ءبىر ايتا كەتەرلىگى, بارلىق ءبىلىم بەرۋ ۇيىمدارىن بىرىكتىرەتىن رەسپۋبليكالىق ءداستۇرلى شەرۋ ءبىر ۋاقىتتا ەلىمىزدىڭ بارلىق وڭىرلەرىندە ءوتتى.
شارا «ماڭگىلىك ەل» جالپىۇلتتىق يدەياسىن ىسكە اسىرۋ اياسىندا بالالار مەن ستۋدەنتتەردىڭ شەرۋلىك جانە فەستيۆالدىك ءجۇرىپ ءوتۋىن قولداۋ جانە دامىتۋ ماقساتىندا ۇيىمداستىرىلعان. جيىنعا استانا قالاسىنىڭ ءتورت اكىمشىلىك اۋدانىنىڭ وقۋشىلارى مەن قوسىمشا ءبىلىم بەرۋ, سونداي-اق ورتا ءبىلىم بەرۋ مەكەمەلەرىنىڭ پەداگوگتارى, جوعارى جانە ورتا ارناۋلى وقۋ ورىندارىنىڭ ستۋدەنتتەرى قاتىستى.
سالتاناتتى جيىندى اشقان ءبىلىم جانە عىلىم ۆيتسە-ءمينيسترى تالعات ەشەنقۇلوۆ جينالعانداردى حالىقارالىق بالالاردى قورعاۋ كۇنىمەن قۇتتىقتاپ, ءوزىنىڭ يگى تىلەگىمەن ءبولىستى.
«بالالار مەن جاستاردىڭ مۋزىكالىق وركەسترلەرى مەن انسامبلدەرىنىڭ شەرۋى بىلتىردان باستاپ ەلىمىزدىڭ بارلىق وڭىرىندە تۇراقتى تۇردە وتكىزىلىپ كەلەدى. بىلتىرعى جىلى شەرۋگە 100 مىڭنان استام بالالار مەن جاسوسپىرىمدەر قاتىسقان بولسا, بيىلعى شاراعا رەسپۋبليكانىڭ بارلىق ءبىلىم وردالارى مەن جوو-دان 527 مىڭنان اسا بالا بەلسەندىلىك تانىتتى. ەلىمىزدىڭ مادەني ومىرىندەگى ايتۋلى شارا بارلىق وبلىستاردا بىردەي ۋاقىتتا وتەدى. شەرۋگە جالپى سانى 5 مىڭنان استام ءبىلىم وردالارى قاتىسادى. ولاردىڭ ىشىندە استانا قالاسى بويىنشا 7 مىڭنان استام بالا بار» - دەدى ۆيتسە-مينيستر.
مەرەكەگە وراي ۇيىمداستىرىلعان مۋزىكالىق شەرۋ استانا قالالىق اكىمدىگىنىڭ الدىندا باستالىپ, اباي داڭعىلى مەن كەنەسارى كوشەلەرىن بويلاي, ورتالىق الاڭدا اياقتالدى. شارا بارىسىندا بارابانشىلار وتريادى, ۇرمەلى وركەسترلەر مەن انسامبلدەر, ماجورەتكالار, چەرليدەرلەر, حور جانە بي ۇجىمدارى ءوز ونەرلەرىن ورتاعا سالدى.
اۋقىمدى شاراعا قاتىسۋ ءۇشىن ءار مەكتەپ ۇزدىك وقۋشىلاردى تاڭداپ الىپ, ءبىر ايعا جۋىق دايىندالدى. شەرۋ بالالار مەن جاستاردىڭ مۋزىكالىق مادەنيەتىنىڭ دەڭگەيىن ارتتىرۋ, پاتريوتتىق سەزىمىن قالىپتاستىرۋ, رەسپۋبليكانىڭ وقۋ ورىندارىنىڭ بەدەلىن كوتەرۋ جانە جارنامالاۋدا ۇلكەن ءرول اتقارادى. شەرۋگە قاتىسۋشىلاردىڭ ءبىرى مەكتەپ وقۋشىسى قاراباەۆا كاميلا بۇگىنگى شارا وزىنە ۇلكەن مەرەكەلىك كوڭىل كۇي سىيلاپ, جاڭا دوستار تابۋعا كومەكتەسكەنىن ايتتى.
شەرۋدى دايىنداۋعا وقۋشىلار, ستۋدەنتتەر, مەكتەپ مۇعالىمدەرى, كوللەدجدەر مەن جوو-نىڭ وقىتۋشىلارى, اتا-انالار مەن مادەنيەت جانە سپورت وكىلدەرى بەلسەنە اتسالىستى. سونداي-اق, شەرۋ ەلىمىزدىڭ مادەني ومىرىندەگى ايتۋلى وقيعالاردىڭ بىرىنە اينالدى. كەرەمەت مۋزىكالىق رەپەرتۋار, الۋان ءتۇرلى اسپاپتار, سان ءتۇرلى ونەردى بىرىكتىرگەن باعدارلامالار مەن كوزدىڭ جاۋىن الاتىن بىرىڭعاي اسەم كيىمدەرمەن بەزەندىرىلگەن شەرۋ بالالار مەرەكەسىنىڭ كوركىن كەلتىردى.
ءمادينا جالەلقىزى,
«ەگەمەن قازاقستان»
