مامىر ايىندا ايماقتا جالپى قازاقستاندىق «نۇرلى بولاشاق» بالالارعا ارنالعان مەملەكەتتىك ساياساتتى جۇزەگە اسىرۋ بويىنشا مەملەكەتتىك ورگاندار, قوعامدىق جانە ۇكىمەتتىك ەمەس ۇيىمداردىڭ, بيزنەس-قوعامداستىقتىڭ كۇش-جىگەرىن بىرىكتىرۋگە ۇندەيتىن سونىمەن قاتار, بالالاردىڭ قۇقىقتارىن قورعاۋعا قوعامنىڭ نازارىن اۋدارۋعا باعىتتالعان اكتسياسى باستالدى. اقتوبە وبلىسىندا «ماڭگىلىك ەل» جالپىۇلتتىق يدەياسىن جۇزەگە اسىرۋ اياسىندا حالىقارالىق بالالاردى قورعاۋ كۇنىنە ارنالعان بالالار مەن جاسوسپىرىمدەردىڭ ورىنداۋ شىعارماشىلىعىن قولداۋ جانە دامىتۋ ماقساتىندا رۋحاني, ادامگەرشىلىك, ەستەتيكالىق تاربيە فاكتورى رەتىندە بالالار مەن جاستاردىڭ مۋزىكالىق وركەسترى جانە ءانسامبلىنىڭ شەرۋى ءوتتى.
شەرۋگە قاتىسۋشىلاردى وبلىس اكىمى بەردىبەك ساپارباەۆ مەرەكەمەن قۇتتىقتادى.
- تاۋەلسىزدىك العاننان بەرى مەملەكەت باسشىسى نۇرسۇلتان نازارباەۆ جاس ۇرپاقتىڭ تاربيەسىنە جانە بىلىمىنە ەرەكشە نازار اۋدارادى. 27 جىل بويى قازاقستان سىزدەرگە بارلىق جاعدايدى جاساۋ ءۇشىن بەرىك نەگىز قالادى. 2018 جىل اقتوبە وبلىسىندا باقىتتى بالا جىلى دەپ جاريالاندى. ايماقتا باستاۋىن العان «باقىتتى بالا» اكتسياسى بالالاردىڭ بارلىق ماسەلەلەرىن شەشۋگە جانە ولاردىڭ جان-جاقتى دامۋىنا ۇلەس قوسۋعا باعىتتالعان. جىل باسىنان بەرى 600-گە جۋىق ءىس-شارا وتكىزىلدى, الەۋمەتتىك, سپورتتىق جانە مادەني نىساندار سالىندى. اكتسيا جالعاسادى جانە بالالاردىڭ وزەكتى ماسەلەلەرىن شەشۋگە مۇمكىندىك بەرەدى. ەڭ باستىسى, بىرلىك پەن تۇراقتىلىق بولۋى ءتيىس, ءبىز, ەلدىڭ دامۋىنا ەلەۋلى ۇلەس قوساتىن لايىقتى جاس ۇرپاقتى تاربيەلەۋىمىز قاجەت, - دەدى بەردىبەك ساپارباەۆ پارادقا قاتىسۋشىلارعا ارناعان سوزىندە.
وبلىس اكىمى ايماقتا جازعى دەمالىس كەزىندە دەمالۋعا ارنالعان ءتيىمدى شارالار قابىلدانعانىن اتاپ ءوتتى. سونىمەن قاتار, مۇگەدەك بالالارعا ەرەكشە نازار اۋدارىلاتىن بولادى.
وسىنىڭ دالەلى رەتىندە ءوڭىر باسشىسى از قامتىلعان وتباسىلاردان شىققان, مۇمكىندىگى شەكتەۋلى بالالارعا, رەسپۋبليكالىق جانە حالىقارالىق وليمپيادالاردىڭ, جارىستار مەن بايقاۋلاردىڭ جەڭىمپازدارى مەن جۇلدەگەرلەرىنە ءبىلىم بەرۋ-ساۋىقتىرۋ لاگەرلەرىنە جانە ەكسكۋرسيا جاساۋعا جولدامالار بەردى.
بەس بالا تاتارستاننىڭ كورىكتى جەرلەرىمەن, 100 اقتوبەلىك بالا وزبەكستاننىڭ كيەلى جەرلەرىمەن تانىسىپ, 120 بالا ءداستۇر بويىنشا ورىنبور وبلىسىنىڭ جىل بويعى لاگەرىندە, تاعى 400 بالا شىعىس قازاقستان وبلىسىنىڭ لاگەرلەرىندە بولا الادى.
وسىمەن توسىن سىي بىتپەيدى. ويىل ورتا مەكتەبىنىڭ تۇلەگى, Burabai Summer Fest حالىقارالىق بالالار تەلەۆيزيالىق فەستيۆالىنىڭ جەڭىمپازى اقنيەت بورانباي ۇلى احمەت جۇبانوۆ اتىنداعى مۋزىكالىق كوللەدجىنىڭ گرانتىن الدى. «باقىتتى بالا» اكتسياسى اياسىندا ەكىنشى توپتاعى مۇگەدەك ينجيفيا كاليكوۆانىڭ كوپتەن بەرگى ارمانىن ورىنداۋعا مۇمكىندىك تۋدى. مەكتەپ تۇلەگى ق.جۇبانوۆ اتىنداعى ءاومۋ-نە ءتۇسىپ «شەت تىلدەرى» ماماندىعى بويىنشا ءبىلىم الۋدى ارمانداعان.
شەرۋ سالتاناتتى شارادان سوڭ وبلىس ورتالىعىنىڭ باستى الاڭىنان ءجۇرىپ كەتتى.
ايتا كەتەيىك, اقتوبەدە شەرۋگە 7 مىڭ ادام قوسىلدى. ولاردىڭ قاتارىندا مۇگەدەك بالالار, از قامتىلعان وتباسىلاردان شىققان بالالار, وقۋ ۇزدىكتەرى, ستۋدەنتتەر, ۇستازدار بار. وبلىس ورتالىعىنىڭ باس كوشەسىمەن بارابانشىلار, ۇرمەلى وركەسترلەر مەن انسامبلدەر, ماجورەتكالار, چەرليدەرلەر, حور جانە مۋزىكالىق اسپاپتاردىڭ ۇجىمدارى ءجۇرىپ ءوتتى. جالپى العاندا, اۋدانداردا دا ۇيىمداستىرىلعان شەرۋگە 43 مىڭ ادام قاتىستى.
تەمىر قۇسايىن,
"ەگەمەن قازاقستان"
اقتوبە
