جيىنعا ساياسي كەڭەستىڭ مۇشەلەرى – ۇكىمەت, پارلامەنت جانە پرەزيدەنت اكىمشىلىگى باسشىلارى, مەملەكەتتىك حاتشى, «نۇر وتان» پارتياسىنىڭ ماجىلىستەگى فراكتسياسىنىڭ دەپۋتاتتارى, ورتالىق جانە جەرگىلىكتى اتقارۋشى ورگانداردىڭ باسشىلارى جانە بەينەكونفەرەنتسيا بايلانىسى رەجىمىندە ەلىمىزدىڭ بارلىق ءوڭىرىنىڭ وكىلدەرى – وبلىس اكىمدەرى, وبلىستىق ءماسليحاتتاردىڭ حاتشىلارى, پارتيانىڭ وبلىستىق فيليالدارى توراعالارىنىڭ ءبىرىنشى ورىنباسارلارى قاتىستى. ساياسي كەڭەستىڭ وتىرىسىندا پارتيانى جۇيەلى جاڭعىرتۋ جانە «پرەزيدەنتتىڭ بەس الەۋمەتتىك باستاماسىنىڭ» جۇزەگە اسىرىلۋىنا قوعامدىق باقىلاۋ جاساۋ ءىسىن ۇيىمداستىرۋ ماسەلەلەرى قارالدى.
مەملەكەت باسشىسى, پارتيا توراعاسى نۇرسۇلتان نازارباەۆ ءوزىنىڭ كىرىسپە سوزىندە پارتيا ساياسي كەڭەسىنىڭ وتكەن جىلدىڭ قاراشا ايىنداعى وتىرىسىندا بەرگەن تاپسىرمالارىن ەسكە سالىپ ءوتتى. اتاپ ايتقاندا, ەلباسى پارتيالىق كادرلارمەن جۇمىستى كۇشەيتۋ, جەرگىلىكتى وكىلدىك ەتۋشى ورگانداردى قالىپتاستىرۋدا پارتيانىڭ ءرولىن ارتتىرۋ, جالپىۇلتتىق كۇن ءتارتىبىن قالىپتاستىرۋعا بەلسەندى قاتىسۋ, پارتيالىق تەحنولوگيالاردى جەتىلدىرۋ, اناليتيكالىق الەۋەتتى كۇشەيتۋ جانە پارتيالىق ءبىلىم بەرۋ ساپاسىن ارتتىرۋدى كوزدەيتىن جوبالاردى جۇزەگە اسىرۋ ماسەلەلەرىن تاپسىرعان بولاتىن.
وعان قوسا, ساياسي كەڭەستىڭ بۇعان دەيىنگى وتىرىسىندا پارتيا مۇشەلەرىنىڭ سان ەمەس, ساپالىق قۇرامىنا باسىمدىق بەرۋ, پارتيا جۇمىسىن جەتىلدىرۋدە جاڭا ساياسي تەحنولوگيالاردى قولدانۋ, جاستارمەن بەلسەندى جۇمىس جۇرگىزۋ, «جاس وتان» جاستار قاناتىنا ەلىمىزدەگى بارلىق جاستار ۇيىمدارىنىڭ باسىن بىرىكتىرۋگە ۇيىتقى بولۋدى جۇكتەيتىن مىندەتتەر قويىلعان ەدى.
مىنە, وسى مىندەتتەردىڭ, جوسپارلانعان جۇمىستاردىڭ ناتيجەسى مەن ەلىمىزدەگى ءاربىر ازاماتتىڭ تۇرمىستىق احۋالىن جاقسارتۋعا ارنالعان «پرەزيدەنتتىڭ بەس الەۋمەتتىك باستاماسىنىڭ» ورىندالۋى بويىنشا ەسەپ بەرەتىن ءسات جاز ماۋسىمىنىڭ العاشقى كۇنىنە سايكەس كەلدى.
ەلباسى بۇل جۇمىستاردى ورىنداۋ ءۇشىن زاڭنامالىق بازا جەتىلدىرىلگەندىگىن جانە پارتيانىڭ پارلامەنتتەگى فراكتسياسىنىڭ وسى ماقساتتا اۋقىمدى جۇمىس اتقارعاندىعىن دا اتاپ ءوتتى.
ساپانى حالىققا كورسەتىلگەن ناقتى كومەك ايقىندايدى
جالپى پرەزيدەنتتىڭ تاپسىرماسى بويىنشا «نۇر وتان» پارتياسى قازاقستان حالقى اسسامبلەياسىمەن بىرلەسە وتىرىپ جوعارىدا اتالعان مىندەتتەردىڭ جۇزەگە اسىرىلۋىنا قوعامدىق باقىلاۋدى كۇشەيتۋدى قولعا العان بولاتىن.
وسى ورايدى پارتيا توراعاسىنىڭ ءبىرىنشى ورىنباسارى ماۋلەن اشىمباەۆ ءوز بايانداماسىندا ەلباسىنىڭ پارتيانى جۇيەلى جاڭعىرتۋ جونىندەگى تاپسىرماسى بويىنشا سوڭعى ايلاردا قانداي شارالار اتقارىلعانىن جەتكىزدى.
م.اشىمباەۆتىڭ ايتۋىنشا, ەلباسى تاپسىرماسىنا ساي, «نۇر وتان» پارتياسىنىڭ الەۋەتى ارقىلى «تسيفرلى قازاقستان», «رۋحاني جاڭعىرۋ» باعدارلامالارى ەل اراسىندا كەڭىنەن ناسيحاتتالىپ, شاعىن جانە ورتا بيزنەستى دامىتۋعا ەرەكشە كوڭىل ءبولىنىپ كەلەدى. سونداي-اق جاڭا ساياسي تەحنولوگيالاردى ەنگىزۋ ارقىلى نەگىزگى جۇمىستاردىڭ ءادىس-تاسىلدەرى وزگەرگەن. ماسەلەن, ەندى پارتيا جۇمىسىن باعالاۋدا ۇيىم تاراپىنان وتكىزىلگەن ءىس-شارالاردىڭ جانە وعان قاتىسۋشىلاردىڭ سانى ەمەس, حالىققا كورسەتىلگەن ناقتى كومەكتەر ەسەپكە الىنۋدا.
پارتيا تاراپىنان اقپاراتتىق, كوممۋنيكاتسيالىق تەتىكتەر كەڭىنەن قولدانىلۋى ناتيجەسىندە «نۇر وتاننىڭ» الەۋمەتتىك جەلىلەردەگى اقپاراتتارىنىڭ تارالىمى مەن وعان جازىلۋشىلار سانى, سايكەسىنشە وقىلىمى دا ارتا تۇسكەن.
م.اشىمباەۆ ءۇش جىلدىڭ ىشىندە پارتيانىڭ باستاماسىمەن ەلىمىزدە ءبىر مىڭداي IT سىنىپتارى اشىلاتىنىن, وندا جىلىنا 150 مىڭ وقۋشى باعدارلاما جاساۋ مەن روبوت تەحنيكاسى بويىنشا تەرەڭدەتىلگەن ءبىلىم الاتىنىن دا اتاپ ءوتتى. وسى جوبا اياسىندا بيىلدىڭ وزىندە 280 سىنىپ اشۋ كوزدەلگەن. بۇگىنگە دەيىن اقتوبە, قاراعاندى, قوستاناي, پاۆلودار, ماڭعىستاۋ وبلىستارى مەن استانا جانە الماتى قالالارىندا 59 سىنىپ اشىلعان. بۇل جوبالارعا «تۋعان جەر» باعدارلاماسى شەڭبەرىندە كاسىپكەرلەر دەمەۋشىلىك كورسەتكەن.
سونىمەن قاتار IT كومپانيالارى مەن وڭىرلەردەگى وقۋ ورىندارىنىڭ جانىنان IT سالاسىنا جىلىنا 35 مىڭ مامان دايارلايتىن ورتالىقتار اشىلماق. بۇنداي ورتالىقتارعا الدىمەن جۇمىسسىز جانە ءوزىن ءوزى قامتىعان جاستار تارتىلماق.
«نۇر وتان» پارتياسى شاعىن جانە ورتا بيزنەستى دامىتۋ باعىتىندا دا بىرنەشە جوبانى قولعا العان.
– جالپى, بۇگىنگى كۇننىڭ وزەكتى ءارى حالىققا تىكەلەي قاتىستى ماسەلەلەرىن قوعامدىق باقىلاۋعا الۋ, جوسپارلاردىڭ ورىندالۋىن قاداعالاۋ ەلىمىزدەگى ەڭ ءىرى ساياسي ۇيىمنىڭ كۇن تارتىبىنەن تۇسپەيدى. بۇل – پارتيا توراعاسىنىڭ تاپسىرماسى مەن تالابى, – دەدى ماۋلەن اشىمباەۆ.
بىرەگەي جوبا استانادان باستالادى
كەلەسى كەزەكتە ءسوز العان استانا قالاسىنىڭ اكىمى, «نۇر وتان» پارتياسىنىڭ استانا قالالىق فيليالىنىڭ توراعاسى اسەت يسەكەشەۆ پارتيالىق تاپسىرمالاردىڭ ورىندالۋ بارىسى تۋرالى ايتا كەلىپ, جۇيەلى جاڭعىرۋدىڭ استانالىقتاردى تۇتاس قامتيتىنىن اتاپ ءوتتى.
– استانا حالقىن جۇمىسپەن قامتۋ ءىسى دە ۇدايى باستى نازارىمىزدا. قازىرگى تاڭدا قالامىزدا تۇراقتى جۇمىسى بار 500 مىڭ تۇرعىن بولسا, ونىڭ 300 مىڭى شاعىن جانە ورتا بيزنەس سالاسىندا جۇمىس ىستەيدى. ءبىزدىڭ ەسەبىمىز بويىنشا, شامامەن 2023 جىلى تۇراقتى جۇمىسى بار استانالىقتار سانى 650 مىڭعا جەتەدى. بۇل – تاعى 150 مىڭ جۇمىس ورنى قۇرىلادى دەگەن ءسوز. وسىنىڭ ءبارىن ەسكەرە وتىرىپ, سۇرانىسقا يە ماماندىقتاردى وقىتاتىن ارنايى كۋرستار اشتىق. مەملەكەتتىك تاپسىرىستار تىزبەگىنەن كونەرگەن ماماندىقتار الىنىپ قالا شارۋاشىلىعىنا قاجەتتى ماماندىقتار ءتىزىمى جاسالدى. سول ارقىلى جىل سوڭىنا دەيىن 30 مىڭ ادام دايىندالسا, ونىڭ 17 مىڭى مەملەكەتتىك تاپسىرىس بويىنشا وقىتىلماق, – دەدى ءا.يسەكەشەۆ.
قالا اكىمىنىڭ بايانداۋىنشا, بۇعان دەيىن مەكتەپ وقۋشىلارى 7 سىنىپتان باستاپ وقيتىن باعدارلامالاۋ نەگىزدەرىن ەندى ءبىرىنشى سىنىپتان باستاپ وقىتۋ قولعا الىنادى. ويتكەنى وسى ماقساتتاعى قاناتقاقتى جوبا ءوز تيىمدىلىگىن كورسەتكەن. سوندىقتان دا ەندى كومپيۋتەرلىك ساۋاتتىلىقتى ارتتىرۋعا نەگىزدەلگەن جوبا استاناداعى 35 مەكتەپتە باستالماق. قاناتقاقتى جوبادا استانالىق بالالاردىڭ تانىمدىق ويىندار باعدارلاماسى مەن قازاقشا مۋلتفيلمدەر جاساۋعا قىزىعۋشىلىعى جوعارى بولعاندىعى بايقالعان.
سونىمەن قاتار الداعى وقۋ جىلىنا دەيىن ەلوردا مەكتەپتەرى تولىق كومپيۋتەرلەندىرىلىپ, سىمسىز ينتەرنەت جەلىسى جۇرگىزىلمەك جانە روبوت-تەحنيكالىق جابدىقتارمەن قامتىلۋى 100 پايىزعا جەتكىزىلمەك.
استانا قالاسىندا ەلباسى تاپسىرمالارىن, «نۇر وتان» پارتياسىنىڭ جوسپارلى مىندەتتەرىن ورىنداۋ ماقساتىندا جۇيەلى جۇمىستار قولعا الىنعان. اتاپ ايتقاندا, «پرەزيدەنتتىڭ بەس الەۋمەتتىك باستاماسىندا» كورسەتىلگەن ستۋدەنت جاستاردى جاتاقحانالارمەن قامتۋ جوباسى بويىنشا استانادا العاش رەت مەملەكەت-جەكەمەنشىك ارىپتەستىگى نەگىزىندە تاعى ءبىر قاناتقاقتى جوبا قولعا الىنباقشى. ناقتىراق ايتقاندا, 11 مەملەكەتتىك كوللەدجدىڭ ستۋدەنتتەرىن تۇراقتى ءۇي-جايمەن قامتاماسىز ەتۋ ءۇشىن قالا بويىنشا بۇعان دەيىن سالىنعان عيماراتتار پايدالانىلادى. وسى باستاما ارقىلى 2000 ورىندىق جاتاقحانا قاجەتتىلىگى ءوز شەشىمىن تابادى. سونداي-اق بۇل ءادىس شاعىن جانە ورتا بيزنەسكە دە قولايلى اسەر ەتىپ, جاڭا جۇمىس ورىندارىنىڭ اشىلۋىنا سەبەپكەر بولادى.
تسيفرلاندىرۋ باعدارلاماسىنا سايكەس استانادا بيىلعى جىلدىڭ قىركۇيەك ايىنا دەيىن سمارت-ءبىلىم, سمارت-مەديتسينا جانە E-پيك (پاتەر يەلەرى كووپەراتيۆى) جوبالارىن جۇزەگە اسىرۋ اياقتالادى.
استانا اكىمى ەلوردالىق ءاربىر تۇرعىننىڭ تسيفرلى تولقۇجاتپەن قامتاماسىز ەتىلەتىندىگىنە دا توقتالدى. بۇل جۇيە جاردەماقى الۋدى, مەملەكەتتىك قىزمەتتەردىڭ يگىلىگىن كورۋدى ءتۇرلى تولەمدەر جۇرگىزۋدى وڭتايلاندىرماق.
– 2017 جىلى استانا قالاسى بويىنشا دارىگەرلىك كەزەككە 2 ملن ادام ەلەكتروندى ادىسپەن تىركەلدى. سونداي-اق بۇرىن بەس كۇنگە سوزىلاتىن بالانى بالاباقشاعا تىركەۋ ءراسىمى قازىر بەس مينۋتتا-اق جۇزەگە اسىرىلادى, – دەدى ءا.يسەكەشەۆ.
بۇل مالىمەتتەر ەلباسىنىڭ كوڭىلىنەن شىعىپ, مەملەكەت باسشىسى اتالعان جوسپاردىڭ تولىقتاي ورىندالۋىنا تىلەكتەستىك ءبىلدىردى.
تسيفرلاندىرۋ – كاسىپكەرلىككە ۇلكەن قولداۋ
ساياسي كەڭەستىڭ كەڭەيتىلگەن وتىرىسىندا قىزىلوردا وبلىستىق كاسىپكەرلەر پالاتاسىنىڭ ديرەكتورى عالىمبەك جاقسىلىقوۆ ەلىمىزدەگى كاسىپكەرلىك قىزمەتتى جەتىلدىرۋگە ۇدايى ەرەكشە كوڭىل ءبولىپ وتىرعان ەلباسىنا ەل كاسىپكەرلەرى اتىنان العىسىن ءبىلدىردى. وسى ورايدا, مەملەكەت باسشىسى جۋىردا قول قويعان كاسىپكەرلىك قىزمەتتى رەتتەۋگە قاتىستى زاڭعا ساي جەرگىلىكتى جەردە كاسىبىن ەندى اشىپ, جاڭا قالىپتاسا باستاعان كاسىپكەرلەر ءۇشىن تەكسەرۋلەر مەن ايىپپۇلداردىڭ ورنىنا پروفيلاكتيكالىق باقىلاۋ ەنگىزىلىپ, جوسپاردان تىس تەكسەرۋلەردىڭ مەرزىمىن 30 كۇننەن 10 كۇنگە دەيىن قىسقارتۋ, بىرقاتار سالىق تولەمدەرىنىڭ مولشەرلەمەسىن ازايتۋ كوزدەلگەنى بەلگىلى. بۇل شاعىن جانە ورتا بيزنەستى قولداۋعا باعىتتالعان يگى قادامداردىڭ ءبىرى عانا.
– بيىلعى جولداۋىڭىزدا 2018 جىلى تسيفرلى ءداۋىر ونەركاسىبىن قالىپتاستىرۋعا ارنالعان يندۋستريالاندىرۋدىڭ ءۇشىنشى بەس جىلدىعىن ازىرلەۋ كەرەكتىگىن ايتتىڭىز. بۇل ءىس كاسىپكەرلىككە ۇلكەن سەرپىن بەرەرى ءسوزسىز. قازىر بىزگە تەحنيكالىق شارتتاردى الۋ, ساۋلەت جانە جەر ماسەلەلەرى بويىنشا رۇقسات بەرۋ قۇجاتتارىن راسىمدەۋ بويىنشا اشىقتىق قاجەت. قولدانىستاعى زاڭنامالاردا جەر ۋچاسكەسىن الۋ مەرزىمى ەكى اي دەپ كورسەتىلگەن. ءىس جۇزىندە ول جارتى جىلعا دەيىن سوزىلىپ كەتەدى. ويتكەنى جەر بولۋگە قاتىستى مەملەكەتتىك مەكەمەلەر وتە كوپ, سوسىن ورگانداردىڭ اراسىندا ءوزارا اقپاراتتىق بايلانىس جوق. ماسەلەن قىزىلوردا قالاسىنىڭ بارلىق الەۋمەتتىك ماڭىزى بار ينجەنەرلىك جەلىلەرى تۋرالى اقپاراتپەن قامتىلعان ەلەكتروندىق كارتا دايارلاندى. ونىڭ نەگىزىندە بيزنەسكە بارلىق ينجەنەرلىك جەلىگە قوسىلۋعا رۇقساتتى ءبىر جەردەن الۋعا مۇمكىندىك بەرەتىن گەواقپاراتتىق ونلاين سەرۆيس جۇيەسى قۇرىلدى. بۇرىن كاسىپكەرلەر تەحنيكالىق شارتتى الۋ ءۇشىن قالانىڭ ءتورت جەرىندە ورنالاسقان ءتورت مەكەمەگە باراتىن. وعان ءتورت ايداي ۋاقىت كەتەتىن. قازىر ارنايى سەرۆيس ارقىلى ءۇش كۇندە الادى. ۋاقىت پەن قاراجات ايتارلىقتاي ۇنەمدەلەدى, دەدى ع.جاقسىلىقوۆ.
كاسىپكەرلەر پالاتاسىنىڭ وكىلى سىر وڭىرىندە جەر تەلىمدەرىن پايدالانۋعا رۇقسات بەرۋ ماسەلەسىنە بايلانىستى دا ءبىراز شارۋا اتقارىلعانىن ايتا كەلە, سالانى تسيفرلاندىرۋ شاعىن جانە ورتا بيزنەس وكىلدەرىنە ۇلكەن قولداۋ بولعانىنا توقتالدى. تەك ۋاكىلەتتى مەكەمەلەردىڭ ءوزارا قاتىناسىن رەتتەۋدىڭ ارقاسىندا جەر ۋچاسكەسىن بەرۋ مەرزىمى 148 كۇننەن 70 كۇنگە, ال پارتيالىق ۇسىنىستاردان سوڭ 29 كۇنگە دەيىن قىسقارتىلعان.
مەملەكەت باسشىسى «اتامەكەن» ۇلتتىق كاسىپكەرلەر پالاتاسىنىڭ باسشىلىعىنا كاسىپكەرلەرگە كورسەتىلىپ جاتقان جەڭىلدىكتەر مەن حالىققا ۇسىنىلعان ورتا يگىلىكتەردى ەل اراسىندا كەڭىنەن ناسيحاتتاۋ تۋرالى تاپسىرما بەردى.
ال ء«YBYRAى جاس پروگرامميستەر ليگاسى» قوعامدىق قورىنىڭ جەتەكشىسى ءازيزا شوجەەۆا «نۇر وتان» پارتياسى قولعا العان باعدارلامالاۋ نەگىزدەرىن بالالارعا مەكتەپ جاسىنان ۇيرەتۋ جوباسىنىڭ تيىمدىلىگىن, پارتيانىڭ پاۆلودار وبلىستىق فيليالى توراعاسىنىڭ ءبىرىنشى ورىنباسارى يليا تەرەنچەنكو, ءال-فارابي اتىنداعى قازاق ۇلتتىق ۋنيۆەرسيتەتىنىڭ الەۋمەتتىك دامۋ جونىندەگى پرورەكتورى شولپان جامانبالاەۆا, «جاس وتان» جاستار قاناتى جامبىل وبلىستىق فيليالىنىڭ توراعاسى ءۋاليحان بولاتبەكتەر «نۇر وتان» پارتياسى جۇكتەگەن مىندەتتەردىڭ ورىندالۋى جايىندا باياندادى.
جاڭا يپوتەكا مۇقتاج جاندارعا باعىتتالۋى ءتيىس
ادامي كاپيتالدى دامىتۋدىڭ جاڭا دەڭگەيىنە كوتەرىلۋگە, حالىقتىڭ تابىسىن ارتتىرۋعا جانە ءومىر ساپاسىن جاقسارتۋعا مول مۇمكىندىك بەرەتىن «پرەزيدەنتتىڭ بەس الەۋمەتتىك باستاماسىنىڭ» ورىندالۋ بارىسى جايىندا پرەمەر-ءمينيستردىڭ ورىنباسارى ەربولات دوساەۆ كەڭىنەن باياندادى.
– باستامالاردى جۇزەگە اسىرۋ ءۇشىن ۇكىمەت جول كارتاسىن بەكىتتى. اتالعان جول كارتاسى اياسىندا 35 ءىس-شارا قاراستىرىلعان. وتكەن ناۋرىز-مامىر ايلارىندا سونىڭ 20-سى ىسكە اسىرىلدى. سونىڭ ىشىندە باستامالاردى جۇزەگە اسىرۋدىڭ زاڭنامالىق نەگىزى قالىپتاستى. مۇنداي ءوزارا ءىس-قيمىل, «نۇر وتان» پارتياسىنىڭ جۇيەلى باقىلاۋى ءار باستامانىڭ تيىمدىلىگىن ارتتىرا تۇسەدى. الداعى ۋاقىتتا بۇل باعىتتاعى جۇمىس ودان ارى كۇشەيتىلىپ, ەلباسى تاپسىرماسىنىڭ ساپالى ورىندالۋىنا بارلىق كۇش-جىگەرىمىزدى جۇمسايتىن بولامىز, – دەدى ەربولات دوساەۆ.
پرەمەر-ءمينيستردىڭ ورىنباسارى وسىدان سوڭ بەس باستامانىڭ ارقايسىسىنا جەكە-جەكە توقتالىپ, نەگىزگى جۇمىستاردىڭ بارىسى مەن ورىندالۋ مەرزىمىن باياندادى.
اتاپ ايتقاندا, ۇلتتىق بانك «7 – 20 – 25» باعدارلاماسى بويىنشا يپوتەكالىق نەسيەلەۋدىڭ تۇجىرىمداماسىن بەكىتتى. بۇل جۇيە تەك جاڭا پاتەرلەر الۋعا عانا ارنالعان. بانكتەر اتالعان باعدارلاما بويىنشا الداعى شىلدە ايىندا نەسيەلەۋدى باستايدى. قارىز تەڭگەمەن بەرىلەدى جانە قوسىمشا كوميسسيا مەن وزگە دە الىمدار جوق. اتالعان باعدارلاما بويىنشا پاتەرلەر باعاسى استانا, الماتى, اتىراۋ, اقتاۋ قالالارىندا 25 ملن تەڭگەدەن, ال وزگە قالالاردا 15 ملن تەڭگەدەن اسىرىلمايدى.
– ءبىز پاتەرلەردى باسپاناسى جوق جاستار العانىن قالايمىز. بۇل باعدارلاما بىردە ءبىر باسپاناسى جوق جاندارعا ارنالىپ وتىر. سوندىقتان دا وسى باعىتتاعى جۇمىستار كىمگە جانە نە ءۇشىن جاسالىپ جاتقانىن بارشا قوعامعا ءتۇسىندىرۋ قاجەت. ءتيىستى ەسەپتەۋلەر جاسالدى, وتباسىنىڭ ەكى مۇشەسى جۇمىس ىستەگەن كەزدە ەشقانداي اۋىرتپالىق بولمايدى. يپوتەكالىق نەسيەنىڭ ۇستەمەسى 7 پايىزدان اسپايدى, – دەدى ەلباسى.
ەلباسى وسى رەتتە وبلىس اكىمدەرى مەن اتقارۋشى ورگان باسشىلارىنا باعدارلامانى ناقتى ىسكە اسىرۋدى, ايماقتاردا بولىنگەن قاراجات شاشاۋىن شىعارماي پايدالانىلۋدى جانە ەلدىڭ يگىلىگىنە ساپالى قىزمەت كورسەتۋدى اتاپ تاپسىردى.
ە.دوساەۆتىڭ مالىمدەۋىنشە, تابىس سالىعىنىڭ تومەندەۋىنە بايلانىستى تۋىندايتىن جەرگىلىكتى بيۋدجەتتەردىڭ تاپشىلىعى رەسپۋبليكالىق بيۋدجەت ەسەبىنەن وتەلەدى. بيىلدان باستاپ جوو-داعى تەحنيكالىق ماماندىقتارعا بولىنەتىن گرانت سانى كوبەيتىلگەن, سونداي-اق ستۋدەنتتەردى جاتاقحانامەن قامتۋدىڭ وڭتايلى تەتىگى جاسالعان. ۇكىمەتتىڭ ەسەبىنشە, ەلىمىزدە 2019 جىلى 5 مىڭ ورىندىق, ال 2020 جىلى قوسىمشا 15 مىڭ ورىندىق جاتاقحانالار پايدالانۋعا بەرىلمەك. سونداي-اق شاعىن جانە ورتا بيزنەستى دامىتۋعا ارنالعان شاعىن نەسيە كولەمى دە ارتىپ, وسى ماقساتقا 63 ملرد تەڭگە قاراستىرىلعان, ونىڭ باسىم بولىگى اۋىلدىق ەلدى مەكەن تۇرعىندارىنا بەرىلەدى. ال سارىارقا گاز قۇبىرى جەلىسىنىڭ العاشقى كەزەڭىن 2019 جىلدىڭ سوڭىنا دەيىن اياقتاۋ كوزدەلگەن.
ءوز كەزەگىندە «پرەزيدەنتتىڭ بەس الەۋمەتتىك باستاماسىنىڭ» جۇزەگە اسىرىلۋىن باقىلاۋ جونىندەگى قوعامدىق كەڭەستىڭ توراعاسى, سەنات دەپۋتاتى باقىتجان جۇماعۇلوۆ كەڭەستىڭ قوعامدىق مونيتورينگ جانە باقىلاۋ جۇرگىزۋدى ۇيلەستىرۋ, حالىققا كەڭىنەن اقپارات بەرۋ, باستامالاردى جۇزەگە اسىرۋ كەزىندەگى ماسەلەلەردى انىقتاۋ, ولاردى شەشۋ جونىندە ۇسىنىستار دايارلاۋ, ساپالى ورىندالۋىنا اتسالىسۋ ءىسىن ءتيىمدى اتقارۋعا ءازىر ەكەنىن اتاپ ءوتتى.
ال الماتى وبلىستىق «وگني الاتاۋ» گازەتىنىڭ باس رەداكتورى اتساليم يديگوۆ «پرەزيدەنتتىڭ بەس الەۋمەتتىك باستاماسىن» حالىق زور ۇمىتپەن قابىلداعاندىعىن جانە «نۇر وتان» پارتياسى قازاقستان حالقى اسسامبلەياسىمەن, بارلىق ازاماتتىق قوعام ينستيتۋتتارىمەن بىرگە بەس الەۋمەتتىك باستامانى ىسكە اسىرۋعا باقىلاۋ جۇرگىزۋ بويىنشا جۇيەلى جۇمىستى باستاپ كەتكەنىنە توقتالدى.
بارلىعى دا حالىقتىڭ يگىلىگى ءۇشىن
باسقوسۋدىڭ كۇن تارتىبىندەگى ماسەلەلەرگە بايلانىستى باياندامالاردى تىڭداعان ەلباسى مەملەكەتتىك باعدارلامالاردى جۇزەگە اسىرۋ جانە ولاردىڭ ورىندالۋىنا باقىلاۋ جاساۋ ىسىندەگى «نۇر وتان» پارتياسىنىڭ ماڭىزدى ءرولىن اتاپ ءوتتى.
قازاقستان پرەزيدەنتى الەمدىك دامۋدىڭ جانە ەكونوميكالىق ۇدەرىستەردىڭ جوعارى قارقىنىنا توقتالىپ, جاڭا سىن-قاتەرلەرگە بەيىمدەلۋ قاجەتتىگىن ايتتى.
– ءبىز جۇزەگە اسىرۋدى جوسپارلاپ وتىرعان جۇمىستاردىڭ ءبارى باسەكەگە قابىلەتتى بولۋىمىز ءۇشىن قاجەت. ەكونوميكانىڭ ءۇشىنشى جاڭعىرۋى, «100 ناقتى قادام» ۇلت جوسپارى ءبىزدىڭ تاراپىمىزدان اتقارىلۋعا ءتيىس نارسەنىڭ ءبارىن تولىق ايقىنداپ بەردى, – دەدى نۇرسۇلتان نازارباەۆ.
مەملەكەت باسشىسى «تسيفرلى قازاقستان» باعدارلاماسىن جانە پارتيانىڭ تسيفرلاندىرۋ سالاسىنداعى جوبالارىن ورىنداۋدىڭ ماڭىزدىلىعىنا نازار اۋداردى.
قازاقستان پرەزيدەنتى استانا ەكونوميكالىق فورۋمىنىڭ قورىتىندىسى بويىنشا شىعارىلعان شەشىمدەر جونىندە كەڭىنەن اڭگىمەلەدى.
– جاھاندىق دامۋدان قالىپ قويماۋ ءۇشىن باسقارۋدىڭ ساپالى بولۋى تالاپ ەتىلەدى. بۇل – مەملەكەتتىك قىزمەتتى جەتىلدىرۋ دەگەن ءسوز. ءبىز مەملەكەتتىك قىزمەتكە قابىلداۋ ۇدەرىسىنىڭ اشىقتىعىن قامتاماسىز ەتۋ جانە مەريتوكراتيا قاعيداتىن ىلگەرىلەتۋ ماسەلەلەرىن شەشتىك. بۇل قادامنىڭ ورىندالۋىن پارتيا قاداعالاۋى كەرەك, – دەدى نۇرسۇلتان نازارباەۆ.
سونىمەن قاتار مەملەكەت باسشىسى ينۆەستيتسيا تارتۋ جانە باسەكەگە قابىلەتتى ەلدى قالىپتاستىرۋ قاجەتتىگىن اتاپ ءوتتى.
– ينۆەستيتسيالار زاڭ ۇستەمدىگى قامتاماسىز ەتىلگەن, كەلىسىمشارتتارى ساقتالاتىن, ءبىلىمدى مەملەكەتتىك قىزمەتشىلەر جۇمىس ىستەيتىن ەلگە عانا كەلەدى. ال قازىرگى جاعدايداعى باسەكەگە قابىلەتتىلىك – تسيفرلاندىرۋدى دامىتۋ, – دەدى قازاقستان پرەزيدەنتى.
سونىمەن قاتار نۇرسۇلتان نازارباەۆ سىبايلاس جەمقورلىقتىڭ الدىن الۋ جانە وعان قارسى كۇرەس جۇرگىزۋ ىسىندە تسيفرلاندىرۋدىڭ ءتيىمدى ەكەنىن ايتتى.
مەملەكەت باسشىسى اگروونەركاسىپ كەشەنىن دامىتۋ, ونىمدىلىكتىڭ ءوسىمىن قامتاماسىز ەتۋ جانە اۋىل شارۋاشىلىعى ەكسپورتىن ارتتىرۋ ماسەلەلەرىنە توقتالدى.
سوڭىندا قازاقستان پرەزيدەنتى جاڭا جوبالاردى ءتيىمدى جۇزەگە اسىرۋدىڭ جانە ۇكىمەت پەن «نۇر وتان» پارتياسىنىڭ الدىنا قويىلعان مىندەتتەردىڭ ماڭىزدىلىعى جونىندە ايتتى.
– ەل ىشىندە قولايلى الەۋمەتتىك جاعداي بولعاندا عانا مەملەكەت تابىستى جۇمىس ىستەيدى. بۇل – ۇكىمەتتىڭ باستى مىندەتى. مەملەكەت تاراپىنان اتقارىلىپ جاتقان جۇمىستىڭ ءبارى حالىققا ارنالعان, – دەدى نۇرسۇلتان نازارباەۆ.
ساياسي كەڭەس وتىرىسىنىڭ قورىتىندىسى بويىنشا قارالعان ماسەلەلەرگە بايلانىستى ارنايى قاۋلىلار قابىلداندى.
سەرىك ابدىبەك,
«ەگەمەن قازاقستان»
