا, تۋريزم, مادەني-گۋمانيتارلىق سالالاردا 200-دەن استام ءىس-شارا وتكىزۋ جوسپارلانىپ وتىر.
العا قويىلعان ماقساتتارعا قانىق سەناتورلار كەزدەسۋ بارىسىندا بىرقاتار ۇسىنىس-تىلەكتەرىن ورتاعا سالدى. مىسالى, سوڭعى كەزدەرى بارىس-كەلىستىڭ ۇلعايۋىنا بايلانىستى جۇمىسى كۇردەلەنە تۇسكەن وتكىزۋ پۋنكتتەرى قاتارىن كوبەيتۋ, رەسەي, ازەربايجان, يران, تاعى باسقا دا شەتەلدەرگە شىعۋ مۇمكىندىگى بار قازاقستان تەڭىز پورتتارىن ورتاق يگىلىككە پايدالانۋ قاجەت. كولىك لوگيستيكاسى, ياعني تاۋار تاسىمالى تۇرعىسىنداعى ماسەلەلەر دە ايتىلدى. بۇل ورايدا د.نازارباەۆا ەكىجاقتى كەدەرگىلەردى الىپ تاستاۋ ءۇشىن ۇكىمەتكە ناقتى ۇسىنىستار جولداۋ قاجەتتىگىن اتاپ ءوتتى.
ال وزبەكستان ولي ءماجىلىسىنىڭ حالىقارالىق قاتىناستار, سىرتقى ەكونوميكالىق بايلانىستار, شەتەل ينۆەستيتسيالارى جانە تۋريزم كوميتەتىنىڭ توراعاسى الىشەر قۇرمانوۆتىڭ ايتۋىنشا, سارىاعاشتاعى كەزدەسۋ ەكى ەل اراسىندا شەشىلمەيتىن ماسەلە بولمايتىنىن كورسەتتى. «پارلامەنت دەپۋتاتتارى پرەزيدەنتتەرىمىزدىڭ ەكى ەلدى جاقىنداستىرا ءتۇسۋ ماقساتىنداعى بارلىق باستامالارىن تولىق قولدايدى. بۇگىن كوپ ماسەلە, ۇسىنىستار ايتىلدى. سونىڭ ىشىندە قازاقستاندىق ارىپتەستەرىمىز «بايقوڭىر» عارىش ايلاعىن ورتاق يگىلىككە پايدالانۋ قاجەتتىگىن ايتتى. اەروعارىش سالاسىنداعى قارىم-قاتىناس بارىسىنا كوز جۇگىرتسەك, بۇل باعىتتا ناقتى ءبىر جۇمىس اتقارىلماعانىن اڭعاراسىز. ءححى عاسىردا جاڭا تەحنولوگيالاردى مەڭگەرۋ ماڭىزدى. جالپى, بۇگىنگى كەزدەسۋ ءبىز ءۇشىن وتە پايدالى بولدى – دەدى الىشەر قۇرمانوۆ.
كەزدەسۋ بارىسىندا كوتەرىلگەن ماسەلەلەر بويىنشا سەناتورلار ۇكىمەتكە ءوز ۇسىنىستارىن جولدايتىن بولادى. سونداي-اق بۇل كۇنى وزبەكستاندىق دەلەگاتسياعا «قازاقستان ينجينيرينگ» ۇلتتىق كومپانياسى» اق ونىمدەرى تانىستىرىلىپ, ءوندىرىس سالاسىنداعى الەۋەتى باياندالدى.
عالىمجان ەلشىباي,
«ەگەمەن قازاقستان»
وڭتۇستىك قازاقستان وبلىسى
